Encouragem and Strongim Audience

NOMATA wanem kaen problem olketa feisim, olketa servant bilong God shud faendem encouragement long Christian kongregeson. Dastawe, olketa elder mas barava mek sure olketa tok and kaonsel wea olketa givim hem encouragem man. Olketa elder mas “olsem wanfala ples for haed from wind and wanfala ples for haed from bigfala rain, olsem river long drae ples, olsem shadow bilong bigfala ston long hotfala ples.”—Isa. 32:2.

Sapos iu wanfala elder, waswe, olketa tok bilong iu strongim man and givim comfort? Olketa strongim olketa wea trae hard for servem Jehovah long faithful wei? Olketa strongim olketa for no givap for duim will bilong God nomata planti pipol no interest or againstim? Waswe sapos samfala long audience bilong iu feel sorre, garem bigfala hevi saed long selen, or deal witim wanfala big sik wea no eni treatment stap for datwan? Iu savve ‘strongim olketa brata bilong iu witim toktok bilong mouth bilong iu.’—Job 16:5.

Iusim chance wea iu garem olsem wanfala speaker for helpem olketa brata bilong iu kasem hope and strong from Jehovah and olketa samting wea hem provaedem.—Rom. 15:13; Eph. 6:10.

Remindim Audience Abaotem Samting wea Jehovah Duim Finis. Wanfala important wei for strongim narawan hem for showimaot hao Jehovah helpem pipol bilong hem long olketa hard taem bifor.—Rom. 15:4.

Jehovah talem Moses for “encouragem” and “strongim” Joshua bifor Israel go insaed long Promis Land, wea olketa enemy nation stap insaed long datfala taem. Hao nao Moses duim datwan? Front long Joshua, Moses remindim full nation abaotem olketa samting Jehovah duim for olketa taem olketa lusim Egypt. (Deut. 3:28; 7:18) Moses storyim tu hao Jehovah mekem olketa win againstim olketa Amorite. Then Moses encouragem Joshua: “Stand strong and no fraet.” (Deut. 31:1-8) Taem iu laek for encouragem olketa brata, waswe, iu helpem olketa for kasem strong long wei for rememberim olketa samting wea Jehovah duim finis for olketa?

Samfala taem olketa problem barava big tumas for samfala brata, gogo olketa daotem sapos olketa bae kasem olketa blessing bilong Kingdom. Remindim olketa hao iumi savve depend evribit long olketa promis bilong Jehovah.—Josh. 23:14.

Long samfala kantri olketa brata bilong iumi mas deal witim wei wea gavman tambuim waka for preachim gud nius. Long olketa ples olsem, olketa loving elder savve helpem olketa brata for kasem strong from olketa experience bilong olketa aposol bilong Jesus Christ. (Acts 4:1–5:42) And for mekhae long wei wea God kontrolem olketa samting wea happen long buk bilong Esther, bae barava helpem olketa brata for feel strong.

Samfala taem samfala attendim olketa kongregeson meeting bat no muv ahed. Maet olketa feel olsem God no savve forgivim olketa bikos living bilong olketa bifor hem wicked tumas. Maet iu storyim wei wea Jehovah hem deal witim King Manasseh. (2 Chron. 33:1-16) Or maet iu story abaotem pipol long Corinth bifor wea changem living bilong olketa, kamap olketa Christian, and wea God kolem olketa raeteous.—1 Cor. 6:9-11.

Waswe, samfala feel olsem olketa problem wea olketa kasem showimaot God no appruvim olketa? Maet iu remindim olketa abaotem samting wea kasem Job and wei wea hem kasem bigfala blessing from hem go ahed faithful long Jehovah. (Job 1:1-22; 10:1; 42:12, 13; Ps. 34:19) Olketa false fren bilong Job laea and sei Job masbi duim wanfala sin. (Job 4:7, 8; 8:5, 6) Long narasaed, Paul and Barnabas strongim olketa disaepol and “encouragem olketa for stap insaed long faith,” taem olketa sei: “Iumi mas go insaed long kingdom bilong God thru long planti trabol.” (Acts 14:21, 22) Long sem wei distaem, iu savve strongim olketa wea kasem hevi taem iu storyim hao fasin for stand strong long taem bilong trabol hem samting wea evri Christian mas duim and hao God hem barava tinghae long datwan.—Prov. 27:11; Matt. 24:13; Rom. 5:3, 4; 2 Tim. 3:12.

Encouragem olketa wea lisin for tingim wei wea Jehovah fulfillim olketa promis bilong hem long laef bilong olketa wanwan. Sapos iu remindim olketa, maet olketa savve tingim hao Jehovah hem duim samting finis for olketa wanwan, olsem hem promisim. Iumi readim long Psalm 32:8: “Mi bae mekem iu for garem fasin for luksavve and teachim iu long wei wea iu mas followim. Mi bae givim advaes and lukluk long iu.” Long wei for helpem olketa wea lisin for remember hao Jehovah hem leadim or strongim olketa, bae iu helpem each wan for lukim wei wea Jehovah lukaftarem olketa wanwan and hao hem bae barava helpem olketa for deal witim eni test wea olketa feisim distaem.—Isa. 41:10, 13; 1 Pet. 5:7.

Showimaot Hapi Long Samting wea God Duim Distaem. Taem iu lukaotem wei for encouragem olketa brata bilong iu, mekhae long samting wea Jehovah hem duim distaem. For showimaot hapi bilong iu abaotem olketa samting hia taem iu story bae muvim heart bilong olketa wea lisin for garem semkaen feeling.

Tingim hao Jehovah hem helpem iumi for stand strong and for deal witim olketa hevi long laef. Hem showim iumi best wei for live. (Isa. 30:21) Hem explainim why nao criminal fasin, wei wea no followim justice, poor living, sik, and dae stap, and talem iumi hao nao hem bae finisim evri samting hia. Hem givim iumi wanfala loving famili bilong olketa brata. Hem givim iumi barava spesol privilege bilong prea. Hem givim iumi privilege for kamap olketa Witness bilong hem. Hem showim long iumi hao Christ hem sidaon finis long throne bilong hem long heven and hao olketa last day bilong disfala old system klosap for finis nao.—Rev. 12:1-12.

Witim evri blessing hia iumi garem tu olketa kongregeson meeting, assembly, and convention. Taem iu storyim olketa samting hia long wei wea showimaot iu barava tinghae long olketa, iu bae strongim disison bilong narawan for evritaem hipap witim olketa brata.—Heb. 10:23-25.

Olketa report wea pruvim hao Jehovah hem blessim waka bilong iumi long field ministry strongim iumi tu. Long first century, taem Paul and Barnabas travel go long Jerusalem, olketa mekem “olketa brata barava hapi fogud” taem olketa storyim wei wea olketa pipol bilong olketa nation kamap Christian. (Acts 15:3) Iu savve mekem olketa brata hapi fogud tu taem iu sharem olketa experience wea buildimap man.

Bae hem givim moa encouragement tu sapos iu helpem olketa wanwan for luksavve hao waka bilong each wan hem important. Praisem olketa for part wea olketa duim long Christian ministry. Praisem olketa wea hard for duim staka samting from olketa olo or sik bat wea faithful for stand strong. Remindim olketa hao Jehovah no forgetim love wea olketa showimaot for nem bilong hem. (Heb. 6:10) Faith wea stap strong nomata man kasem test hem wanfala barava spesol samting. (1 Pet. 1:6, 7) Iumi mas remindim olketa brata bilong iumi abaotem diswan.

Story Witim Feeling Abaotem Hope for Future. Olketa promis bilong God for future barava encouragem evriwan wea lovem hem. Maet klosap evriwan long audience herem olketa promis hia planti taem finis. Bat from iu showimaot long toktok bilong iu hao iu tinghae long olketa promis hia, iu savve mekem pipol interest for herem moa, mekem olketa trustim wei wea olketa bae fulfill, and mekem heart bilong olketa fulap witim thankiu. Wei wea iu followim olketa samting iu lanem long Theocratic Ministry Skul savve helpem iu for duim olsem.

Jehovah nao main wan for givim encouragement and strong long pipol bilong hem. Bat, iu savve waka witim hem for givim olketa blessing hia. Taem iu givim tok long kongregeson, iusim gud chance for duim olsem.