Hao for Kamap Moabeta Long Wei for Story Witim Narawan

WASWE, iu faendem hem isi for story witim pipol? For ting for story witim narawan nomoa, especially samwan wea olketa no savve long hem, mekem planti pipol wari. Maet pipol olsem savve shame. Maet olketa ting: ‘Wanem nao mi shud tok abaot? Hao nao mi savve startim wei for story? Hao nao mi savve mekem story for go ahed?’ Pipol wea no savve shame and feel sure long olketa seleva maet tekova long wanfala story. Maet challenge bilong olketa hem for encouragem narawan for tok and for lane hao for lisin long samting wea hem talem. So iumi evriwan, nomata iumi man for shame or nomoa, need for go ahed for lanem hao for story witim narawan.

Start Long Haos

For kamap moabeta long wei for story, hem gud for start witim famili. Kaen story wea buildimap man savve barava help for mekem famili stap hapi.

Wei for barava kea for pipol nao main key for kaen wei for story olsem. (Deut. 6:6, 7; Prov. 4:1-4) Taem iumi kea for pipol, iumi story witim olketa, and iumi lisin taem narawan hem laek for talem samting. Nara important key hem for garem gudfala story. Sapos iumi duim Bible reading and study seleva evritaem, iumi bae garem planti samting for sharem witim narawan. Gudfala wei for iusim buklet Lukluk Gud Long Olketa Scripture Evriday savve encouragem wei for story. Maet long datfala day iumi kasem wanfala naes experience long field service. Maet iumi readim samting wea interesting or wea mekem man laf. Iumi shud mekem hem olsem wei bilong iumi for sharem olketa samting hia taem famili enjoyim gudfala wei for story tugeta. Diswan bae helpem iumi tu for story witim narafala pipol.

Story Witim Wanfala Stranger

Planti pipol hol bak for story witim samwan wea olketa no savve long hem. Bat, from olketa lovem God and neiba, Olketa Jehovah’s Witness duim best bilong olketa for lane hao for story, mekem olketa savve sharem olketa truth from Bible witim narawan. Wanem nao savve helpem iu for kamap moabeta long diswan?

Principle wea stap long Philippians 2:4 hem important. Iumi kasem encouragement for “no interest long olketa samting bilong [iumi] seleva nomoa, bat interest long olketa samting bilong narafala pipol tu.” Tingim diswan olsem: Sapos iu nating meetim datfala man bifor, hem ting long iu olsem wanfala stranger. Hao nao iu savve mekem hem feel free witim iu? For smile long hem and sei hello bae help. Bat moa samting hem insaed long diswan.

Maet iu disturbim tingting bilong hem. Sapos iu trae for mekem hem story abaotem samting wea iu tingim bat no tingim wanem nao hem tingim, waswe, bae hem willing for story? Wanem nao Jesus duim taem hem meetim wanfala woman long wanfala well long Samaria? Woman hia ting for kasem wata. Jesus iusim datwan for startim story bilong hem, and then no longtaem bihaen hem changem story for kamap wanfala naesfala story abaotem spiritual samting.—John 4:7-26.

Sapos iu lukluk gud, iu savve luksavve tu long wanem nao pipol maet ting abaotem. Waswe, datfala man hem luk hapi or sorre? Waswe, hem olo, and maet sik tu? Waswe, iu lukim eni samting wea showimaot olketa pikinini stap long haos? Waswe, eni samting stap wea showimaot sapos man hem rich or hem stragol for kasem olketa samting wea hem needim? Waswe, olketa samting long haos or nekles bilong man showimaot sapos hem interest long religion? Sapos hello bilong iu story followim olketa samting hia, maet datfala man tingim iu olsem samwan wea interest long samting wea hem interest long hem tu.

Sapos iu no lukim feis bilong man long haos, bat herem voice bilong hem nomoa from hem no openem door, wanem nao maet diswan showimaot? Maet datfala man fraet. Waswe, iu savve iusim datfala information for startim story thru long door?

Long samfala ples, iu savve pullim interest bilong man for story long wei for talem hem samting abaotem iuseleva—hu nao iu, why nao iu kam long haos bilong hem, wanem nao muvim iu for studyim Bible firstaem, and wei wea Bible helpem iu. (Acts 26:4-23) Bat, iu need for iusim gudfala tingting for savve wanem nao fitim for iu talem and for garem kliafala goal. Diswan bae muvim datfala man for talem iu samting abaotem hemseleva and tingting bilong hem abaotem samting.

Long samfala kantri, hem kastom for welkamim olketa stranger. Planti pipol bae hapi for invaetem iu for kam insaed and sidaon. Sapos bihaen iu sidaon, iu askem man sapos evriwan long famili bilong hem stap gud and lisin gud taem hem ansa, datfala man maet barava interest for herem wanem nao iu laek for talem. Long samfala nara kantri olketa barava moa interest long pipol wea visit, so wei for sei hello and story for savve gud long iu savve go ahed for longfala taem. From diswan, maet olketa faendem hao samfala samting long laef bilong olketa hem semsem witim laef bilong iu. Diswan savve lead go for story abaotem samting wea savve helpem olketa long spiritual wei.

Waswe sapos planti pipol long ples bilong iu garem olketa difren languis? Hao nao iu savve story witim olketa? Sapos iu lanem nomata simpol wei for sei hello long samfala long olketa languis hia, pipol bae luksavve iu interest long olketa. Maet diswan openem wei for story tugeta.

Hao for Mekem Story Go Ahed

For mekem wanfala story go ahed, iu mas interest long wanem nao tingting bilong man wea iu story witim. Encouragem hem for talem wanem nao hem tingim sapos hem willing for duim. Hem gud for askem samfala gudfala kwestin. Olketa kwestin for pullim tingting bilong man nao best wan bikos for ansa, man need for talem moa samting winim yes or no nomoa. Olsem example, bihaen iu storyim wanfala problem wea evriwan wari long hem, iu savve ask: “Wanem nao tingting bilong iu abaotem wanem nao kosim disfala problem?” or “Wanem nao iu ting bae stretem diswan?”

Taem iu askem kwestin, lisin gud long ansa wea man givim. Showimaot iu interest long wei for talem samting, or sekem hed for showim iu minim. No stopem story bilong hem long wei for iu talem samting. Tingim wanem hem talem. “Kwiktaem for lisin, slow for toktok.” (Jas. 1:19) Taem iu story, showimaot hao iu really lisin long wanem hem talem.

Bat, luksavve hao no evriwan bae ansarem olketa kwestin bilong iu. Samfala maet apim eye nomoa or smile. Olketa narawan maet just sei yes or no. No feel olsem no eni wei nao. Mas patient. No trae for forcem man for story. Sapos datfala man hem willing for lisin, iusim datfala chance for sharem tu-thri point from Bible wea buildimap man. Gogo, datfala man maet start for tingim iu olsem wanfala fren. Then maet hem feel moa free for talem tingting bilong hem.

Taem iu story witim pipol, tingim wei for iu savve duim olketa return visit bihaen. Sapos wanfala man garem samfala kwestin, givim ansa for samfala kwestin bat leavim wanfala or tufala for next taem iutufala story. Talem hem iu bae duim research and bae kam bak for sharem datfala information witim hem. Sapos hem no askem eni kwestin, maet iu finisim story bilong iu witim wanfala kwestin wea iu sure hem bae interest long hem. Talem hem iu bae storyim datwan next taem. Iu savve faendem staka idea insaed Reasoning From the Scriptures buk, Wanem Nao God Mas Kasem From Iumi? brochure, and olketa Wastaoa and Wekap! magasin wea olketa pablisim no longtaem go nomoa.

Taem Iu Stap Witim Olketa wea Biliv

Taem iu meetim narafala Jehovah’s Witness for firstaem, waswe, iu nao startim story witim hem mekem iu savve long hem? Or iu just stap kwaet nomoa? Love wea iumi garem for olketa brata shud muvim iumi for want for savve gud long olketa. (John 13:35) Hao nao for startim diswan? Maet iu just talem nem bilong iu and askem wanem nao nem bilong hem. For askem hem hao nao hem lanem truth savve lead go long wanfala interesting story, and bae helpem iufala for savve gud long each other. Nomata maet iu faendem hem hard for tok long smoothfala wei, wei wea iu trae hard bae showimaot long narawan iu kea abaotem hem, and datwan nao hem important.

Wanem nao bae helpem iu for addim samting wea interesting taem iu story witim samwan long kongregeson bilong iu? Showimaot really interest long datfala man and famili bilong hem. Waswe, meeting hem just finis? Storyim olketa point wea iu faendem bae helpem iu. Diswan savve helpem iutufala evriwan. Iu savve talem wanfala naesfala point from wanfala Wastaoa or Wekap! magasin wea iu bin readim. Iu shud no duim diswan for show-off or for testim savve bilong datwan wea iu story witim. Duim from iu laek for sharem samting wea iu barava enjoyim. Maet iu tok abaotem wanfala assignment wea iu or hem kasem long Theocratic Ministry Skul and storyim samfala difren idea long hao for duim datwan. Iu savve sharem samfala experience wea happen long field ministry.

Planti taem wei wea iumi interest long pipol lead go for iumi story abaotem olketa—olketa samting wea olketa talem and duim. Maet iumi talem samting wea fani tu. Waswe, bae samting iumi talem buildimap man? Sapos iumi ting strong long kaonsel from Word bilong God, and love wea followim God nao muvim iumi, toktok bilong iumi bae buildimap man.—Prov. 16:27, 28; Eph. 4:25, 29; 5:3, 4; Jas. 1:26.

Bifor iumi share long field ministry, iumi prepare. Waswe sapos iu preparem wanfala interesting samting for sharem witim olketa fren? Taem iu readim and herem samting wea interesting, rememberim olketa point wea iu laek for sharem witim olketa narawan. Gogo, iu bae garem staka samting wea iu savve chusim. Wei for duim diswan bae helpem iu for talem moa samting winim wei for story followim olketa samting long evriday living nomoa. Winim evri samting, toktok bilong iu shud pruvim hao Word bilong God hem spesol samting long iu!—Ps. 139:17.