Hao Nao Technology Affectim Hao Iu Fren Witim Narawan?
Distaem hem isi tumas for tufala pipol wea stap lo tufala difren kantri for story lo each other, bikos lo texting, email, videoconferencing, and social media. Taem olsem, technology hem wanfala usefull wakaman.
Bat, pipol wea iusim tumas technology for mek-fren . . .
staka taem no tingim feeling blo frens blo olketa.
isi for feel lonely and no satisfae.
tingting tumas abaotem olketa seleva winim wei for tingim narawan.
SAMTING IU NEED FOR SAVVE
TINGIM FEELING
For tingim feeling blo narawan hem minim iumi need for slow daon and patient witim narawan. Diswan maet lelebet hard for duim sapos social media post staka tumas and pipol savve text fast tumas.
Sapos gogo technology hem kontrolem iu, wei for ansarem message blo frens blo iu bae hem kamap samting wea iu mas duim nomoa. Bae goal blo iu hem for just ansarem nomoa evri message, winim wei for givim taem for helpem wanfala fren.
SAMTING FOR TINGIM: Hao nao iu savve tingim feeling blo frens taem iu iusim technology for story witim olketa?—1 PETER 3:8.
FEEL LONELY
Lo wanfala research, olketa faendaot staka pipol feel daon tumas bihaen olketa lukluk lo wanfala lo olketa popular social media. Olketa wea duim research sei wei for lukluk lo olketa piksa and update blo olketa narawan, savve mekem man for “feel olsem hem no duim eni gud samting nomoa.”
And tu, wei for lukluk lo olketa interesting photo blo narawan and comparem witim olketa seleva, hem mekem man for garem negative tingting. Worse moa, bae man tingse laef blo evriwan nao gud, bat laef blo hem boring nomoa.
SAMTING FOR TINGIM: Wat nao iu savve duim for no comparem iuseleva witim olketa narawan lo social media?—GALATIA 6:4.
TINGIM SELEVA TUMAS
Wanfala teacher lukim dat samfala student blo hem savve laekem nomoa olketa frens wea followim olketa, and olketa savve ting olsem “bae mi ganga nomoa witim olketa wea bae sapotim mi.”a Kaen wei for ting olsem, hem showimaot olketa tingim seleva nomoa. Gogo man savve ting lo olketa frens blo hem olsem app wea hem iusim and then deletem nomoa taem hem no needim.
SAMTING FOR TINGIM: Waswe, samting wea iu postim online hem showimaot iu laek compete or iu tingim iuseleva tumas?—GALATIA 5:26.
WAT IU SAVVE DUIM
LUKLUK GUD LO HAO IU IUSIM TECHNOLOGY
Taem technology hem wakaman blo iu bat no boss blo iu, hem bae helpem iu for story witim olketa frens and bae iu fren gud witim olketa.
BIBLE PRINCIPLE: “Man wea garem love . . . no tingim hemseleva nomoa.”—1 CORINTH 13:4, 5.
Chusim olketa idea wea iu laek for followim, or raetem daon own idea blo iu.
Story witim narawan (winim wei for text message or email nomoa)
Leavim phone (or putim lo silent) taem iu story witim olketa narawan
Katdaon lo haomas taem iu spendem for scroll thru lo social media
Kamap samwan wea laek for lisin
Contactim wanfala fren wea kasem hard taem
a Report lo buk Reclaiming Conversation.