Famili wea Garem Dadi or Mami Nomoa Savvy Win!

1-3. Wanem nao mekem namba bilong olketa famili wea garem dadi or mami nomoa kamap moa big? Hao nao diswan affectim olketa wea insaed long famili olsem?

OLKETA famili wea garem dadi or mami nomoa, they nao “kaen famili wea kamap staka tumas” long United States. Sem samting hem happen tu long planti otherfela kantri. Bigfela namba bilong divorce, way for lusim partner, separate, and way for bornim pikinini but no marit, they barava affectim planti million dadi, mami, and pikinini.

² “Mi wanfela 28-year-old widow woman wea garem tufela pikinini,” wanfela single mami hem raet. “Mi feel sorry tumas from mi no want for luk aftarem tufela pikinini bilong mi withim no eni dadi. Mi feel olsem no eniwan hem care for mi tu. Olketa pikinini bilong mi lukim mi krae planti taem and diswan affectim them.” For join withim olketa feeling for kros, feel guilty, and feel lonely, planti single mami or dadi face-im challenge for work for shilling and for duim olketa work long haos. Wanfela hem say olsem: “Taem iu wanfela single dadi or mami hem olsem iu duim planti different samting long semtaem. Bihaen lelebet longtaem, iu savvy nao wanem for duim. But sek nomoa, narafela niu samting kamap moa!”

³ Olketa young wan insaed famili wea garem dadi or mami nomoa they planti taem garem problem tu. Maet they mas deal withim olketa strongfela feeling wea kamap taem sek nomoa dadi or mami lusim them or hem dae. For planti young wan, taem dadi or mami no stap, diswan barava affectim them long no gud way.

4. Hao nao iumi savvy Jehovah hem care for olketa famili wea garem dadi or mami nomoa?

⁴ Olketa famili wea garem dadi or mami nomoa they stap long taem bilong Bible. Planti taem olketa Scripture tok abaotem “boy wea no garem dadi” and “widow woman.” (Exodus 22:22; Deuteronomy 24:19-21; Job 31:16-22) Jehovah God hem luksavvy long problem bilong them. Man for raetem psalm hem kolem God “dadi bilong olketa boy wea no garem dadi and judge bilong olketa widow woman.” (Psalm 68:5) Yes, Jehovah hem still care for olketa famili distaem wea garem dadi or mami nomoa! Tru nao, Word bilong hem garem olketa principle wea savvy helpem them for win.

HAO FOR DUIM GUD OLKETA WORK LONG HAOS

5. Wanem problem nao olketa single dadi or mami bae face-im firstaem?

⁵ Tingim way for duim olketa work long haos. “Planti taem samting kamap wea mekem iu ting hem bae gud tumas sapos hasband hem stap,” wanfela woman wea divorce hem say, “olsem taem roof long haos hem leak and iu no savvy hao for fixim.” Long sem way tu, olketa man wea just divorce or kamap widow man maet no savvy wanem for duim bikos they mas duim planti different kaen work long haos. For olketa pikinini, taem evri samting long haos hem olabaot diswan mekem way wea they no feel safe hem kamap moa big.

6, 7. (a) Wanem nao nambawan example bilong “gudfela waef” wea Proverbs story abaotem? (b) Hao nao way for work hard long olketa work raonem haos hem helpem olketa famili wea garem dadi or mami nomoa?

⁶ Wanem nao savvy help? Tingim example bilong “gudfela waef” wea Proverbs 31:10-31 hem story abaot. Hem savvy duim planti samting—baem and sellim samting, sewing, kuki, baem land, work long farm, and luk aftarem bisnis. Wanem nao secret bilong hem? Hem work hard, work go kasem naet and hem wekap early for startim olketa work bilong hem. And hem organize gud tu, share-im aot olketa work bilong hem and luk aftarem otherfela pipol. Dastawe hem kasem praise!

⁷ Sapos iu wanfela single dadi or mami, trae hard long olketa work bilong iu long haos. Showim aot iu hapi long work wea iu duim, from diswan bae mekem hapi bilong olketa pikinini bilong iu kamap moa big. But, iu mas plan gud and organize. Bible hem say: “Olketa plan bilong man wea work hard bae kasem gudfela samting.” (Proverbs 21:5) Wanfela single dadi say: “Mi no savvy ting abaotem wanem for kaikaim go kasem taem mi hangre.” But way for planim wanem for kaikaim savvy help for readyim kaikai wea moa healthy and taste gud winim kaikai wea man kwiktaem nomoa for kukim. Maet iu need tu for learn for duim olketa niufela samting. Taem they askim olketa fren wea savvy, readim samfela buk, and askim pipol wea garem savvy, samfela single mami savvy duim samfela work for fixim haos.

8. Hao nao olketa pikinini wea garem dadi or mami nomoa savvy help long haos?

⁸ Waswe, hem gud for askim olketa pikinini for helpem iu? Wanfela single mami hem say: “From dadi bilong olketa pikinini hem no stap, mi want for mekem hem moa easy for olketa pikinini.” Datwan hem tru but bae hem no helpem pikinini. Olketa pikinini wea fraet long God long taem bilong Bible they garem work for duim. (Genesis 37:2; Song of Solomon 1:6) So, nomata iu mas lukaot for no putim tumas hevi long olketa pikinini bilong iu, hem wise sapos iu markem samfela work for they duim olsem for wasim olketa plate and keepim room bilong them klin. Waswe sapos iufela duim samfela work tugeta? Iufela savvy barava enjoyim datwan.

CHALLENGE BILONG WAY FOR KASEM SHILLING

9. Why nao olketa single mami they kasem hardfela taem long saed bilong shilling planti taem?

⁹ Planti single dadi or mami faendem hem hard for kasem shilling for olketa samting wea they needim, main wan nao olketa young mami wea no marit.a Long samfela kantri wea they savvy kasem help from gavman, maet hem wise for kasem help from diswan, go kasem taem they faendem work for shilling. Bible hem letem olketa Kristian for kasem olketa help olsem sapos they needim. (Romans 13:1, 6) Olketa widow woman and olketa wea divorce kasem semkaen challenge. Planti long them, taem they mas start for work moa for shilling bihaen planti year wea they stap long haos, savvy faendem nomoa work wea kasem smallfela pei. Samfela trae for mekem living bilong them kamap beta taem they joinim olketa program for kasem moa training long work or they duim shortfela course long skul.

10. Hao nao single mami savvy meanim long olketa pikinini bilong hem, why hem mas faendem work for shilling?

¹⁰ No sapraes sapos olketa pikinini bilong iu they no hapi taem iu lukaotem work for shilling, and iu mas no feel guilty. But, meanim long them why iu mas work, and helpem them for luksavvy Jehovah nao askim iu for provide-im samting for them. (1 Timothy 5:8) Go-go bae they change for acceptim diswan. Nomata olsem, trae hard for spendem planti taem withim them for fitim busy schedule bilong iu. Sapos iu givim loving care olsem, diswan savvy help long taem famili hem short long shilling.—Proverbs 15:16, 17.

HU NAO LUK AFTAREM FAMILI?

11, 12. Wanem nao olketa mark wea single dadi or mami mas followim, and hao nao they savvy duim olsem?

¹¹ Planti taem single dadi or mami they barava klos long olketa pikinini bilong them, but they mas careful for followim olketa mark bilong God for dadi and mami and olketa pikinini. For example, bigfela problem savvy kamap sapos wanfela single mami hem wantim son bilong hem for karem olketa responsibility olsem hed bilong haos or hem talem evri problem bilong hem long dota bilong hem and diswan putim hevi long disfela girl. Hem no gudfela samting for duim bikos they no ready for diswan and maet hem mekem pikinini konfius.

¹² Helpem pikinini bilong iu for savvy iu nao dat wan wea bae luk aftarem hem—and no hem nao for luk aftarem iu. (Lukim 2 Corinthians 12:14.) Samfela taem, iu maet needim advice or support. Askim diswan from olketa Kristian elder or maet from wanfela mature Kristian woman, no from olketa small pikinini bilong iu.—Titus 2:3.

GO AHED FOR GIVIM DISCIPLINE

13. Wanem problem long saed bilong discipline nao wanfela single mami maet face-im?

¹³ Maet hem no hard tumas for wanfela man for givim discipline, but wanfela woman maet garem problem long diswan. Wanfela single mami hem say: “Olketa son bilong mi garem body and voice bilong full-grown man. Samfela taem toktok bilong mi hem sound olsem mi no sure or no strong.” And tu, maet iu still feel sorry from partner wea iu love-im hem dae, or maet iu still feel guilty or kros from marit bilong iu hem brek daon. Sapos iu and partner bilong iu bifor share for luk aftarem olketa pikinini, maet iu fraet nogud pikinini bilong iu bae want for stap withim hem. Olketa samting olsem savvy mekem hem hard for balance long way for givim discipline.

14. Hao nao single dadi or mami savvy garem balance tingting abaotem discipline?

¹⁴ Bible hem say “wanfela boy wea they letem hem for followim tingting bilong hemseleva bae mekem mami bilong hem feel shame.” (Proverbs 29:15) Iu garem Jehovah God wea supportim iu for mekem olketa rul insaed long famili, so no letem way for feel guilty, feel sorry, or feel fraet for daonem iu. (Proverbs 1:8) No hafhaf long olketa Bible principle. (Proverbs 13:24) Trae for garem gudfela tingting, followim rul wea no olabaot, and strong. Go-go, olketa pikinini bae followim. But, iu mas tingim tu feeling bilong olketa pikinini bilong iu. Wanfela single dadi hem say: “Discipline wea mi givim hem mas balance withim feeling wea they garem from they just lusim mami bilong them. Mi story withim them long evri chance wea mi garem. Mifela garem ‘taem wea mifela feel klos’ olsem taem for readyim evening kaikai tugeta. Long taem hia nao they talem planti samting long mi.”

15. Wanem nao dadi or mami wea divorce mas no duim taem hem story abaotem partner bilong hem bifor?

¹⁵ Sapos iu divorce, bae iu no kasem eni gudfela samting sapos iu daonem respect bilong olketa pikinini for partner bilong iu bifor. Taem dadi and mami argue olawe, diswan hem mekem olketa pikinini feel pain and bae hem mekem olketa no respectim iu tufela tu. So, no talem olketa toktok olsem: “Iu kranky olsem dadi bilong iu!” Nomata datfela partner bilong iu bifor hem mekem iu feel pain tumas, hem still dadi or mami bilong pikinini bilong iu, wea needim love, care, and discipline bilong dadi and mami bilong hem.b

16. Wanem spiritual samting nao mas kamap main part bilong discipline insaed famili wea garem dadi or mami nomoa?

¹⁶ Olsem iumi story abaot finis long olketa otherfela chapter, discipline meanim way for givim training and instruction, no just for givim panis. Iu savvy misstim planti problem sapos iu garem gudfela program for givim spiritual training. (Philippians 3:16) Way for attendim olketa Kristian meeting evritaem hem barava important. (Hebrews 10:24, 25) And tu way for havem famili Bible study evri week. Hem tru, hem no easy for duim study olsem evritaem. “Bihaen iu work for full day, iu barava want for rest,” wanfela mami hem talem. “But mi prepare-im mind bilong mi for study withim dota bilong mi, from mi savvy mi need for duim. Hem really enjoyim famili study bilong mi tufela!”

17. Wanem nao iumi savvy learnim from gudfela way wea they teachim fren bilong Paul, Timothy?

¹⁷ Fren bilong aposol Paul, Timothy, hem kasem training long olketa Bible principle from mami and granmami bilong hem—but no from dadi bilong hem. But, Timothy hem kamap wanfela nambawan Kristian! (Acts 16:1, 2; 2 Timothy 1:5; 3:14, 15) Iu tu savvy hope for gudfela samting sapos iu trae hard for teachim olketa pikinini bilong iu long “discipline bilong Jehovah.”—Ephesians 6:4.

WINIM FAET AGAINSTIM WAY FOR FEEL LONELY

18, 19. (a) Single dadi or mami savvy feel lonely long wanem way? (b) Wanem kaonsel nao savvy help for bossim olketa samting wea body wantim?

¹⁸ Wanfela single mami hem say: “Taem mi kam back long haos and lukim empty haos, and diswan hem really tru taem olketa pikinini sleep finis, mi barava feel lonely.” Yes, way for feel lonely hem planti taem bigfela problem wea wanfela single dadi or mami hem face-im. Hem fasin bilong man for laekem way for fren tugeta and way for klos long narawan insaed long marit. But waswe, man mas trae for winim disfela problem nomata wanem diswan leadim hem for duim? Long taem bilong aposol Paul, samfela youngfela widow woman letem “feeling bilong them long saed bilong sex hem strong winim feeling for Kraest.” (1 Timothy 5:11, 12) For letem olketa samting wea body wantim for winim olketa spiritual samting bae bringim no gud samting.—1 Timothy 5:6.

¹⁹ Wanfela Kristian man hem say: “Olketa feeling long saed bilong sex they barava strong, but iu savvy bossim them. Taem wanfela tingting kam long mind bilong iu, iu mas no tingting strong long hem. Iu mas aotem. Sapos iu ting long pikinini bilong iu, diswan bae helpem iu tu.” Word bilong God givim disfela kaonsel: ‘Killim dae olketa part bilong body bilong iufela long way for wantim sex.’ (Colossians 3:5) Sapos iu want for killim dae feeling bilong iu for wantim kaikai, waswe, bae iu readim olketa magasin wea garem piksa bilong nicefela kaikai, or waswe, bae iu kampani withim pipol wea story abaotem kaikai evritaem? No moa nao! Hem semsem long saed bilong olketa samting wea body wantim.

20. (a) Wanem danger nao stap for olketa wea fren withim olketa wea no believe? (b) Hao nao olketa single wan long first century and distaem tu they faetem feeling for lonely?

²⁰ Samfela Kristian they lukaotem partner wea no believe. (1 Corinthians 7:39) Waswe, datwan fixim problem bilong them? No moa nao. Wanfela Kristian woman wea divorce hem talem disfela warning: “Wanfela samting nao hem moa worse winim way for stap single. Hem nao for maritim rong person!” Hem tru, olketa Kristian widow woman long first century they savvy feel lonely planti taem tu, but olketa wea wise they go ahed for busy for ‘givim kaikai long olketa stranger, wasim leg bilong olketa holy wan, and helpem olketa wea kasem trabel.’ (1 Timothy 5:10) Olketa faithful Kristian distaem wea wait for planti year for wanfela partner wea fraet long God they go ahed for busy long sem way tu. Wanfela 68-year-old Kristian widow woman hem start for visitim olketa otherfela widow taem hem feel lonely. Hem say: “Mi faend aot taem mi go visit olsem, duim olketa work bilong mi long haos and luk aftarem spiritual saed bilong mi, mi no garem taem for feel lonely.” Way for teachim otherfela pipol abaotem Kingdom bilong God hem barava gudfela work.—Matthew 28:19, 20.

21. Long wanem way nao prea and way for kampani withim gudfela pipol savvy help for deal withim way for feel lonely?

²¹ Tru nao, no eni samting savvy kwiktaem finisim way for feel lonely. But withim strong from Jehovah man savvy stand strong. Kristian savvy kasem strong olsem taem hem “go ahed for askim God and prea naet and day.” (1 Timothy 5:5) Way for ask hia hem for barava ask strong, maet withim way for krae tu. (Lukim Hebrews 5:7.) Way for talemaot evri problem long Jehovah long “naet and day” savvy barava help. And tu, for kampani withim gudfela pipol savvy help for deal withim way for feel lonely. Taem man kampani withim gudfela pipol, hem savvy kasem “gudfela toktok” bilong encouragement wea Proverbs 12:25 hem story abaot.

22. Wanem nao samfela samting for rememberim wea bae help taem way for feel lonely kamap moa samfela taem?

²² Sapos way for feel lonely kamap moa samfela taem remember hao no eniwan garem living wea no garem eni problem. Yes, “evri brata long world” they suffer long samfela way. (1 Peter 5:9) No tingting abaotem samting wea happen bifor. (Ecclesiastes 7:10) Tingim olketa gudfela samting wea iu kasem distaem. Main samting, decide strong for stap faithful and for mekem heart bilong Jehovah hapi.—Proverbs 27:11.

WAY WEA OTHERFELA PIPOL SAVVY HELP

23. Wanem responsibility nao olketa Kristian brata and sista garem for olketa single dadi or mami insaed long kongregeson?

²³ Support and help bilong olketa otherfela Kristian hem nambawan samting. James 1:27 say: “Disfela way for worship wea klin front long God and Father bilong iumi hem olsem: for luk aftarem olketa pikinini wea no garem dadi and mami and olketa widow woman wea kasem hardfela taem.” Yes, olketa Kristian garem responsibility for helpem olketa famili wea garem single dadi or mami. Wanem nao samfela gudfela way for duim diswan?

24. Wanem nao samfela way for helpem olketa famili wea garem dadi or mami nomoa, wea garem need?

²⁴ Help long material way. Bible hem say: “Sapos eniwan hem garem samting bilong disfela world and hem lukim brata bilong hem short long samting but hem nating feel sorry and care long hem, waswe, love bilong God hem stap long hem?” (1 John 3:17) Greek word for “lukim” hem no meanim for lukluk long samting lelebet taem nomoa, but for mean for lukluk. Diswan meanim wanfela kaenfela Kristian hem mas firstaem savvy long living bilong wanfela famili and olketa samting wea they needim. Maet they needim lelebet shilling. Samfela maet needim help for fixim olketa samting long haos. Or maet they bae ting hae long way for pipol invitim them long haos for kaikai or for havem hapitaem.

25. Hao nao olketa Kristian brata and sista savvy showim aot fasin for feel sorry long olketa single dadi or mami?

²⁵ And tu, 1 Peter 3:8 say: “Evriwan long iufela mas garem wan mind, show aot feeling long each other, show aot love olsem brata, garem fasin for feel sorry and care long each other.” Wanfela single mami wea garem sixfela pikinini hem say: “Hem hard tumas and samfela taem mi feel weak daon. But, samfela taem wanfela brata or sista savvy say long mi: ‘Joan, mi lukim iu duim gudfela work. Bae iu kasem gudfela samting long end.’ Taem iu savvy otherfela pipol ting abaotem iu and care, diswan hem samting wea barava help.” Olketa olo Kristian woman savvy barava helpem olketa young single mami, long way for listen long them taem they garem olketa problem wea maet hem hard for story abaotem withim wanfela man.

26. Hao nao olketa mature Kristian man savvy helpem olketa pikinini wea no garem dadi?

²⁶ Olketa Kristian man savvy help long otherfela way. Raeteous man Job hem say: “Mi savvy sevem . . . boy wea no garem dadi and eniwan wea no garem samwan for helpem hem.” (Job 29:12) Samfela Kristian man distaem tu interest long gudfela way long olketa pikinini wea no garem dadi and showim aot really “love wea kamaot from klinfela heart,” no from they garem eni rongfela tingting. (1 Timothy 1:5) Long way for no forgetim famili bilong olketa seleva, they maet arrange for work withim young wan olsem samfela taem long Kristian ministry and maet invitim hem tu for share long famili study or hapitaem. Kaenfela fasin olsem savvy sevem wanfela pikinini wea no garem dadi for no followim badfela way.

27. Wanem support nao olketa single dadi or mami savvy kasem?

²⁷ But hem tru, olketa single dadi or mami mas ‘karem hevi bilong themseleva,’ hem nao responsibility bilong them. (Galatians 6:5) Nomata olsem, they savvy kasem love from olketa Kristian brata and sista and Jehovah God. Bible say olsem abaotem hem: “Hem helpem olketa boy wea no garem dadi and olketa widow woman.” (Psalm 146:9) Withim loving support bilong Hem, olketa famili wea garem dadi or mami nomoa savvy win!