From Creation Go Kasem Flood

Wea nao skae and earth kam from? Hao nao sun, moon and olketa star, and plande narafala samting long earth kamap? Bible givim trufala ansa taem hem sei God nao wakem olketa. So buk bilong iumi start witim olketa Bible story abaotem creation.

Olketa firstfala samting wea God wakem, hem olketa spirit man olsem hemseleva. Olketa hia angel. Bat hem wakem earth for pipol olsem iumi. So God wakem man and woman, Adam and Eve, and putim olketa insaed long wanfala naesfala garden. Bat olketa no obeyim God so olketa no fit for gohed for stap laef.

From start long taem wea God wakem Adam go kasem bigfala Flood, hem 1,656 year. Insaed long disfala taem, plande nogud pipol stap. Long heven, olketa spirit wea man no savve lukim olsem Satan and olketa nogud angel bilong hem stap. Long earth, Cain and plande narafala nogud pipol stap, and samfala barava strongfala man tu. Bat gudfala pipol tu stap long earth long datfala taem—Abel, Enoch and Noah. Long Part WAN iumi bae read abaotem olketa pipol hia and samting wea happen.