Wanfala Spesel Hope!
“Evriwan wea laef and showimaot faith long mi bae nating dae.”—JOHN 11:26.
1. Planti million wea dae bifor bae resurrect insaed long wanem kaen living?
TAEM planti million pipol raise ap long resurrection, olketa bae no laef back insaed long wanfala earth wea empty. (Acts 24:15) Olketa bae wekap insaed wanfala ples wea luk naes tumas and bae garem haos, kaleko, and planti kaikai wea ready for olketa. Hu nao bae readyim olketa samting hia? Hem pipol wea laef long niu world bifor datfala resurrection long earth hem start. But hu nao olketa?
2-4. Wanem spesel hope nao stap front long olketa wea laef insaed “olketa last day”?
2 Way wea Bible profesi fulfill showaot iumi stap insaed “olketa last day” bilong disfala system.a (2 Timothy 3:1) Klosap nao, Jehovah God bae duim samting for olketa man and aotem evribit badfala fasin from earth. (Psalm 37:10, 11; Proverbs 2:21, 22) Long datfala taem, wanem nao bae happen long olketa wea servim God long faithful way?
3 Jehovah bae no killim dae raeteous pipol withim badfala pipol. (Psalm 145:20) Hem nating duim datwan bifor, and hem bae no duim datwan taem hem klinim earth from evri badfala samting. (Markem Genesis 18:22, 23, 26.) Tru nao, lastfala buk bilong Bible story abaotem “wanfala great crowd, wea no eni man savvy nambarem, wea kamaot from evri nation and tribe and pipol and langwis,” wea kamaot from “great tribulation.” (Revelation 7:9-14) Yes, wanfala bigfala sekson bae winim great tribulation wea bae endim badfala world wea stap distaem, and olketa hia bae go insaed long niu world bilong God. Long there, olketa man wea obey savvy kasem evribit olketa blessing from nambawan samting wea God provaedem for mekem olketa man kamap free from sin and dae. (Revelation 22:1, 2) There nao, datfala “great crowd” nating need for dae. Datwan hem spesel hope!
4 Waswe, iumi savvy trustim disfala nambawan hope? Barava nao! Jesus Kraest seleva say wanfala taem bae kam wea pipol bae laef and nating dae. Bifor hem resurrectim fren bilong hem Lazarus, Jesus talem Martha: “Evriwan wea laef and showimaot faith long mi bae nating dae.”—John 11:26.
Iu Tu Savvy Laef Olowe
5, 6. Sapos iu want for laef olowe insaed Paradaes long earth, wanem nao iu mas duim?
5 Waswe, iu want for laef olowe insaed wanfala Paradaes long earth? Waswe, iu barava want for lukim olketa wea iu love-im moa? Then iu mas kasem stretfala savvy abaotem will and olketa purpose bilong God. Taem hem prea long God, Jesus say: “Diswan nao meanim laef olowe, for olketa mas go ahed for kasem savvy long iu, only trufala God, and long dat wan wea iu sendem kam, Jesus Kraest.”—John 17:3.
6 Hem will bilong God for “evri different kaen man mas sev and kasem stretfala savvy bilong truth.” (1 Timothy 2:3, 4) Distaem nao hem taem for iu learnim hao iu, withim planti million narafala pipol wea go ahed for duim will bilong God, savvy laef olowe insaed Paradaes long earth. Olketa Witness Bilong Jehovah bae hapi for helpem iu for learnim moa samting abaotem God and olketa mark bilong hem. Story withim olketa long Kingdom Hall wea klosap long iu or raet go long wanfala address wea klosap long iu wea stap long nextfala page.
[Footnote]
a Lukim Wanem Nao Really Samting wea Bible Teachim? chapter 9, wea Olketa Jehovah’s Witness hem pablisim.
[Piksa long page 31]
“Wanfala great crowd” nating need for dae