Hu Nao Olketa Fren Bilong God?

Jesus Christ hem Son bilong Jehovah and barava klos and best fren bilong hem. Bifor Jesus hem laef olsem man long earth, hem stap long heven olsem wanfala maeti spirit angel. (John 17:5) Then hem kam long earth for teachim pipol long truth abaotem God. (John 18:37) Hem givim tu laef bilong hem olsem wanfala man long earth for sevem olketa man wea obey from sin and dae. (Romans 6:23) Distaem, Jesus hem King long Kingdom bilong God, wanfala gavman long heven wea bae mekem Paradaes kamap long disfala earth.—Revelation 19:16.

Olketa angel tu olketa fren bilong God. Olketa angel nating startim laef bilong olketa olsem man long disfala earth. God wakem olketa long heven bifor hem wakem disfala earth. (Job 38:4-7) Planti million angel stap. (Daniel 7:10) Olketa fren hia bilong God long heven laekem pipol for lanem truth abaotem Jehovah.—Revelation 14:6, 7.

God garem olketa fren long earth tu; hem kolem olketa olketa witness bilong hem. Long kot wanfala witness hem talemaot samting wea hem savve abaotem wanfala man or wanfala samting. Olketa Jehovah’s Witness talem nara pipol wanem olketa savve abaotem Jehovah and plan bilong hem. (Isaiah 43:10) Olsem olketa angel, olketa Witness laek for helpem iu for lanem truth abaotem Jehovah. Olketa laekem iu for kamap fren bilong God tu.