Jonah and Datfala Big Fish

LUKIM disfala man insaed long sea. Hem kasem bigfala trabol nao, iaman? Datfala fish redi for swallowim hem! Iu savve hu nao disfala man? Nem bilong hem Joʹnah. Why nao hem insaed bigfala trabol hia?

Joʹnah hem wanfala profet bilong Jehovah. No longtaem bihaen profet E·liʹsha hem dae, Jehovah sei olsem long Joʹnah: ‘Go long bigfala taon bilong Ninʹe·veh. Nogud fasin bilong pipol long there hem big tumas, and mi wantem iu for tok long olketa abaotem diswan.’

Bat Joʹnah no want for go. So hem go insaed wanfala ship wea bae go long ples wea farawe from Ninʹe·veh. Jehovah hem no hapi long Joʹnah from hem ranawe olsem. So Hem mekem wanfala big wind kamap. Wind hem big fogud and luk olsem ship maet sink daon nao. Olketa man wea waka long ship olketa fraet fogud, and singaot for god bilong olketa helpem olketa.

Gogo Joʹnah talem olketa: ‘Mi worshipim Jehovah, God wea wakem skae and earth. And mi ranawe from samting wea Jehovah talem mi for duim.’ So olketa askem hem: ‘Wanem nao mifala shud duim long iu for stopem disfala big wind?’

Joʹnah hem sei: ‘Torowem mi go insaed long sea, and sea bae kwaet moa.’ Olketa man hia no want for duim diswan, bat taem big wind hia hem kamap moa worse olketa torowem go Joʹnah long sea. Stretawe big wind hia hem finis, and sea hem kwaet moa.

Taem Joʹnah sink go daon insaed long wata, bigfala fish hia swallowim hem. Bat hem no dae. For thrifala day and thrifala naet hem stap insaed long bele bilong fish. Joʹnah hem sorre tumas from hem no obeyim Jehovah and go long Ninʹe·veh. So waswe, iu savve wanem nao hem duim?

Joʹnah prea long Jehovah for helpem hem. Then Jehovah mekem disfala fish toroaotem Joʹnah long drae ples. Bihaen, Joʹnah hem go long Ninʹe·veh. Diswan teachim iumi hao hem important tumas for iumi duim samting wea Jehovah talem, iaman?