Leson 16

Way wea Iu Decide for Servim God

Wanem nao iu mas duim for kamap fren bilong God? (1, 2)

Hao nao iu mekem dedication long God? (1)

Wanem taem nao iu fit for baptaes? (2)

Hao nao iu savvy kasem strong for stap faithful long God? (3)

1. For kamap fren bilong God, iu mas kasem gudfala savvy long truth bilong Bible (1 Timothy 2:​3, 4), garem faith long olketa samting wea iu learnim finis (Hebrews 11:⁠6), repent from olketa sin bilong iu (Acts 17:​30, 31), and tan raon from way bilong iu bifor. (Acts 3:19) Then love bilong iu for God mas muvim iu for dedicate-im iuseleva long hem. Diswan meanim hao insaed long wanfala prea bilong iuseleva, iu talem hem hao iu givim iuseleva long hem for duim will bilong hem.​—⁠Matthew 16:24; 22:37.

2. Bihaen iu mekem dedication long God, iu fit for baptaes. (Matthew 28:​19, 20) Way for baptaes hem showim evriwan hao iu dedicate-im iuseleva finis long Jehovah. So baptaes hem only for olketa wea fit for decide seleva olketa laek for servim God. Taem wanfala man hem baptaes, full body bilong hem mas go underneath long wata for shortfala taem nomoa.a​—⁠Mark 1:​9, 10; Acts 8:⁠36.

3. Bihaen iu dedicate-im iuseleva, Jehovah laekem iu mas live followim promis bilong iu. (Psalm 50:14; Ecclesiastes 5:​4, 5) Devil bae trae for stopem iu for servim Jehovah. (1 Peter 5:⁠8) But kam klosap long God thru long prea. (Philippians 4:​6, 7) Studyim Word bilong hem evriday. (Psalm 1:​1-3) Stap klosap long kongregeson. (Hebrews 13:17) Taem iu duim evri samting hia, iu bae kasem strong for stap faithful long God. For olowe iu savvy duim olketa samting wea God talem iu for duim!

[Footnote]