Wat Nao Stress?

Taem man stress, datwan savve affectim body blo hem. Brain bae sendem staka hormone lo olketa difren part lo body. Datwan savve mekem heart beat fast, hae blood, brith fast, and olketa masol for taet. Stress mekem body redi for duim samting. Bihaen samting wea kosim stress hem finis, then body hem go bak normal.

GUD STRESS AND NOGUD STRESS

Taem man mas deal witim eni hard samting or feisim danger, hem normal for stress bikos hem helpem man for deal witim datwan. Stress hem start lo brain. Gudfala stress helpem man for kwiktaem duim samting. Datwan savve helpem man tu for kasem goal blo hem or for duim gud wanfala samting, maet lo exam, interview for waka, or pleim sports.

Bat stress savve spoelem man sapos hem gohed for longfala taem. Sapos man stress olowe, gogo maet hem affectim body, feeling, and tingting blo hem. Maet hem changem tu wei blo man and hao hem treatim narawan. Man wea stress tumas savve mekem hem for start duim samfala nogud samting olsem for drinkim tumas alcohol, iusim drug, and ova tumas lo kaikai for deal witim stress blo hem. Gogo stress savve lead go lo wei for man kasem depression, feel taed olowe, or laek for suisaed.

Hao stress affectim each wan hem difren, bat hem savve kosim staka difren kaen sik. And hem savve affectim klosap evri part blo body.