Chapter 13
Why Living wea Followim God Bringim Hapi
1. Why nao yumi savvy say way bilong Jehovah hem bringim hapi?
JEHOVAH hem “hapi God,” and hem wantim yu for enjoyim laef. (1 Timothy 1:11) Taem yu wakabaot followim way bilong hem, yu savvy kasem gudfela samting and bigfela peace wea stap olawe, olsem wanfela river wea ran olawe. Way for wakabaot followim way bilong God hem muvim man tu for go ahed for duim olketa raeteous samting, “olsem olketa wave long sea.” Diswan bringim trufela hapi.—Isaiah 48:17, 18.
2. Hao nao olketa Kristian savvy hapi nomata samfela taem pipol deal withim them long no gud way?
2 But samfela maet say, ‘Samfela taem pipol suffer from they duim stretfela samting.’ Datwan hem tru, and hem nao samting wea happen long olketa aposol bilong Jesus. But, nomata they kasem persecution, they hapi and go ahed for “talemaot gud nius abaotem Kraest.” (Acts 5:40-42) Yumi savvy learnim samfela important samting from diswan. Wanfela nao hem way wea living bilong yumi wea followim God hem no meanim pipol bae deal withim yumi long gudfela way everytaem. “Tru nao,” aposol Paul raet olsem, “everywan wea laek for live long way for love-im God and Kraest Jesus bae kasem persecution tu.” (2 Timothy 3:12) Diswan kamap bikos Satan and world bilong hem they againstim olketa wea garem living wea followim God. (John 15:18, 19; 1 Peter 5:8) Trufela hapi hem no depend long samting wea happen raonem yumi. But, hem kamaot from way for barava believe hao samting wea yumi duim hem stret and God hem hapi long yumi.—Matthew 5:10-12; James 1:2, 3; 1 Peter 4:13, 14.
3. Hao nao worship bilong Jehovah mas affectim laef bilong man?
3 Samfela pipol ting say God savvy hapi long them sapos samfela taem they duim samting for show aot they love-im God but long otherfela taem, they forgetim hem. Trufela worship bilong Jehovah God hem no olsem. Hem samting wea affectim fashion bilong man everyday, every year. Dastawe they kolem diswan “Datfela Way.” (Acts 19:9; Isaiah 30:21) Way for garem living wea followim God hem meanim yumi mas talem and duim samting wea fitim Word bilong God.
4. Why nao hem gud for change-im samfela samting wea yumi duim bifor mekem yumi live followim olketa way bilong God?
4 Taem olketa niufela student bilong Bible they luksavvy hao they need for change-im samfela samting long living bilong them for mekem Jehovah hapi, they maet ting olsem, ‘Waswe, living wea followim God bae barava helpem mi?’ Yes hem bae barava olsem. Why? Bikos “God hem love,” so olketa way bilong hem bae barava helpem yumi. (1 John 4:8) God hem wise tu and savvy wanem nao best for yumi. From Jehovah God hem olmaeti, hem savvy strongim yumi long way wea yumi want for mekem hem hapi and finis for duim no gud samting. (Philippians 4:13) Letem yumi tingting raonem samfela principle bilong living wea followim God and hao way for followim them bae bringim hapi.
HONEST FASHION BRINGIM HAPI
5. Wanem nao Bible talem abaotem fashion for liar and steal?
5 Jehovah hem “God bilong truth.” (Psalm 31:5) Tru nao, yu want for followim example bilong hem and kamap man wea talem trufela samting. Honest fashion hem mekem man respectim seleva and garem gudfela feeling. But from fashion for no honest hem big tumas insaed disfela world, olketa Kristian need for rememberim diswan: “Each wan mas talem trufela samting withim neibor bilong hem . . . Letem man wea steal no duim moa, but letem hem duim hard work . . . mekem hem fit for givim samting long samwan wea needim.” (Ephesians 4:25, 28) Olketa Kristian wea work for shilling they honest taem they work everyday. Sapos boss bilong them no letem, they no tekem olketa samting bilong hem. Nomata long work, long skul, or long haos, man wea worshipim Jehovah mas ‘honest long every samting.’ (Hebrews 13:18) God hem no hapi long anywan wea garem fashion for liar or steal.—Deuteronomy 5:19; Revelation 21:8.
6. Hao nao honest fashion bilong man wea followim God hem givim glory long Jehovah?
6 Honest fashion hem bringim planti blessing. Selina hem wanfela poor widow woman from Africa wea love-im Jehovah God and olketa raeteous principle bilong hem. Wan day, hem faendem wanfela basket wea garem passbuk and bigfela shilling insaed. From hem use-im telephone buk, hem faendem owner—wanfela stoakeeper wea samwan stealim shilling bilong hem. Man hia hem sapraes for gud taem Selina, nomata hem sik, visitim hem and givim back every samting wea stap long datfela basket. “Honest fashion olsem fit for kasem reward,” hem say and then hem givim Selina samfela shilling. Samting wea moa important, datfela man hem praisim religion bilong Selina. Yes, way for duim samting long honest way hem mekem teaching bilong Bible luk gud tumas, hem givim glory long Jehovah God, and hem bringim hapi long olketa worshiper bilong hem wea honest.—Titus 2:10; 1 Peter 2:12.
FASHION FOR GIVE HEM BRINGIM HAPI
7. Wanem nao rong withim way for gamble?
7 Hapi savvy kamaot from fashion for give, but olketa greedy pipol bae no “kasem kingdom bilong God.” (1 Corinthians 6:10) Wanfela part bilong greedy fashion hem way for gamble, wea hem way for trae for kasem shilling from pipol wea lus long play. Jehovah no hapi long olketa wea “greedy for kasem shilling long way wea no honest.” (1 Timothy 3:8) Nomata way for gamble hem samting wea law letem and man duim diswan for hapitaem nomoa, hem savvy kamap man wea kanduit for leavim disfela play, and hem mek hae long samting wea spoelem living bilong planti pipol. Planti taem man wea gamble bringim problem long famili bilong hem, from they maet garem lelebet shilling nomoa for buyim samting wea they needim olsem kaikai and kaleko.—1 Timothy 6:10.
8. Hao nao Jesus showim aot gudfela example for givim samting, and hao nao yumi savvy garem fashion for give?
8 From they willing for givim samting, olketa Kristian feel hapi taem they helpem other pipol, main wan nao olketa brata bilong them wea garem need. (James 2:15, 16) Bifor Jesus kam long earth, hem lukim fashion bilong God for givim samting long man. (Acts 14:16, 17) Jesus seleva givim taem, savvy, and laef bilong hem tu for olketa man. So hem barava fit for say: “Hapi wea kamap from fashion for givim samting hem winim hapi wea kamap taem man kasem samting.” (Acts 20:35) Jesus hem praisim tu poorfela widow woman wea willing for putim tufela small shilling long contribution box long temple, from hem givim “full living bilong hem.” (Mark 12:41-44) Olketa Israelite bifor and olketa Kristian long first century showim aot example for hapi for givim material samting for supportim kongregeson and Kingdom work. (1 Chronicles 29:9; 2 Corinthians 9:11-14) Withim material contribution wea they givim, olketa Kristian distaem hapi for offerim praise long God and use-im laef bilong them long service bilong hem. (Romans 12:1; Hebrews 13:15) Jehovah blessim them from they use-im taem, strong, and other samting, olsem shilling, for supportim tru worship and helpem work for preachim gud nius bilong Kingdom everywea long world.—Proverbs 3:9, 10.
OTHERFELA SAMTING WEA BRINGIM HAPI
9. Wanem nao rong withim way for drinkim tumas alcohol?
9 For stap hapi, olketa Kristian mas ‘guardim tingting bilong them’ tu. (Proverbs 5:1, 2) Hem meanim they mas readim and ting raonem Word bilong God and olketa gudfela Bible pablikeson. But they mas stap klia long samfela samting. For example, way for drinkim tumas alcohol savvy mekem man no bossim tingting bilong hem. Taem tingting bilong them hem olabaot, planti savvy duim dirty fashion, raf samting, and mekem accident kamap wea savvy killim dae man. Dastawe Bible say anywan wea savvy drunk bae no kasem Kingdom bilong God! (1 Corinthians 6:10) From they want for “garem gudfela tingting,” olketa trufela Kristian stap klia long way for drunk, and diswan helpem them for hapi.—Titus 2:2-6.
10. (a) Why nao olketa Kristian no use-im tobacco? (b) Wanem nao olketa gudfela samting wea kamaot from way for lusim samfela samting wea hard for lusim?
10 Body wea klin hem help for mekem man hapi. Nomata olsem, planti pipol kanduit for lusim way for use-im samfela samting wea savvy spoelem body. For example, tingim way for use-im tobacco. World Health Organization hem say way for smoke “killim dae three million pipol every year.” Hem hard for lusim fashion for smoke from man savvy feel olsem hem sik taem hem stop for smoke. Long narasaed, planti pipol wea smoke bifor they luksavvy hao distaem they garem beta health and moa shilling for buyim samting wea they needim. Tru nao, way for lusim tobacco or otherfela samting wea savvy spoelem body bae help for mekem man garem klinfela body, kliafela conscience, and trufela hapi.—2 Corinthians 7:1.
HAPI INSAED LONG MARIT
11. Wanem nao man need for duim for garem marit wea fitim saed bilong law and wea garem honor for olawe?
11 Olketa wea stap tugeta olsem hasband and waef mas mek sure they registerim marit bilong them long gavman. (Mark 12:17) And tu, they need for ting long marit olsem wanfela barava important responsibility. Hem tru, samfela maet need for separate sapos hasband hem barava nating supportim waef and pikinini long physical saed, hem olawe killim waef and pikinini, or hem stopem every bit way for kasem spiritual samting. (1 Timothy 5:8; Galatians 5:19-21) But toktok bilong aposol Paul long 1 Corinthians 7:10-17 hem encouragim olketa marit partner for stap tugeta. But, for kasem trufela hapi, they mas faithful long each other. Paul hem raet: “Marit mas garem honor midlwan long everywan, and marit bed mas klin every bit, from God bae judge-im olketa wea duim fornication and adultery.” (Hebrews 13:4) Datfela toktok “marit bed” hem meanim way for havem sex midlwan long man and woman wea marit long each other. No any otherfela way for havem sex, olsem way for maritim planti waef, hem “garem honor midlwan long everywan.” And tu, Bible hem againstim way for havem sex bifor marit and homosexual fashion.—Romans 1:26, 27; 1 Corinthians 6:18.
12. Wanem nao samfela no gud samting wea kamaot from fornication?
12 Fornication savvy mekem man hapi for lelebet taem, but hem no givim trufela hapi. Hem samting wea God no hapi long hem and savvy spoelem conscience bilong man. (1 Thessalonians 4:3-5) Sorry samting wea kamaot from dirty fashion hem AIDS and otherfela kaen sik. Wanfela medical report hem say: “Every year winim 250 million pipol everywea long world kasem gonorrhoea, and samting olsem 50 million kasem syphilis.” Problem bilong way for babule nating hem kamap tu. International Planned Parenthood Federation hem say, raonem world, winim 15 million girl wea age bilong them midlwan long 15 and 19 they babule each year, and wanfela long every threefela hia they killim dae baby insaed long bele. Wanfela report hem showim aot hao long wanfela kantri long Africa, 72 percent long olketa young girl wea dae hem from problem wea kamap taem they killim dae baby insaed long bele. Samfela wea duim fornication maet no garem sik or no babule but they kanduit for ranawe from hao diswan hem spoelem feeling bilong them. Planti they lusim way for respectim seleva and they hate-im themseleva tu.
13. Wanem nao samfela problem moa wea kamaot from adultery, and wanem samting nao stap front long olketa wea go ahed for duim fornication and adultery?
13 Nomata man savvy forgivim partner wea duim adultery, diswan hem faondeson for divorce wea fitim Scripture, sapos partner wea no duim rong hem decide olsem. (Matthew 5:32; lukim Hosea 3:1-5.) Taem dirty fashion olsem mekem marit finis, diswan savvy barava spoelem feeling bilong partner wea no duim rong and olketa pikinini. For helpem olketa man, Word bilong God say strongfela judgment bae kasem olketa wea duim fornication and adultery and wea no repent. And tu, hem show aot olketa wea go ahed for duim dirty fashion “bae no kasem kingdom bilong God.”—Galatians 5:19, 21.
“NO PART BILONG WORLD”
14. (a) Wanem nao samfela different way for worshipim idol wea man wea followim God mas stap klia from them? (b) John 17:14 and Isaiah 2:4 talem wanem samting for guide-im yumi?
14 Olketa wea want for mekem Jehovah hapi and enjoyim olketa blessing bilong Kingdom mas stap klia long fashion for worshipim idol. Bible hem show aot hem rong for mekem and worshipim olketa image, olsem image bilong Kraest, and tu mami bilong Jesus, Mary. (Exodus 20:4, 5; 1 John 5:21) So, olketa trufela Kristian no worshipim olketa piksa, cross, and image. They stap klia tu long olketa different kaen way for worshipim idol wea man no luksavvy long hem, olsem way for worshipim flag and singim song wea mek hae long olketa nation. Taem pipol trae for force-im them for duim olketa samting olsem, they tingim toktok bilong Jesus long Satan: “Yu mas worshipim Jehovah, God bilong yu, and yu mas duim holy service long hem nomoa.” (Matthew 4:8-10) Jesus say olketa follower bilong hem they “no part bilong world.” (John 17:14) Diswan meanim for no saed withim anywan long politik and for stap long peace for fitim samting wea Isaiah 2:4 hem talem: “Hem [Jehovah God] bae judge-im olketa nation and stretem olketa pipol. And they bae hammerim sword bilong them for kamap samting for digim graon and spear bilong them for workim samting for katem tree. Nation bae no savvy holem sword moa for againstim narafela nation, and bae they no learnim war moa.”
15. Wanem nao Babylon the Great, and wanem nao planti niufela Bible student they duim for go aot from hem?
15 For “no part bilong world” hem meanim tu for lusim every samting wea join withim “Babylon the Great,” world rul bilong giaman religion. Worship wea no klin hem kamaot from Babylon bifor and go-go hem spoelem pipol long spiritual way everywea long world. Insaed long “Babylon the Great” hem every religion wea teaching and samting wea they duim no followim savvy bilong God. (Revelation 17:1, 5, 15) No any faithful worshiper bilong Jehovah bae join withim otherfela religion or duim spiritual samting withim any part bilong Babylon the Great. (Numbers 25:1-9; 2 Corinthians 6:14) Dastawe planti niufela Bible student sendem leta long religion bilong them for talem them hao they lusim church bilong them. Diswan mekem them kamap moa klos long trufela God, from hem promis finis: “ ‘Go aot from midlwan long them, and separate-im yufela seleva,’ Jehovah hem say, ‘and no touchim moa samting wea no klin’; ‘and mi bae acceptim yufela.’ ” (2 Corinthians 6:17; Revelation 18:4, 5) Waswe, way wea Father bilong yumi long heven hem acceptim yumi hem samting wea yumi barava wantim?
TINGTING GUD LONG OLKETA HOLIDAY
16. Why nao olketa trufela Kristian no celebrate-im Krismas?
16 Living wea followim God hem planti taem mekem yumi free from hevi bilong way for celebrate-im olketa holiday bilong world. For example, Bible hem no showim aot barava day wea Jesus hem born. ‘Mi ting Jesus hem born long December 25!’ samfela pipol maet say. Diswan hem kanduit for tru bikos hem dae long spring bilong 33 C.E., taem hem 33 1/2 year. And tu long taem wea hem born, olketa shepherd they “stap aotsaed and they luk aftarem olketa sheepsheep bilong them.” (Luke 2:8) Long land bilong Israel, end bilong December hem coldfela taem wea hem rain tumas and pipol putim olketa sheepsheep insaed for protectim them from cold. But, December 25 hem day wea olketa bilong Rome markem olsem birthday bilong sun god bilong them. Planti hundred year bihaen Jesus hem stap long earth, olketa apostate Kristian start for keepim disfela day for celebrate-im birthday bilong Kraest. Dastawe, olketa trufela Kristian no celebrate-im Krismas or any otherfela holiday wea garem faondeson long giaman samting wea olketa religion believim. From they worshipim Jehovah nomoa, they no keepim tu olketa holiday wea mek hae long any man wea sin or olketa nation.
17. Why nao pipol wea followim God no celebrate-im olketa birthday, and nomata olsem why nao olketa Kristian pikinini they hapi?
17 Bible hem story abaotem tufela birthday nomoa, they birthday bilong tufela man wea no servim God. (Genesis 40:20-22; Matthew 14:6-11) From Bible no showim aot day wea perfect man Jesus Kraest hem born, why nao yumi mas keepim birthday bilong olketa man wea no perfect? (Ecclesiastes 7:1) Tru nao, dadi and mami wea followim God they no waitim wanfela spesel day for showim love long pikinini bilong them. Wanfela 13-year-old Kristian girl say: “Mi and famili bilong mi havem planti hapitaem. . . . Mi barava klos long dadi and mami bilong mi, and taem otherfela pikinini askim mi abaotem why nao mi no celebrate-im olketa holiday, mi talem them hao mi ting hae long every day.” Wanfela young Kristian wea 17 year hem say: “Long haos bilong mifela, mifela savvy givim present long each other planti taem.” Moa hapi hem kamap taem man givim present from hem want for givim.
18. Wanem nao Jesus komandim olketa follower bilong hem for keepim every year, and diswan mekem yumi rememberim wanem samting?
18 For olketa wea lukaotem living wea followim God, wanfela spesel day every year nao they mas keepim. Hem nao Evening Kaikai bilong Lord, wea planti taem they kolem Memorial bilong dae bilong Kraest. Jesus komandim olketa follower bilong hem olsem: “Go ahed for duim olsem for rememberim mi.” (Luke 22:19, 20; 1 Corinthians 11:23-25) Taem Jesus startim disfela kaikai long naet bilong Nisan 14, 33 C.E., hem use-im bred wea no garem yeast and red wine, wea piksarem body bilong hem olsem man wea no garem sin and perfect blood bilong hem. (Matthew 26:26-29) Olketa Kristian wea holy spirit bilong God anointim they kaikaim bred and drinkim wine. They insaed long wanfela niufela covenant and covenant for Kingdom, and they garem hope for go long heven. (Luke 12:32; 22:20, 28-30; Romans 8:16, 17; Revelation 14:1-5) Nomata olsem, everywan wea hipap long evening wea fitim Nisan 14 long kalenda bilong olketa Jew bifor, kasem gudfela samting. Hem mekem them rememberim love wea Jehovah and Jesus Kraest showim aot long ransom sakrifaes wea coverim sin and wea mekem pipol wea God hapi long them kasem laef olawe.—Matthew 20:28; John 3:16.
WORK FOR SHILLING AND HAPITAEM
19. Wanem kaen challenge nao olketa Kristian face-im long work bilong them for shilling?
19 Olketa trufela Kristian mas work hard for kasem samting wea they needim. Taem olketa famili hed duim diswan, hem mekem them feel satisfy. (1 Thessalonians 4:11, 12) But, sapos work for shilling bilong wanfela Kristian hem againstim samting wea Bible talem, diswan bae no mekem hem hapi. Samfela taem hem hard for wanfela Kristian for faendem work for shilling wea fitim olketa mark bilong Bible. For example, samfela boss askim man wea work for them for giamanim otherfela pipol. Long narasaed, planti boss willing for change for saed bilong conscience bilong workman wea honest, from they no want for lusim datfela workman wea honest. But, nomata wanem samting happen, yu savvy sure hao God bae blessim way wea yu trae hard for garem work for shilling wea mekem yu garem klinfela conscience.—2 Corinthians 4:2.
20. Why nao yumi mas choosim gud hapitaem bilong yumi?
20 From God wantim olketa servant bilong hem for hapi, yumi need for balance-im hard work withim samfela hapitaem for rest and strongim yumi. (Mark 6:31; Ecclesiastes 3:12, 13) World bilong Satan hem mek hae long hapitaem wea no followim God. But for mekem God hapi, yumi mas choosim gud olketa buk wea yumi readim, radio program and music wea yumi herem, and movie and video wea yumi lukim. Sapos hapitaem wea yumi choosim bifor hem againstim olketa warning bilong olketa scripture olsem Deuteronomy 18:10-12, Psalm 11:5, and Ephesians 5:3-5, yumi bae mekem Jehovah hapi and yumi bae moa hapi sapos yumi change.
RESPECT FOR LAEF AND BLOOD
21. Hao nao way wea yumi respectim laef hem affectim tingting bilong yumi abaotem way for killim dae baby insaed long bele, and samting wea yumi duim long living?
21 For kasem trufela hapi, yumi need for ting long laef bilong man olsem holy samting, olsem Jehovah tu hem tingim. Word bilong hem tambuim yumi for killim dae narafela man. (Matthew 19:16-18) Tru nao, Law bilong God for Israel show aot hao hem ting long baby insaed bele bilong mami olsem laef wea garem hae price—no samting for killim dae. (Exodus 21:22, 23) Yumi mas no ting long laef olsem samting nating long way for use-im tobacco, spoelem body withim drug or alcohol, or duim danger samting. And yumi mas no join tu insaed any samting wea savvy mekem laef bilong yumi stap long danger or no obeyim instruction for protectim yumi, wea maet mekem yumi guilty long blood.—Deuteronomy 22:8.
22. (a) Wanem nao tingting bilong God long blood and way for use-im? (b) Blood bilong hu nomoa savvy barava sevem man?
22 Jehovah talem Noah and famili bilong hem abaotem way wea blood hem stand for soul, or laef. Dastawe God tambuim them for kaikaim any blood. (Genesis 9:3, 4) From yumi kam from them, datfela law hem fitim yumi tu. Jehovah talem olketa Israelite hao they mas kapsaetem blood long graon and no use-im for any samting. (Deuteronomy 12:15, 16) And law bilong God long blood hem kamap moa taem olketa Kristian long first century kasem disfela instruction: “Go ahed for stap klia . . . from blood.” (Acts 15:28, 29) From they respectim way wea laef hem holy, olketa pipol wea followim God no acceptim blood transfusion, nomata sapos otherfela pipol say diswan bae sevem laef bilong them. Olketa Jehovah’s Witness acceptim samfela medicine wea no use-im blood. Olketa medicine hia helpem them and they no mekem man stap long olketa danger wea kamaot from blood transfusion. Olketa Kristian savvy blood wea Jesus givim nomoa hem savvy barava sevem man. Way for show aot faith long datwan bae bringim way for forgive and hope bilong laef olawe.—Ephesians 1:7.
23. Wanem nao samfela reward for garem living wea followim God?
23 Tru nao, for garem living wea followim God hem needim hard work. Diswan maet mekem olketa famili member and fren mek funny long yu. (Matthew 10:32-39; 1 Peter 4:4) But reward bilong living olsem hem winim any test wea man kasem. Hem mekem man garem klinfela conscience and givim gudfela way for kampani withim otherfela worshiper bilong Jehovah. (Matthew 19:27, 29) And tu, tingim laef olawe insaed raeteous niu world bilong God. (Isaiah 65:17, 18) Bigfela hapi hem kam from way for followim kaonsel bilong Bible and mekem heart bilong Jehovah hapi! (Proverbs 27:11) Dastawe living wea followim God hem bringim hapi!—Psalm 128:1, 2.
TESTIM SAVVY BILONG YU
Wanem nao samfela reason wea mekem living wea followim God hem bringim hapi?
Living wea followim God meanim man maet need for change-im wanem samting?
Why nao yu want for garem living wea followim God?
[Piksa long page 124, 125]
Way for balance-im spiritual samting withim samfela hapitaem mekem olketa wea followim God kasem hapi