Leson 7

Kam Klosap Long God Thru Long Prea

Why nao hem important for prea evritaem? (1)

Hu nao iumi mas prea long hem, and long wanem way? (2, 3)

Wanem samting nao hem stret for prea abaotem? (4)

Wanem taem nao iu mas prea? (5, 6)

Waswe, God herem evri prea? (7)

1. Prea hem way for story long God long humble way. Iu mas prea long God evritaem. Then iu savvy kam klosap long hem olsem wanfala gudfala fren. Jehovah hem barava hae tumas and garem bigfala paoa, but hem savvy herem prea bilong iumi! Waswe, iu savvy prea long God evritaem?​—⁠Psalm 65:2; 1 Thessalonians 5:⁠17.

2. Prea hem part long worship bilong iumi. Dastawe, iumi mas prea nomoa long God, Jehovah. Taem Jesus stap long earth, hem prea evritaem long Father bilong hem, no long eniwan moa. Iumi tu mas olsem. (Matthew 4:10; 6:⁠9) But, iumi mas talem evri prea bilong iumi insaed long nem bilong Jesus. Diswan show aot iumi respectim position bilong Jesus and garem faith long ransom sakrifaes bilong hem.​—⁠John 14:6; 1 John 2:​1, 2.

3. Taem iumi prea, iumi mas story long God from heart bilong iumi. Iumi mas no talem sem toktok olowe long prea bilong iumi or read from wanfala prea buk. (Matthew 6:​7, 8) Iumi savvy prea long eni position wea showim aot respect, long enitaem, and long eni ples. God savvy herem tu prea wea iumi talemaot insaed long heart bilong iumi. (1 Samuel 1:​12, 13) Hem gud for faendem wanfala kwaet ples wea no eniwan stap for iumi prea seleva.​—⁠Mark 1:⁠35.

4. Wanem kaen samting nao iu savvy prea abaotem? Eni samting wea maet affectim way wea iu fren withim hem. (Philippians 4:​6, 7) Datfala Lord’s prea show aot iumi mas prea abaotem nem and purpose bilong Jehovah. Iumi savvy ask tu for samting wea iumi needim long material way, for forgivim sin bilong iumi, and for helpem iumi for againstim test. (Matthew 6:​9-13) Iumi mas no prea long selfish way. Iumi mas prea for olketa samting wea fitim will bilong God nomoa.​—⁠1 John 5:⁠14.

5. Iu savvy prea long enitaem wea heart bilong iu muvim iu for say thankiu or praisim God. (1 Chronicles 29:​10-13) Iu mas prea taem iu garem problem and taem faith bilong iu kasem test. (Psalm 55:22; 120:⁠1) Hem fitim for iu prea bifor iu kaikai. (Matthew 14:19) Jehovah invaetem iumi for prea “long evri different kaen taem.”​—⁠Ephesians 6:⁠18.

6. Iumi barava need for prea sapos iumi duim bigfala sin. Long taem olsem iumi mas barava askim Jehovah for mercy and for forgivim iumi. Sapos iumi talemaot sin bilong iumi long hem and barava trae hard for no duim moa, God hem “ready for forgive.”​—⁠Psalm 86:5; Proverbs 28:⁠13.

7. Jehovah herem nomoa prea bilong raeteous pipol. For mekem God savvy herem prea bilong iu, iu mas barava trae hard for live followim olketa law bilong hem. (Proverbs 15:29; 28:⁠9) Iu mas humble taem iu prea. (Luke 18:​9-14) Iu need for duim samting followim wanem iu prea abaotem. Taem iu duim diswan, iu prove-im iu garem faith and iu barava believim samting wea iu talem. Long disfala way nomoa Jehovah bae ansarem prea bilong iu.​—⁠Hebrews 11:⁠6.