Why Hem Important for Savve lo Ansa
Why nao hem important for savve sapos Creator hem stap? Sapos olketa pruv hia mekem iu sure dat olmaeti God hem stap, waswe, iu laek for lukim olketa pruv wea showim dat Bible kam from hem? Sapos iu trustim wat Bible talem, then iu bae kasem olketa gud samting hia.
Laef blo iu bae garem mining
BIBLE SEI: “[God] givim rain for iufala and mekem garden bilong iufala barava grow gud. Hem givim staka kaikai and mekem iufala hapi.”—Acts 14:17.
WAT NAO DATWAN MINIM: Evri samting wea iu enjoyim lo world, hem present from Creator. And iu bae barava tinghae go moa lo olketa present hia taem iu luksavve dat Creator wea givim olketa samting hia hem lovem iu.
Kasem olketa best advaes for helpem iu
BIBLE SEI: “Lisin long mi, an bae yu save wanem hemi gud an stret, an wanem hemi stret fo duim.”—Provebs 2:9.
WAT NAO DATWAN MINIM: From God creatim iu, hem savve lo wat iu needim for gohed hapi. Taem iu studyim Bible, iu bae lanem olketa leson wea savve helpem iu distaem.
Kasem ansa for olketa kwestin blo iu
BIBLE SEI: “Bae iu faendem savve blo God.”—Proverbs 2:5, NWT.
WAT NAO DATWAN MINIM: Taem iu savve dat Creator hem stap, datwan bae helpem iu for kasem ansa for olketa important kwestin olsem: Why nao iumi laef? Why nao wei for safa hem kamap big tumas? Wat nao happen taem iumi dae? Bible savve helpem iu for kasem ansa wea bae mekem iu satisfae.
Iu bae garem hope for future
BIBLE SEI: “Mi talem yufala tru nao. Yufala mas save dat mi mekem finis gudfala plan fo yufala. Mi laek fo yufala stap gudfala olowe, mekem trabol no save kasem yufala. Mi laekem yufala fo trastem mi fo mekem laef blong yufala fo kamap gudfala moa.”—Jeremaea 29:11.
WAT NAO DATWAN MINIM: God promisim dat lo future hem bae finisim evri nogud samting, and wei for safa, and dae tu. Taem iu trustim olketa promis hia, datwan bae helpem iu for no fraet for feisim olketa problem wea iu kasem evriday.