Program for Mekem Grow Savve Olsem Speaker and Teacher

NOMATA iu young or olo, man or woman, disfala course savve helpem iu for story long wei wea moabeta and for garem moa savve long hao for teachim Word bilong God.

Skul overseer nao bae assignim olketa tok long evriwan wea joinim Theocratic Ministry Skul. Long next thrifala page iu bae faendem kaonsel pepa bilong iuseleva. Namba wea stap bifor each point hem minim namba bilong study wea storyim datfala point. Olketa study hia bae explainim hao nao for kamap gud long olketa difren point long wei for toktok and teach and why nao each wan hem important. Bae iu faendem tu information wea bae helpem iu duim wanem hem talem.

Kaonsel pepa iusim difren color for showim wanem point kaonsel nao join witim olketa assignment wea needim (1) reading long audience, (2) wanfala demonstration wea garem tufala or winim tufala pipol insaed, or (3) wanfala tok long kongregeson. Skul overseer bae assignim point for iu waka long hem. Hem moabeta for waka long wanfala point nomoa each taem. Bae iu kasem gud samting taem iu duim datfala exercise long end bilong study wea olketa assignim long iu. Sapos iu showimaot wei wea iu win for followim kaonsel long datfala study, brata wea kaonselem iu bae assignim nara point for iu waka long hem.

Sapos assignment bilong iu hem wanfala demonstration, iu bae needim wanfala setting. Wanfala list bilong olketa setting stap long page 82, bat iu savve iusim nara setting tu. Brata wea kaonselem iu maet encouragem iu for traem wanfala setting for mekem iu garem moa savve long datwan, or maet hem letem iu chusim wan wea iu laekem.

Samting wea bae barava helpem iu for muv ahed hem for readim disfala buk and duim olketa exercise evritaem, no just long taem iu preparem assignment long skul nomoa. Maet iu savve readim wanfala difren study each week.

Nomata haomas year iu share finis insaed long skul or long field ministry, iu savve kamap moabeta. Iu bae barava kasem gud samting from education wea kam thru long Theocratic Ministry Skul.