Leson 11
Olketa Belief and Kastom wea God No Laekem
Wanem kaen belief and kastom nao rong? (1)
Waswe, olketa Kristian mas believim God hem wanfala Trinity? (2)
Why nao olketa trufala Kristian no celebrate-im Krismas,Easter, or birthday? (3, 4)
Waswe, olketa wea dae finis savvy spoelem pipol wea laef yet? (5)
Waswe, Jesus dae long cross? (6)
Hao important nao way for mekem God hapi? (7)
1. No evri belief and kastom they no gud. But God no acceptim olketa sapos olketa kam from giaman religion or olketa againstim olketa teaching bilong Bible.—Matthew 15:6.
2. Trinity: Waswe, Jehovah hem wanfala Trinity—threefala man insaed long wanfala God? No moa! Jehovah, disfala Father, hem nao “only trufala God.” (John 17:3; Mark 12:29) Jesus hem firstborn Son bilong Hem, and hem stap under long God. (1 Corinthians 11:3) Father hem moa big winim Son. (John 14:28) Holy spirit hem no wanfala man; hem paoa bilong God for duim samting.—Genesis 1:2; Acts 2:18.
3. Krismas and Easter: Jesus no born long December 25. Hem born long samting olsem October 1, taem long year wea olketa shepherd savvy keepim sheepsheep bilong olketa aotsaed long naet. (Luke 2:8-12) Jesus nating talem olketa Kristian for celebrate-im birthday bilong hem. But, hem talem olketa disaepol bilong hem for rememberim dae bilong hem. (Luke 22:19, 20) Krismas and olketa kastom bilong hem kam from olketa giaman religion bilong bifor. Hem semsem tu withim olketa kastom bilong Easter, olsem way for iusim olketa egg and rabbit. Olketa firstfala Kristian nating celebrate-im Krismas or Easter, and olketa trufala Kristian distaem no celebrate-im tu.
4. Birthday: Tufala birthday nomoa wea Bible story abaotem hem bilong pipol wea no worshipim Jehovah. (Genesis 40:20-22; Mark 6:21, 22, 24-27) Olketa firstfala Kristian nating celebrate-im birthday. Disfala kastom for celebrate-im birthday hem kam from olketa giaman religion bilong bifor. Olketa trufala Kristian givim present and havem hapitaem tugeta long eni otherfala taem insaed long year.
5. Way for Fraetem Olketa wea Dae Finis: Olketa wea dae finis no savvy duim eni samting or feelim eni samting. Iumi kanduit helpem olketa, and olketa kanduit spoelem iumi. (Psalm 146:4; Ecclesiastes 9:5, 10) Soul savvy dae; hem no go ahed for laef bihaen man dae finis. (Ezekiel 18:4) But samfala taem olketa badfala angel, nem bilong them demon, liar for say olketa nao spirit bilong pipol wea dae finis. Eni kastom wea join withim way for fraetem or worshipim olketa wea dae finis hem rong.—Isaiah 8:19.
6. Cross: Jesus nating dae long wanfala cross. Hem dae long wanfala post, or stake. Greek word wea olketa transletem “cross” long planti Bible hem meanim wanfala piece timber nomoa. Saen bilong cross hem kam from olketa giaman religion bilong bifor. Olketa firstfala Kristian nating iusim or worshipim cross. So, waswe, iu ting hem stret for worshipim cross?—Deuteronomy 7:26; 1 Corinthians 10:14.
7. Maet hem hard tumas for lusim samfala belief and kastom olsem. Olketa relative and fren maet trae for force-im iu for no change-im olketa belief bilong iu. But way for mekem God hapi hem moa important winim way for mekem man hapi.—Proverbs 29:25; Matthew 10:36, 37.
[Piksa long page 22]
God hem no wanfala Trinity
[Piksa long page 23]
Krismas and Easter kam from olketa giaman religion bilong bifor
[Piksa long page 23]
No eni reason hem stap for worshipim or fraetem olketa wea dae finis