Gudfala Wei for Pullim Tingting

IUMI hapi hao Word bilong God hem changem laef bilong iumi, and iumi laekem nara pipol for kasem semkaen help. And tu, iumi luksavve hao feeling bilong pipol abaotem gud nius bae affectim future bilong olketa. (Matt. 7:13, 14; John 12:48) Iumi laekem tumas for olketa acceptim truth. Nomata olsem, for barava helpem olketa iumi mas garem strongfala biliv witim fasin for luksavve tu.

Hem hard for pipol acceptim wei for talem stret hao biliv bilong olketa hem rong, nomata iumi pruvim witim planti Scripture. Olsem example, for tok strong againstim olketa holiday wea pipol laekem tumas olsem heathen samting, maet hem no changem feeling bilong olketa. Sapos iu pullim tingting long balance wei maet iu garem moa chance for helpem olketa. Wanem nao hem minim for balance?

Bible talem iumi hao “wisdom from antap hem . . . keepim peace, hem balance.” (Jas. 3:17) Greek word wea olketa transleitim “balance” hem minim “mekwe.” Samfala Bible transleitim diswan olsem “kaenfala,” “isi witim,” or “patient.” Lukim hao balance fasin hem join witim fasin for keepim peace. Titus 3:2 storyim diswan witim kwaet fasin and showimaot hao hem barava difren from fasin for faet. Philippians 4:5 encouragem iumi for letem evri man savve long “balance fasin” bilong iumi. Man wea balance hem tingim living and feeling bilong man wea hem story witim. Hem willing for mekwe taem hem fitim. For deal witim nara pipol long wei olsem hem help for openem mind and heart bilong olketa, mekem olketa moa willing for acceptim samting taem iumi iusim Bible for pullim tingting.

Wea for Start. Man for raetem history, Luke, talem hao taem aposol Paul hem long Thessalonica, hem “explainim and pruvim from olketa scripture hao Christ mas safa and laef bak from dae.” (Acts 17:2, 3) Interesting samting, Paul duim diswan insaed wanfala synagogue bilong olketa Jew. Audience bilong hem respectim olketa Hebrew Scripture. Paul iusim gudfala tingting for start witim samting wea olketa acceptim.

Taem Paul story long olketa Greek long Areopagus long Athens, hem no storyim olketa Scripture firstaem. Hem start witim samting olketa savve abaotem and bilivim, and then iusim datwan for leadim olketa for tingim Creator and olketa purpose bilong Hem.—Acts 17:22-31.

Long taem bilong iumi, planti billion pipol no luksavve hao hem important for live followim Bible. Bat klosap evriwan kasem hard samting long laef insaed disfala system. Pipol wantem tumas samting wea moabeta. Sapos iu showimaot interest long samting wea olketa wari abaotem and then showim hao Bible explainim datwan, balance wei for story olsem maet muvim olketa for lisin long samting Bible talem abaotem purpose bilong God for olketa man.

Wanfala Bible student maet kasem olketa biliv bilong religion and kastom from parents bilong hem. Then, datfala student lanem hao olketa biliv and kastom bilong hem no mekem God hapi, and hem rejectim olketa and acceptim teaching bilong Bible. Hao nao student savve explainim disison bilong hem long parents bilong hem? Olketa maet feel hao, from hem rejectim olketa biliv bilong religion bilong olketa, hem rejectim olketa tu. Maet datfala Bible student disaed hem need for mek sure parents bilong hem savve hem lovem and respectim olketa bifor hem iusim Bible for trae explainim reason for disison bilong hem.

Taem for Mekwe. Nomata Jehovah garem full paoa ovarem evriting, hem deal witim pipol long barava balance wei. Taem olketa angel bilong Jehovah sevem Lot and famili bilong hem from Sodom, olketa sei: “Ranawe long olketa maunten nogud iufala dae!” Bat, Lot hem ask strong olsem: “Plis Jehovah, no long there!” Hem begim Jehovah for letem hem ranawe long Zoar. Jehovah showaot hem tingim feeling bilong Lot taem hem letem hem go long Zoar; so taem hem distroem olketa nara taon, hem letem Zoar stap. Bat bihaen, Lot followim firstfala instruction bilong Jehovah and muv go long olketa maunten. (Gen. 19:17-30) Jehovah savve hao instruction wea hem talem hem stret, bat hem patient for tingim feeling bilong Lot go kasem taem Lot luksavve long datwan.

For deal witim pipol long gudfala wei, iumi mas patient tu. Iumi maet barava biliv hao nara man hem rong, and maet iumi tingim samfala strongfala pruv for showimaot datwan. Bat maet hem moabeta for no forcem nara man for luksavve hem rong. Balance fasin no minim iumi lusim olketa standard bilong Jehovah. Maet hem moabeta for thankiu long datfala man for samting hem talem or for no ansarem samfala rong toktok, mekem iu savve tanem story long samting wea savve helpem hem. Bossim feeling bilong iu, nomata sapos hem tok strong againstim biliv bilong iu. Maet iu askem hem why nao hem feel olsem. Lisin gud long ansa bilong hem. Diswan bae helpem iu minim tingting bilong hem. Maet hem redyim wei for gudfala story long future tu.—Prov. 16:23; 19:11.

Jehovah givim man savve for chus. Hem letem olketa iusim datfala savve, nomata maet olketa no iusim long wisefala wei. Olsem man for toktok for Jehovah, Joshua storyim wei wea God deal witim Israel. Bat then hem sei: “So sapos hem nogud samting long eye bilong iufala for servem Jehovah, chusim for iufala seleva tuday hu nao iufala bae servem, olketa god wea laen dadi bilong iufala wea stap long narasaed bilong River servem or olketa god bilong olketa Amorite wea long land bilong olketa nao iufala stap. Bat for mi and olketa long haos bilong mi, mifala bae servem Jehovah.” (Josh. 24:15) Assignment bilong iumi distaem hem for givim “witness,” and iumi toktok witim strong biliv, bat iumi no trae for forcem narafala pipol for biliv. (Matt. 24:14) Olketa mas chus, and iumi respectim wei wea datwan hem raet bilong olketa.

Askem Olketa Kwestin. Jesus hem nambawan example long wei for pullim tingting bilong pipol. Hem tingim living bilong olketa and hem iusim olketa tokpiksa wea isi for olketa acceptim. Hem iusim gud olketa kwestin tu. Diswan givim pipol chance for talemaot feeling bilong olketa and hem showimaot wanem nao insaed heart bilong olketa. And tu, diswan encouragem olketa for ting raonem samting Jesus story abaotem.

Wanfala man wea savve tumas long Law askem Jesus: “Teacher, wanem nao mi mas duim for kasem laef olowe?” Hem savve isi tumas for Jesus just talem ansa long hem. Bat hem invaetem datfala man for talem tingting bilong hem. “Wanem nao olketa raetem insaed long Law? Wanem nao iu readim insaed long hem?” Datfala man givim stretfala ansa. Waswe, from hem givim stretfala ansa hem minim datfala story finis nao? Nomoa nao. Jesus letem datfala man go ahed for toktok, and wanfala kwestin wea datfala man askem showimaot hem trae for pruvim hem raeteous. Hem ask: “Hu nao really neiba bilong mi?” Winim wei for talem ansa, wea maet datfala man argue againstim from tingting bilong olketa Jew abaotem olketa Gentile and Samaritan long datfala taem, Jesus invaetem hem for ting raonem wanfala tokpiksa. Hem abaotem wanfala kaenfala Samaritan wea helpem wanfala man wea samwan killim and steal from hem, bat wanfala priest and wanfala Levite no helpem hem. Jesus askem wanfala simpol kwestin for mek sure man hia minim datfala tokpiksa. Wei bilong Jesus for pullim tingting mekem datfala word “neiba” garem moa mining winim wanem datfala man tingim bifor. (Luke 10:25-37) Hem nambawan example for followim! Winim wei for iu nao story, wea minim, iu nao tingting for haosholder, lane for iusim olketa kaenfala kwestin and tokpiksa for encouragem man wea lisin for tingting.

Givim Olketa Reason. Taem aposol Paul hem story long synagogue long Thessalonica, hem duim moa samting winim wei for readim samting wea audience acceptim finis. Luke talem hao Paul explainim, pruvim, and givim mining long samting wea hem readim. From datwan, “samfala long olketa kamap pipol wea biliv and joinim olketa seleva long Paul and Silas.”—Acts 17:1-4.

Nomata hu nao long audience bilong iu, wei for pullim tingting savve helpem olketa. Diswan hem tru taem iu witness long olketa relative, story witim olketa wakfren or skulfren, story witim olketa stranger long pablik witnessing waka, conductim wanfala Bible study, or givim tok long kongregeson. Taem iu readim wanfala scripture, maet mining hem klia long iu bat no long nara man. Wei wea iu explainim or minim maet here olsem bighed long narawan. Waswe, hem savve help sapos iu chusim and explainim samfala main word insaed datfala scripture? Waswe, iu savve givim samfala pruv, maet from olketa verse wea stap raonem or nara scripture wea storyim sem subject? Waswe, wanfala tokpiksa savve help for showimaot hao samting iu talem hem balance? Waswe, olketa kwestin savve helpem audience bilong iu for ting raonem datfala samting? For pullim tingting long wei olsem hem help for mekem narafala pipol garem gudfala tingting abaotem iumi and hem givim olketa planti samting for ting raonem.