Chapter Fiftin
Tufala King wea Enemy Go Insaed Mek-20 Century
1. Man for raetem history hem sei hu nao olketa leader bilong Europe long mek-19 century?
MAN for raetem history Norman Davies hem raet olsem: “Wei for muv ahed nao hem markem mek-naentin century bilong Europe winim enitaem bifor.” Hem sei moa: “Europe hem fulap witim paoa winim enitaem bifor: paoa bilong science, paoa bilong selen, paoa bilong pipol, paoa taem difren kantri kaban.” Davies hem sei olketa leader bilong disfala “‘century bilong paoa’ long Europe hem nao Great Britain firstaem . . . and bihaen Germany.”
“LAEK FOR DUIM NOGUD SAMTING”
2. Taem mek-19 century klosap for finis, wanem nao olketa rul wea garem position olsem “king bilong north” and “king bilong south”?
2 Taem mek-19 century klosap for finis, Rul Bilong Germany nao hem “king bilong north” and Britain garem position olsem “king bilong south.” (Daniel 11:14, 15) “For saed bilong tufala king hia,” angel bilong Jehovah talem, “heart bilong tufala bae laek for duim nogud samting, and long wanfala tebol, laea toktok nao tufala bae go ahed for talem.” Hem sei moa: “Bat no eni samting bae win, bikos end hem for taem wea set finis.”—Daniel 11:27.
3, 4. (a) Hu nao kamap firstfala king long Rul Bilong Germany, and wanem wei for fren nao hem start? (b) Wanem plan nao Kaiser Wilhelm followim?
3 Long January 18, 1871, Wilhelm I kamap firstfala king long Rul or Reich Bilong Germany. Hem markem Otto von Bismarck olsem chief minister. From goal bilong hem for mekem datfala niu rul grow, Bismarck stap klia long olketa raoa witim narafala nation and hem startim wei for fren witim Austria-Hungary and Italy, wea olketa kolem Triple Agreement. Bat no longtaem bihaen, olketa samting wea niufala king bilong north laek for duim, king bilong south hem againstim.
4 Bihaen Wilhelm I and Frederick III, man wea rul bihaenem hem, tufala dae long 1888, Wilhelm II wea 29 year nao hem rul. Wilhelm II, or Kaiser Wilhelm, forcem Bismarck for resign and followim plan for mekem Germany bossim evriwea long world. Wanfala man for raetem history hem sei: “Anda long Wilhelm II, [Germany] start for garem praod and raf tingting.”
5. Hao nao tufala king sidaon “long wanfala tebol,” and wanem kaen toktok nao tufala talem long there?
5 Taem Czar Nicholas II bilong Russia arrangem wanfala peace meeting long Hague, Netherlands, long August 24, 1898, nogud feeling midolwan long planti kantri hem strong tumas. Long disfala meeting and narawan wea kamap bihaen long 1907 olketa startim Permanent Kot for Stretem Raoa long Hague. Taem Rul Bilong Germany and Great Britain kamap member bilong datfala kot, hem luk olsem tufala wantem peace. Tufala sidaon “long wanfala tebol,” and luk olsem tufala fren gud, bat ‘heart bilong tufala laek for duim nogud samting.’ Datfala trik for ‘talem laea toktok long wanfala tebol’ no savve startim trufala peace. Long saed bilong politik, bisnis, and army wea tufala aftarem, ‘no eni samting savve win’ bikos end bilong tufala king hia “hem for taem [bilong Jehovah God] wea set finis.”
“AGAINSTIM HOLY COVENANT”
6, 7. (a) Long wanem wei nao king bilong north “go bak long land bilong hem”? (b) Wanem nao king bilong south duim taem king bilong north kasem paoa ovarem planti ples moa?
6 Angel bilong God hem sei moa: “And hem [king bilong north] bae go bak long land bilong hem witim staka kago, and heart bilong hem bae againstim holy covenant. And hem bae duim planti samting and go bak long land bilong hem.”—Daniel 11:28.
7 Kaiser Wilhelm go bak long datfala “land,” or wei bilong king bilong north long taem bifor. Hao nao olsem? Taem hem buildim wanfala rul witim plan for mekem Rul Bilong Germany moa big and bossim planti ples moa. Wilhelm II tekovarem samfala moa kantri long Africa and narafala ples. From hem want for challengem wei wea Britain rulim sea, hem buildim barava strongfala navy. The New Encyclopædia Britannica hem talem: “Navy bilong Germany hem smol nomoa bat insaed tenfala year hem kamap mek-tu long Britain.” For keepim wei wea hem nao rul, Britain mas mekem navy bilong hem kamap moa big. Britain hem startim tu entente cordiale (wei for agree) witim France and semkaen agreement witim Russia, and thrifala hia mekem Triple Entente. So Europe hem divaed long tufala army grup—Triple Agreement long wansaed and Triple Entente long narasaed.
8. Hao nao Rul Bilong Germany kasem “staka kago”?
8 Rul Bilong Germany hem followim raf wei, wea mekem hem kasem “staka kago” for Germany bikos hem nao main part bilong Triple Agreement. Austria-Hungary and Italy olketa Roman Catholic. So, pope nao saportim disfala Triple Agreement, bat hem no saportim king bilong south, witim Triple Entente bilong hem wea planti no Catholic.
9. Hao nao heart bilong king bilong north hem “againstim holy covenant”?
9 Waswe long pipol bilong Jehovah? For longtaem nao olketa sei “taem bilong olketa nation wea set finis” bae end long 1914.a (Luke 21:24) Long datfala year, Kingdom bilong God long hand bilong Man from laen bilong King David, Jesus Christ, hem start long heven. (2 Samuel 7:12-16; Luke 22:28, 29) English Wastaoa magasin bilong March 1880 joinim rul bilong Kingdom bilong God witim end bilong “taem bilong olketa nation wea set finis,” or “taem bilong olketa Gentile.” (King James Version) Bat heart bilong king bilong north long Germany hem ‘againstim holy Kingdom covenant.’ Winim wei for luksavve long rul bilong Kingdom, Kaiser Wilhelm “duim planti samting” taem hem mekhae long olketa plan bilong hem for rulim world. Bat, taem hem duim olsem, hem plantim olketa seed for World War I.
KING “WIKDAON” LONG WAR
10, 11. Hao nao World War I hem start, and hao nao diswan happen long “taem wea set finis”?
10 Datfala angel talem profesi olsem: “Long taem wea set finis bae hem [king bilong north] go bak, and bae hem kam againstim south; bat distaem bae hem no olsem long firstaem.” (Daniel 11:29) “Taem [bilong God] wea set finis” for finisim wei wea olketa Gentile nomoa rul ovarem disfala earth hem kamap long 1914 taem hem startim Kingdom long heven. Long June 28 bilong datfala year, wanfala terrorist from Serbia hem killim dae Archduke Francis Ferdinand bilong Austria and waef bilong hem long Sarajevo, Bosnia. Datwan nao samting wea startim World War I.
11 Kaiser Wilhelm encouragem Austria-Hungary for pei bak long Serbia. From Germany sei bae hem saportim olketa, Austria-Hungary startim war againstim Serbia long July 28, 1914. Bat Russia kam for helpem Serbia. Taem Germany startim war againstim Russia, France (wanfala wea insaed long Triple Entente) saportim Russia. Then Germany startim war againstim France. For mekem hem isi for kasem Paris, Germany attakim Belgium, wea no teksaed and wea Britain nao saportim hem. So Britain startim war againstim Germany. Olketa narafala nation join tu, and Italy hem changem saed wea hem saportim. Long taem bilong war, Britain mekem Egypt stap anda long hem mekem king bilong north no blokem Suez Canal and go insaed long Egypt, land bilong king bilong south bifor.
12. Long first world war, long wanem wei nao evri samting hem no “olsem long firstaem”?
12 The World Book Encyclopedia hem sei: “Nomata Sekson wea faet tugeta olketa staka and strong tumas, luk olsem Germany klosap for winim war.” Long olketa faet midolwan long tufala king hia bifor, Rul Bilong Rome, olsem king bilong north, hem win evritaem. Bat long distaem, ‘evri samting no olsem long firstaem.’ King bilong north hem lus long war. Taem hem givim reason for diswan, angel hem sei: “Olketa ship bilong Kittim bae kam for againstim hem, and hem bae wikdaon.” (Daniel 11:30a) Wanem nao “olketa ship bilong Kittim”?
13, 14. (a) Wanem nao “olketa ship bilong Kittim” wea kam for againstim king bilong north? (b) Hao nao samfala moa ship bilong Kittim kam taem first world war go ahed?
13 Long taem bilong Daniel, Kittim nao hem Cyprus. Long start bilong first world war, Cyprus hem join witim Britain. Nara samting moa, olsem The Zondervan Pictorial Encyclopedia of the Bible hem talem, datfala nem Kittim “savve minim evri ples long W[est], bat main wan nao olketa bilong W[est] wea garem olketa ship.” New International Version hem transleitim disfala toktok “olketa ship bilong Kittim” olsem “olketa ship bilong saedsea long west.” Long first world war, olketa ship bilong Kittim nao olketa ship bilong Britain, wea stap saedsea long west saed bilong Europe.
14 Taem war go ahed, Navy Bilong Britain kamap moa strong taem samfala moa ship bilong Kittim kam. Long May 7, 1915, submarine U-20 bilong Germany hem sinkim wanfala passenger ship Lusitania long saedsea long south saed bilong Ireland. Witim olketa wea dae hem 128 pipol from America. Bihaen, Germany iusim olketa submarine for faet long Atlantic Sea. Gogo, long April 6, 1917, U.S. President Woodrow Wilson hem startim war againstim Germany. From hem kamap moa strong taem olketa U.S. warship and soldia joinim hem, king bilong south—wea hem nao World Paoa Bilong England-America—hem faet evribit witim king wea enemy bilong hem.
15. Wanem taem nao king bilong north “wikdaon”?
15 From World Paoa Bilong England-America attakim hem, king bilong north “wikdaon” and talemaot hem lus long November 1918. Wilhelm II hem ranawe and mas stap long Netherlands, and Germany hem kamap wanfala republic gavman. Bat king bilong north no finis yet.
KING HEM “DUIM PLANTI SAMTING”
16. Olsem profesi hem talem, wanem nao king bilong north duim taem hem lus?
16 “Hem [king bilong north] bae go bak and tokspoelem holy covenant and duim planti samting; and hem mas go bak and favorim olketa wea lusim holy covenant.” (Daniel 11:30b) Hem nao profesi wea angel talem, and hem kamap tru.
17. Wanem nao lead go for Adolf Hitler kasem paoa?
17 Bihaen war hem finis, long 1918, Sekson wea join tugeta wea win olketa mekem wanfala peace agreement for panisim Germany. Pipol bilong Germany faendem datfala agreement hem hard tumas, so from start bilong hem datfala niufala republic gavman hem wik. Germany barava stragol for samfala year and kasem tu datfala Great Depression wea mekem six million pipol no garem waka for selen. Bihaen long 1930, living hem openem wei for Adolf Hitler for kasem paoa. Hem kamap chief minister long January 1933 and long year bihaen hem mekem hemseleva president bilong wanem olketa Nazi kolem Mek-Thri Rul.b
18. Hao nao Hitler hem “duim planti samting”?
18 Stretawe bihaen hem kasem paoa, Hitler barava attakim “holy covenant,” wea olketa anointed brata bilong Jesus Christ nao piksarem datwan. (Matthew 25:40) Hem “duim planti samting” againstim olketa loyal Christian hia, taem hem persecutim planti long raf wei. Hitler hem win long saed bilong selen and wei for fren witim olketa nara nation, so hem “duim planti samting” long olketa wei olsem tu. Insaed tu-thri year, hem mekem Germany kamap wanfala strongfala paoa long world.
19. From hem wantem saport, hu nao Hitler switim?
19 Hitler “favorim olketa wea lusim holy covenant.” Hu nao olketa hia? Luk olsem olketa leader bilong Christendom, wea sei olketa garem covenant witim God bat wea no go ahed olsem disaepol bilong Jesus Christ. Hitler win for kasem saport from “olketa wea lusim holy covenant.” Olsem example, hem mekem wanfala agreement witim pope long Rome. Long 1935, Hitler startim Ministry for Church Affairs. Wanfala goal hem for mekem olketa Evangelical church stap anda long gavman.
“OLKETA ARM” GO AOT FROM KING
20. Wanem nao “olketa arm” wea king bilong north hem iusim, and hem iusim againstim hu nao?
20 No longtaem bihaen, Hitler hem startim war, olsem angel hem talem firstaem: “Olketa arm bae standap, wea bae go aot from hem; and olketa bae spoelem holy ples, datfala strongfala ples, and aotem datfala samting wea happen evritaem.” (Daniel 11:31a) “Olketa arm” nao olketa army wea king bilong north iusim for faetem king bilong south long World War II. Long September 1, 1939, olketa Nazi “arm” attakim Poland. Tufala day bihaen, Britain and France startim war againstim Germany for helpem Poland. So hem nao start bilong World War II. Kwiktaem nomoa Germany winim Poland, and no longtaem bihaen olketa tekovarem Denmark, Norway, Netherlands, Belgium, Luxembourg, and France. “Long end bilong 1941,” The World Book Encyclopedia hem sei, “Nazi Germany hem bossim Europe.”
21. Hao nao evri samting change for king bilong north long World War II, and wanem nao kamaot from datwan?
21 Nomata Germany and Soviet Union saenem finis wanfala Agreement for Fren, Waka Tugeta, and Markem Spialaen, Hitler hem attakim territory bilong Soviet Union long June 22, 1941. Diswan mekem Soviet Union saed witim Britain. Army bilong Soviet Union hem faet strong nomata army bilong Germany kasholem planti territory finis. Long December 6, 1941, army bilong Germany lus long Moscow. Long next day, fren bilong Germany, Japan, bombim Pearl Harbor, Hawaii. Taem hem herem diswan, Hitler talem olketa bigman long army bilong hem: “Distaem iumi kanduit lus long disfala war.” Long December 11, hem kwiktaem for startim war againstim United States. Bat hem no luksavve long strong bilong Soviet Union and United States. From army bilong Soviet Union attak from east saed and army bilong Britain and America long west, evri samting start for change for Hitler. Army bilong Germany start for lusim planti territory. Bihaen Hitler hem suisaed, Germany sarenda long Sekson wea faet tugeta, long May 7, 1945.
22. Hao nao king bilong north ‘spoelem holy ples and aotem datfala samting wea happen evritaem’?
22 “Olketa [arm bilong Nazi] bae spoelem holy ples, datfala strongfala ples, and aotem datfala samting wea happen evritaem,” datfala angel hem talem. Long Judah bifor, holy ples hem part bilong temple long Jerusalem. Bat, taem olketa Jew rejectim Jesus, Jehovah rejectim olketa and temple bilong olketa. (Matthew 23:37–24:2) Start kam long first century C.E., temple bilong Jehovah hem spiritual temple, wea garem holy bilong holy long heven and spiritual courtyard long earth, wea olketa anointed brata bilong Hae Priest, Jesus, serve. Start long 1930, “great crowd” worship tugeta witim anointed remnant so hem olsem olketa serve ‘long temple bilong God.’ (Revelation 7:9, 15; 11:1, 2; Hebrews 9:11, 12, 24) Long olketa kantri wea hem kontrolem, king bilong north spoelem courtyard bilong datfala temple long earth taem hem strong for persecutim anointed remnant and fren bilong olketa. From persecution hia big tumas olketa aotem nao “datfala samting wea happen evritaem”—sakrifaes for praisem nem bilong Jehovah long pablik. (Hebrews 13:15) Nomata olketa safa long barava nogud wei, olketa faithful anointed Christian witim “narafala sheep” go ahed for preach long taem bilong World War II.—John 10:16.
‘OLKETA PUTIM GO BARAVA RABIS SAMTING’
23. Wanem nao “datfala barava rabis samting” long first century?
23 Taem mek-tu world war hem klosap for finis, narafala samting happen, olsem angel bilong God hem talem. “Olketa bae putim go datfala barava rabis samting wea spoelem evribit.” (Daniel 11:31b) Jesus tu story abaotem “datfala barava rabis samting.” Long first century, hem nao army bilong Rome wea kam long Jerusalem long 66 C.E. for daonem olketa Jew wea againstim olketa.c—Matthew 24:15; Daniel 9:27.
24, 25. (a) Wanem nao “datfala barava rabis samting” long distaem? (b) Wanem taem and hao nao ‘olketa putim go datfala barava rabis samting’?
24 Wanem “barava rabis samting” nao olketa “putim go” long distaem? Hem wanfala “barava rabis samting” wea giaman for sei hem Kingdom bilong God. Hem nao League of Nations, redfala wild animal wea go insaed long deep hol, or wea no go ahed olsem wanfala organization for mekem peace long world, taem World War II hem start. (Revelation 17:8) Bat, “datfala wild animal” bae “kamaot from deep hol.” Diswan happen taem United Nations, wea 50 nation and Soviet Union bifor tu join insaed, hem start long October 24, 1945. So olketa putim go “datfala barava rabis samting” wea angel talem profesi abaotem—datfala United Nations.
25 Germany nao hem main enemy bilong king bilong south long tufala world war and hem stap long position olsem king bilong north. Hu nao bae next wan for kasem datfala position?
[Olketa Footnote]
a Lukim Chapter 6 bilong disfala buk.
b Holy Rul Bilong Rome nao first rul, and Rul Bilong Germany nao hem mek-tu.
c Lukim Chapter 11 bilong disfala buk.
WANEM NAO IU LANEM?
• Long end bilong mek-19 century, wanem nao olketa rul wea garem position olsem king bilong north and king bilong south?
• Long World War I, hao nao samting wea kamaot from faet hem “no olsem long firstaem” for king bilong north?
• Bihaen World War I, hao nao Hitler mekem Germany wanfala strongfala paoa long world?
• Wanem nao kamaot from faet midolwan long king bilong north and king bilong south long World War II?
[Chart/Piksa long page 268]
OLKETA KING LONG DANIEL 11:27-31
King King
Bilong North Bilong South
Daniel 11:27-30a Rul Bilong Germany Britain, bihaen hem
(World War I) World Paoa Bilong
England-America
[Piksa]
President Woodrow Wilson witim King George V
[Piksa]
Planti Christian kasem persecution insaed long olketa concentration camp
[Piksa]
Olketa leader bilong Christendom saportim Hitler
[Piksa]
Car wea olketa killim dae Archduke Ferdinand insaed
[Piksa]
Olketa soldia bilong Germany, World War I
[Piksa long page 257]
Long Yalta long 1945, Winston Churchill Prime Minister bilong Britain, Franklin D. Roosevelt President Bilong U.S., and Joseph Stalin Premier bilong Soviet Union, agree long plan for kontrolem Germany, startim wanfala niu gavman long Poland, and garem meeting for startim United Nations
[Olketa Piksa long page 258]
1. Archduke Ferdinand 2. Navy bilong Germany 3. Navy bilong Britain 4. Lusitania 5. U.S. pepa for startim war
[Olketa Piksa long page 263]
Adolf Hitler hem tingse bae hem win taem Japan, fren bilong Germany long taem bilong war, hem bombim Pearl Harbor