Taem iu savve long wanem kaen man nao iu, iu fit for winim bigfala test
OLKETA YOUNG WAN
9 Iu Wanem Kaen Man
WANEM HEM MINIM
Samting wea mekem pipol savve long iu, hem no just nem and lukluk bilong iu. Hem samting iu tinghae long hem, wanem iu bilivim, and olketa wei bilong iu. Evri samting hia showimaot iu wanem kaen man and hao iu difren from olketa narawan.
WHY HEM IMPORTANT
Taem iu savve gud long iuseleva and wanem kaen man nao iu, bae iu no fraet for duim stret samting and bae iu no duim nomoa wanem olketa nara young wan laekem.
“Staka pipol olketa olsem bigfala dole wea werem kaleko for advertise long stoa. Olketa narawan nao chusim kaleko for olketa dole hia werem, no olketa seleva.”—Adrian.
“Nomata hem no isi samfala taem, mi lane for no fraet for duim stret samting. Wanem olketa narawan duim and hao mi act taem mi stap witim olketa helpem mi for luksavve sapos olketa hia really fren bilong mi.”—Courtney.
BIBLE PRINCIPLE: “No gohed followim wei bilong pipol long disfala world. Changem wei bilong iufala long wei for changem tingting.”—Rome 12:2.
WANEM IU SAVVE DUIM
Trae for luksavve iu wanem kaen man distaem, and iu laek for kamap wanem kaen man. Samting wea bae helpem iu for duim diswan, hem nao for ting raonem wanem nao olketa gudfala wei bilong iu, olketa wik point bilong iu, and wanem iu sure long hem. Ting raonem olketa kwestin hia.
Olketa gudfala wei bilong iu: Wanem nao samfala samting wea mi savve hao for duim? Wanem nao olketa gudfala wei bilong mi? (Olsem example: Waswe, mi followim taem? kontrolem miseleva? waka hard? kaen?) Wanem nao samfala gud samting wea mi duim?
GUD SAMTING FOR DUIM: Waswe, hem hard for iu tingim eni gud samting wea iu duim? Askem parents or wanfala fren bilong iu for talem wanem nao samfala gudfala wei bilong iu.
BIBLE PRINCIPLE: “Man mas lukluk gud long wanem hemseleva duim, then bae hem hapi long wanem hem duim. Hem shud no comparem wanem hem duim witim wanem narawan duim.” —Galatia 6:4.
Olketa wik point bilong iu: Wanem nao samfala gudfala wei wea mi mas waka hard for kamap gud long hem? Olketa wanem samting nao savve switim mi for duim samting wea no stret? Wanem nao mi mas waka hard long hem for kontrolem miseleva?
BIBLE PRINCIPLE: “Sapos iumi sei: ‘Iumi no garem sin,’ iumi laea long iumiseleva.”—1 John 1:8.
Wanem iu sure long hem: Olketa wanem standard nao mi garem, and why nao olsem? Waswe, mi biliv long God? Wanem nao mekem mi barava sure God hem stap? Wanem nao pipol duim wea mi tingse hem no stret? Waswe, mi barava sure long samting wea bae happen long future?
BIBLE PRINCIPLE: “Gudfala tingting, hemi save lukaftarem yu, an wei fo save mining blong olketa samting, hemi save helpem yu.”—Provebs 2:11.