Tingting Bilong Bible
Waswe, Man Fit for Winim Olketa Nogud Wei Bilong Hem?
WANFALA man for raet, Mark Twain, talem fani toktok olsem: “For lusim wei for smoke hem wanfala barava isi samting. Mi savve bikos mi duim diswan staka taem finis.” For sure staka pipol savve minim toktok wea Twain talem. Olketa maet barava luksavve samfala wei wea olketa followim hem no stret and savve spoelem man, bat olketa savve tu hao wei for stap klia long hem and for winim hem hard samting. Olketa wei bilong wanfala man savve kamap strong bihaen planti year and savve barava hard for changem. For trae bossim olketa kaen feeling olsem savve mekem man barava taed and feel nogud tumas tu.
Doctor Anthony Daniels, wea waka long wanfala prison, hem sei hao olketa wea duim rong, evritaem talem olketa no fit for winim datfala tingting and feeling wea kontrolem olketa. Taem man start for depend evribit long samting, olketa sei, “hem insaed long barava nogud samting wea forcem hem for duim samting, wea hem no fit for winim.” Sapos datwan hem tru, iumi bae no garem blame taem iumi duim nogud samting for satisfaem rongfala feeling bilong iumi. Bat waswe, hem tru iumi no fit for winim olketa samting wea muvim iumi and olketa feeling bilong iumi for wantem samting? Or, waswe, iumi savve winim olketa nogud wei bilong iumi? For kasem stretfala ansa, iumi lukim wanem Bible talem.
Samting Iumi Wantem Difren From Samting Iumi Duim
Bible talemaot klia hao iumi mas ansa long God for olketa samting iumi duim. (Romans 14:12) And tu, iumi mas followim olketa raeteous standard bilong hem. (1 Peter 1:15) From hem Creator, hem savve best samting for iumi, and olketa principle bilong hem againstim planti nogud wei bilong olketa long world. (1 Corinthians 6:9, 10; Galatians 5:19-21) Nomata olsem, hem minim and no expectim olketa man wea no perfect for duim samting wea olketa no fit for duim.—Psalm 78:38; 103:13, 14.
Man wea raetem psalm talem olsem: “Sapos olketa mistek nao samting wea iu luk aotem, O Jah, O Jehovah, hu nao savve standap?” (Psalm 130:3) Jehovah savve evribit hao “heart bilong man hem saedem nogud samting start kam from taem hem young.” (Genesis 8:21) Fasin wea iumi kasem from parents, olketa wik point bilong iumi, and olketa samting wea iumi kasem bifor mekem hem hard for iumi stopem evri nogud tingting and feeling. Dastawe, long loving wei, Jehovah nating askem iumi for duim samting long perfect wei.—Deuteronomy 10:12; 1 John 5:3.
Nomata olsem, wei wea God kaen long iumi hem no mekem iumi free from responsibility bilong iumi for bossim olketa nogud feeling. Nomata hem talemaot hao hemseleva faet againstim olketa nogud feeling, aposol Paul nating givap. (Romans 7:21-24) Hem sei: “Mi whipim body bilong mi and leadim olsem wanfala slave.” Hao nao olsem? Mekem nogud “miseleva nao duim samting wea mekem God no appruvim mi.” (1 Corinthians 9:27) Tru nao, wei for garem fasin for kontrolem seleva hem barava important mekem iumi faet againstim rong feeling and wei bilong iumi and mekem iumi winim olketa evribit.
Iumi Fit for Change
Olketa scientist wea studyim fasin bilong man talem hao nogud fasin, olsem gudfala fasin tu, hem samting wea man isisi lanem. Sapos datwan hem stret, then iumi fit for lane for lusim nogud wei bilong iumi! Long wanem wei? Olketa wea raetem wanfala buk abaotem wei for deal witim hevi, sei olsem: “Tingim olketa gud samting wea bae iu kasem from wei for lusim old wei bilong iu.” Then, “mekem wanfala list bilong olketa wei wea laef bilong iu bae kamap moabeta sapos iu changem fasin bilong iu.” Tru nao, wei for tingim olketa gud samting wea iumi savve kasem taem iumi changem olketa nogud wei bilong iumi savve muvim iumi for change.
Tingim kaonsel bilong aposol Paul for iumi ‘kamap niu long paoa wea muvim mind bilong iumi.’ (Ephesians 4:22, 23) Datfala paoa hem main tingting wea kontrolem evri samting wea iumi duim. Iu savve kamap niu long datfala paoa long wei for kam klos long God and long wei for mekem grow wei for luksavve and tinghae long olketa mark bilong hem. Wei wea iu savve iu mekem Jehovah hapi bae muvim iu for changem samfala samting wea iu need for changem.—Psalm 69:30-33; Proverbs 27:11; Colossians 1:9, 10.
Bat, for trae changem olketa nogud wei wea bossim laef bilong iumi for planti year bae barava hard. Iumi shud no ting smol long faet bilong iumi for againstim nogud wei bilong iumi. Samfala taem iumi maet bakslaed and fail. Bat iu savve sure hao gogo olketa samting savve start for kamap moa isi. Wei wea iu go ahed for trae hard bae isisi mekem niu fasin kamap really wei bilong iu.
Man wea lovem God savve kasem tu help and blessing bilong God. Paul promis olsem: “God hem faithful, and hem bae no letem eni temptation kasem iufala wea iufala no fit for winim, bat . . . hem bae mekem wei for iufala savve stand strong.” (1 Corinthians 10:13) Klosap nao, Jehovah God bae finisim evribit disfala wicked system witim evri temptation bilong hem and samting wea hem laekem. (2 Peter 3:9-13; 1 John 2:16, 17) Evri man wea no perfect wea winim disfala samting wea bae happen bae kasem healing evribit long evri kaen problem for olowe—saed long body, mind and feeling. God hem promis: “Olketa samting bilong bifor bae no kamap moa long mind, and hem bae no kamap moa long heart.” (Isaiah 65:17) Iumi sure hao olketa nogud samting wea heart laekem and aftarem tu bae insaed “olketa samting bilong bifor.” Diswan hem nambawan reason for iumi traem best bilong iumi distaem for faet againstim olketa nogud wei.
[Piksa long page 19]
LUSIM NOGUD WEI
1. Luksavve hao iu garem samfala nogud wei. Askem iuseleva, ‘Waswe, mi kasem gud samting from disfala wei bilong mi? Waswe, hem mekem narawan feel nogud? Waswe,hem affectim health bilong mi, selen, gudfala living, famili, or peace long mind? Laef bilong mi bae hao sapos mi lusim diswan?’
2. Changem nogud wei witim gud wan. Olsem example, waswe, iu iusim staka taem long Internet, maet for lukluk long olketa samting wea no fitim? Sapos olsem, markem datfala taem for readim samting wea fitim, duim study, or exercise.
3. Chekim wei wea iu muv ahed. Long each day for tu thri minute lukluk long hao iu muv ahed. Sapos iu duim bak sem samting, trae for minim wanem nao lead go long datwan.
4. Askem help bilong olketa narawan. Talem olketa fren and famili hao iu trae for lusim disfala nogud wei, and askem olketa for talem iu taem olketa lukim iu klosap for duim moa. Story witim olketa narawan wea barava win for lusim datfala sem nogud wei.—Proverbs 11:14.
5. Garem balance tingting and no expectim samting wea no fitim. No expectim bae iu win long datwan kwiktaem. Samfala wei wea iumi garem for planti year finis bae hem no isi for iumi lusim kwiktaem.
6. Prea long God. Witim help bilong God iu savve lusim eni nogud wei.—Psalm 55:22; Luke 18:27.