Moses Hitim Ston

PLANDE year go pas—10 year, 20 year, 30 year, 39 year! And olketa Israelite still stap long wilderness. Bat long evri year hia, Jehovah hem lukaftarem pipol bilong hem. Hem feedim olketa witim manna. Hem leadim olketa long daytaem witim wanfala cloud, and long naetaem witim fire. And insaed long evri year hia kaleko bilong olketa no brek and leg bilong olketa no garem soa.

Distaem hem firstfala month bilong mek-40 year from taem wea olketa lusim Egypt. Olketa Israelite camp moa long Kaʹdesh. Diswan nao ples wea olketa stap taem olketa sendem 12-fala spae go long land bilong Caʹnaan 40-fala year bifor. Sista bilong Moses, Mirʹi·am, hem dae long Kaʹdesh. And olsem bifor, trabol hem kamap.

Olketa pipol no savve faendem eni wata. So olketa komplen long Moses: ‘Hem moabeta sapos mifala dae finis. Why nao iu bringim mifala aot from Egypt long disfala rabis ples wea no eni samting savve grow? No eni wheat, fig, grape, or pomegranate. No eni wata tu for drink.’

Taem Moses and Aaron go long tabernacle for prea, Jehovah talem Moses: ‘Hipimap olketa pipol tugeta. Then front long evriwan, tok long datfala ston long there. Inaf wata bae kamaot for olketa pipol and evri animal bilong olketa.’

So Moses hipimap olketa pipol, and sei: ‘Lisin, iufala wea nating trustim God! Waswe, mitufala Aaron mas aotem wata from disfala ston for iufala?’ Then Moses hitim ston hia witim wanfala stik tufala taem and bigfala wata kamaot from datfala ston. Inaf wata hem kamaot for evri pipol and animal for drinkim.

Bat Jehovah hem kros witim Moses and Aaron. Waswe, iu savve why? Hem from Moses and Aaron sei olketa nao bae mekem wata kamaot from datfala ston. Bat really, Jehovah nao duim datwan. And from Moses and Aaron no talem tru samting abaotem diswan, Jehovah sei hem bae panisim olketa. Hem sei: ‘Iu bae no leadim pipol bilong mi go insaed long Caʹnaan.’

No longtaem bihaen, olketa Israelite lusim Kaʹdesh. Then olketa kasem Maunt Hor. Long there, antap long datfala maunten, Aaron hem dae. Hem 123 year taem hem dae. Olketa Israelite feel sorre tumas, so for 30 day evri pipol olketa krae for Aaron. Son bilong hem E·le·aʹzar nao kamap nextfala hae priest for nation bilong Israel.