Olketa Teaching wea Givim Hope

God Bae Finisim Nogud Pipol

“Olketa nogud pipol save grouap gudfala olsem gras, an olketa wea i duim olketa nogud samting olketa save garem gudfala laef long disfala wol, bat, bae . . . olketa finis.”​—SAMS 92:7.

Olsem iumi lanem lo article bifor diswan, olketa nogud wei blo pipol hem gohed for kamap moa worse. Iumi shud no sapraes lo diswan bikos Bible talem finis lo 2 Timothy 3:1-5 dat lo “olketa last day” wei blo pipol bae nogud tumas. Last day blo wat? Blo olketa pipol wea no obeyim God. Klosap nao God bae finisim olketa wea no laek for changem nogud wei blo olketa. Then, olketa gud pipol wea obeyim God nomoa bae stap. “Bae olketa stretfala pipol i onam lan wea [Jehovah] hemi bin promisim fo olketa, an bae olketa stap long hem olowe.”—Sams 37:29.

God Bae Finisim Satan

“God wea givim peace bae . . . finisim Satan.”​—ROME 16:20.

Taem Satan and olketa demon blo hem bae finis, peace bae kamap evriwea lo earth. Creator blo iumi hem talem disfala promis: “Bae no eniwan save mekem [iu] fo fraet moa.”—Maeka 4:4.

God Bae Finisim Sik and Dae

“Tent bilong God hem stap witim olketa man . . . Hem bae draem evri tias long eye bilong olketa. No eniwan bae dae and no enitaem bae pipol sorre or krae or feelim pain tu.”​—REVELATION 21:3, 4.

Wei for safa and sik bae finis bikos God bae finisim evri nogud samting wea kamap from wanem Satan, and Adam and Eve duim. And hem bae finisim tu evri nogud samting wea kamaot from wei wea iumi no perfect. Nomata dae tu bae finis. Olketa wea lovem and obeyim Creator bae stap for olowe. Bat wat taem nao bae olketa kasem diskaen laef?

Creator blo Iumi Bae Mekem Earth Kamap Paradaes

“Wanfala taem wea bae hemi kam, olketa drae eria bae i hapi tumas, an plande flaoa bae hemi grou long ples wea no eniwan hemi stap long hem.”​—AESAEA 35:1.

Taem God finisim olketa nogud pipol, earth bae kamap paradaes! Earth bae garem olketa park and naesfala garden, and hem bae garem staka kaikai. (Sams 72:16) Sea, olketa lake, and river bae klin and fulap witim olketa samting wea laef. Disfala toktok “pollution” bae nomoa nao! Pipol bae garem haos wea olketa seleva nao buildim. And no eniwan bae hangere, poor, or no garem ples for stap.—Aesaea 65:21, 22.

God Bae Mekem Olketa wea Dae for Laef Bak

“God bae mekem pipol . . . for laef bak.”​—ACTS 24:15.

Waswe, iu laek for lukim olketa wea iu lovem wea dae finis? Olmaeti God bae resurrectim olketa for laef bak lo Paradaes earth. Bae iu fit for luksavve lo olketa and olketa bae luksavve lo iu tu. Tingim hapi blo iu, and hapi blo olketa! Why nao iumi fit for trustim dat disfala hope bae kamap tru? Bikos Bible storyim hao samfala man, woman, and pikinini tu laef bak and stap moa witim famili blo olketa. And tu, staka taem wea Jesus resurrectim olketa wea dae, staka pipol nao lukim taem diswan hem happen.—Luke 8:49-56; John 11:11-14, 38-44.