Young Pipol Savve Ask . . .

Why Nao God Letem Iumi for Safa?

“God stap long heven, ples wea evriting hem gud tumas, bat iumi go ahed for safa long hia.”—Mary.a

YOUNG pipol distaem born insaed world wea barava nogud. Planti thousand pipol lusim laef insaed olketa earthquake and natural disaster wea happen evritaem. Main samting insaed long nius hem olketa war and attak bilong terrorist. Olketa sik, crime, and accident mekem iumi safa from iumi lusim olketa wea iumi lovem. Mary wea toktok bilong hem stap antap, barava kasem nogud samting. Hem talem toktok hia bihaen dadi bilong hem dae.

Hem normal samting for feel wiki, lus hope, or kros, taem iumi kasem wanfala barava nogud samting. Iu maet ting, ‘Why nao diswan mas happen?’ ‘Why nao hem happen long mi?’ or ‘Why nao hem happen distaem?’ Olketa kaen kwestin olsem barava needim ansa wea mekem man satisfae. Bat for kasem stretfala ansa, iumi mas go long stretfala ples. Wanfala young wan nem bilong hem Turrell hem sei, samfala taem pipol “barava feel nogud gogo olketa no savve tingting long stretfala wei abaotem samting.” So iu maet need for faendem wei for daonem lelebet feeling bilong iu mekem iu fit for tingting—long stretfala and balance wei.

Feisim Olketa Real Samting wea Nogud

Hem maet barava nogud for ting raonem dae and wei for safa, bat olketa hia nogud samting long laef wea iumi no savve missim. Job barava talem klia taem hem sei: “Man, wea born from woman, garem shortfala laef and fulap witim trabol.”—Job 14:1.

Bible promisim wanfala niu world wea “bae garem raeteous fasin.” (2 Peter 3:13; Revelation 21:3, 4) Bat, bifor living olsem kamap, olketa man mas feisim wanfala taem bilong olketa barava nogud samting. Bible sei: “Iu mas savve, insaed long olketa last day nogud taem wea hard for deal witim bae stap.”—2 Timothy 3:1.

Hao long nao bae olketa nogud taem hia go ahed? Olketa disaepol bilong Jesus askem semkaen kwestin. Bat Jesus nating talem olketa barava day or hour wea disfala system wea fulap witim planti sorre samting bae finis. Nomoa, Jesus talem olketa: “Man wea go ahed strong kasem end nao bae sev.” (Matthew 24:3, 13) Toktok bilong Jesus hia encouragem iumi for tingting go long future. Iumi mas redy for stand strong long planti nogud samting wea bae kasem iumi bifor end hem kam.

God Nao Kosim?

So waswe, hem stret for kros long God from hem letem wei for safa go ahed? Hem barava no stret taem iumi tingim hao God hem promis for finisim evri wei for safa. Hem no stret tu for tingse God nao kosim evri nogud samting for happen. Planti sorre samting wea happen kamaot from samting wea happen wea no eniwan planim. Olsem example, tingim sapos wind blowim wanfala tree mekem hem foldaon and samwan garekil. Pipol maet sei God duim diswan. Bat God no mekem datfala tree for foldaon. Bible helpem iumi savve hao olketa sorre samting hia kasem iumi from “taem and samting wea iumi no expectim.”—Ecclesiastes 9:11.

Iumi maet safa tu from wei for no iusim gudfala tingting. Tingim sapos wanfala gang bilong olketa young wan go for drink beer then olketa go insaed wanfala trak. From datwan, olketa barava accident nogud. Hu nao bae kasem blame? God? Nomoa, olketa harvestim samting wea kamaot from wei for no iusim gudfala tingting.—Galatians 6:7.

Iu maet ask: ‘Bat waswe, God no garem inaf paoa for finisim nogud samting distaem?’ Samfala faithful man long taem bilong Bible bin ting abaotem datwan. Profet Habakkuk askem God olsem: “Why nao iu luk long olketa wea duim nogud samting, iu stap kwaet taem samwan wea wicked hem swallowim samwan wea raeteous winim hem?” Nomata olsem, Habakkuk no kwiktaem disaedem samting. Hem sei: “Mi bae luk aot, for lukim wanem nao hem bae talem thru long mi.” Bihaen, God promisim hem hao long “taem wea set finis,” Hem bae finisim wei for safa. (Habakkuk 1:13; 2:1-3) So iumi mas patient and weit long God for finisim olketa nogud samting hia long taem bilong hem wea set finis.

No kwiktaem tingse God laekem iumi for safa or hem trae testim iumi. Hem tru hao wei for safa savve mekem iumi showimaot olketa gudfala fasin and Bible talem hao olketa test wea God letem iumi kasem savve mekem faith bilong iumi kamap moa strong. (Hebrews 5:8; 1 Peter 1:7) Tru nao, planti pipol wea kasem hardfala taem or sorre samting, kamap moa patient or garem feeling for kea. Bat datwan no mekem iumi sei God nao kosim olketa for safa. Man wea garem datkaen tingting no tingim love and wisdom bilong God. Bible talemaot klia: “Taem hem kasem test, no eniwan mas sei: ‘God nao testim mi.’ From man no savve testim God witim nogud samting and God tu no testim eniwan.” Bat, from God iumi kasem “evri gudfala present and evri perfect present”!—James 1:13, 17.

Why God Letem Nogud Samting Go Ahed

Sapos olsem, nogud samting start kam from wea? No forget, samfala wea againstim God olketa stap—main wan nao “datwan wea olketa kolem Devil and Satan, wea hem trikim olketa man long earth.” (Revelation 12:9) God putim firstfala parents bilong iumi, Adam and Eve, long wanfala world wea no garem trabol. Bat Satan mekem Eve bilivim hao hem fit for garem living wea moabeta sapos hem no stap anda long rul bilong God. (Genesis 3:1-5) Sorre nao, Eve bilivim laea bilong Satan and no obeyim God. Adam join witim hem long disfala bighed fasin. Wanem nao kamaot from datwan? Bible sei: “Dae hem kasem evri man.”—Romans 5:12.

Winim wei for kwiktaem finisim Satan and olketa follower bilong hem for stopem disfala bighed fasin, God disaed for letem samfala taem for go pas. Wanem nao bae kamaot from datwan? Wanfala samting, hem bae showimaot klia Satan hem man for laea! Hem bae showimaot moa pruv hao wei for independent from God no givim eni gud samting bat spoelem man nomoa. Datwan nao samting wea really happen! “Full world hem stap long paoa bilong wicked wan.” (1 John 5:19) Nara samting moa, “man hem bossim man and spoelem hem.” (Ecclesiastes 8:9) Olketa religion bilong man fulap long olketa teaching wea no agree witim each other. Saed long fasin barava go daon kasem lalas namba. Olketa gavman bilong man traem evrikaen wei for rul. Olketa saenem olketa agreement and mekem olketa law, bat nating satisfaem need bilong evri pipol kam kasem distaem. Olketa war mekem wei for safa kamap moa and moa big.

Hem klia tumas, iumi needim God for duim samting and finisim evribit nogud fasin! Bat diswan bae happen long taem wea God nomoa markem. Go kasem datfala taem, hem privilege bilong iumi for sapotim rul bilong God long wei for obeyim olketa law and principle bilong hem insaed Bible. Taem nogud samting happen, iumi savve kasem comfort long datfala trufala hope for laef insaed wanfala world wea free from trabol.

No Iuseleva Nomoa

Nomata olsem, taem iumiseleva kasem barava nogud samting, iumi maet ask, ‘Why nao hem kasem mi?’ Aposol Paul remindim iumi, hao hem no iumiseleva nomoa kasem olketa barava nogud samting hia. Paul talem hao “evri creation go ahed for krae tugeta and feel pain tugeta kam kasem distaem.” (Romans 8:22) For savve long diswan bae helpem iu for deal witim wei for safa. Olsem example, Nicole barava feel nogud long datfala attak wea olketa terrorist duim long September 11, 2001, long New York City and Washington, D.C. Hem sei: “Mi barava seke fogud and fraet tumas.” Bat taem hem read abaotem wei wea olketa nara Christian deal witim datfala trabol, tingting bilong hem change nao.b “Mi luksavve hem no miseleva. Isisi wei wea mi feel nogud tumas and sorre start for kamap gud.

Samfala taem, wise samting hem for luk aotem samwan for story long hem—mami or dadi, wanfala mature fren, or wanfala Christian elder. For feel free for talemaot feeling bilong iu long samwan wea iu trustim bae mekem iu kasem “gudfala toktok” bilong encouragement. (Proverbs 12:25) Wanfala young Christian long Brazil ting go bak: “Dadi bilong mi hem dae naenfala year go finis, and mi savve hao wanday Jehovah bae resurrectim hem. Bat samting wea helpem mi nao, mi raetem long buk evri feeling bilong mi. And tu, mi storyim feeling bilong mi long olketa Christian fren bilong mi.” Waswe, iu garem eni ‘tru fren’ wea iu savve story gud witim hem? (Proverbs 17:17) Then mekius long loving help bilong olketa! No fraet for krae or talemaot feeling bilong iu. Nomata Jesus tu “start for krae” taem wanfala fren bilong hem dae!—John 11:35.

Bible promisim iumi hao taem bae kam wea iumi bae “kamap free from wei for slave bilong sin” and enjoyim “datfala nambawan freedom olsem olketa pikinini bilong God.” (Romans 8:21) Go kasem datfala taem, planti gud pipol maet kasem wei for safa. Hem comfortim iumi for savve why olketa nogud samting olsem kamap—and bae hem klosap finis nao.

[Footnote]

[Piksa long page 14]

Maet for storyim sorre feeling bilong iu bae helpem iu