Chapter Ten
Wanfala Kingdom “wea Bae Nating Savve Finis”
1. Olketa samting wea happen long world insaed history bilong olketa man hem showimaot wanem tru samting?
OLKETA samting wea happen long world evriday showaot hao olketa man nating faendem hapi taem olketa rejectim sovereign rul bilong Jehovah and trae for rulim olketa seleva. No eni gavman bilong man givim help wea evri difren man needim. Nomata olketa man garem bigfala savve winim enitaem bifor saed long science, olketa no savve winim sik or finisim dae for eniwan. Rul bilong olketa man nating finisim war, raf fasin, crime, raverave fasin, or poor living. Olketa raf gavman still rulim pipol long planti kantri. (Ecclesiastes 8:9) Technology, greedy fasin, and wei for no savve hem spoelem land, wata, and air. Wei wea olketa bigman iusim selen long rong wei mekem planti pipol hard for kasem need bilong olketa long living. Planti thousand year bilong rul bilong olketa man mekem disfala tru toktok hem showaot klia: “Wei bilong man hem no bilong hem. Hem no bilong man wea wakabaot for disaedem gogo bilong hem.”—Jeremiah 10:23.
2. Wanem nao only wei for stretem olketa problem bilong man?
2 Wanem nao savve stretem diswan? Kingdom bilong God, wea Jesus teachim olketa disaepol bilong hem for prea for hem: “Letem kingdom bilong iu kam. Letem will bilong iu kamap long earth, olsem long heven.” (Matthew 6:9, 10) Kingdom bilong God long heven nao wanem 2 Peter 3:13 storyim olsem “niu heven,” wea bae rul ovarem “niu earth,” wea hem nao raeteous community bilong olketa man. From Kingdom bilong God barava important Jesus mekem datwan olsem main theme long preaching waka bilong hem. (Matthew 4:17) Hem showim wea nao datwan shud stap long living bilong iumi taem hem sei: “So, go ahed for luk aotem firstaem kingdom and raeteous fasin bilong hem.”—Matthew 6:33.
3. Why nao hem important tumas for lane abaotem Kingdom bilong God distaem?
3 Wei for lane abaotem Kingdom bilong God hem important tumas distaem, from klosap nao datfala Kingdom bae duim samting for changem for olowe rul long disfala earth. Daniel 2:44 talem profesi olsem: “Long taem bilong olketa king hia [olketa gavman wea rul distaem] God bilong heven bae startim wanfala kingdom [long heven] wea bae nating savve finis. And datfala kingdom bae no go long eni narafala pipol [olketa man bae nating rul long earth moa]. Hem bae smasem and finisim evri kingdom hia [bilong distaem], and hemseleva nao bae stap olowe.” So, olketa last day distaem bae finis taem datfala Kingdom distroem disfala full wicked system. No eniwan bae daotem hao datfala Kingdom long heven fit for rulim disfala earth. Iumi thankiu tumas from wei for aotem staka hevi wea diswan bae givim hem barava klosap!
4. Saed long datfala Kingdom, wanem nao happen long heven long 1914, and why nao datwan important long iumi?
4 Long 1914, Christ Jesus hem kamap King and garem paoa for “go ahed for rul midolwan long olketa enemy [bilong hem].” (Psalm 110:1, 2) And long datfala year tu, “olketa last day” bilong disfala wicked system hem start. (2 Timothy 3:1-5, 13) Long semtaem, olketa samting wea Daniel lukim long wanfala profesi vision hem barava happen long heven. “Man From Taem Bifor Kam,” Jehovah God, givim long Son bilong man, Jesus Christ, “wei for rul and honor and kingdom, mekem evri pipol, nation and languis mas servem hem.” Daniel raet olsem taem hem storyim datfala vision: “Rul bilong hem for olowe and hem bae no finis, and kingdom bilong hem bae no eniwan spoelem.” (Daniel 7:13, 14) Thru long disfala Kingdom long heven wea Christ Jesus rulim, God bae openem wei for pipol wea lovem raeteous fasin for enjoyim planti gudfala samting wea insaed purpose bilong hem bifor, taem hem putim first dadi and mami long Paradaes.
5. Wanem information abaotem Kingdom nao iumi interest tumas long hem, and why nao olsem?
5 Waswe, iu want for kamap wanfala wea loyal for stap anda long datfala Kingdom? Sapos olsem, iu bae interest tumas long organization and waka bilong disfala gavman long heven. Iu bae want for savve wanem nao hem duim distaem, wanem hem bae duim long future, and wanem nao hem askem from iu. Taem iu study gud abaotem datfala Kingdom, wei wea iu tinghae long hem shud grow. Sapos iu stap anda long rul bilong hem, iu bae kamap fit for talem narafala pipol abaotem olketa nambawan samting wea Kingdom bilong God bae duim for olketa man wea obey.—Psalm 48:12, 13.
Olketa Ruler Insaed Kingdom Bilong God
6. (a) Hao nao olketa Scripture showaot hu nao garem sovereign rul wea showaot thru long Messiah Kingdom? (b) Hao nao samting wea iumi lanem abaotem Kingdom shud affectim iumi?
6 Wanfala first samting wea iu bae faendemaot nao hem hao disfala Messiah Kingdom hem samting wea kamaot from sovereign rul bilong Jehovah seleva. Jehovah nao givim “wei for rul and honor and kingdom” long Son bilong hem. Bihaen Son bilong God kasem paoa for start rul olsem King, olketa voice long heven fit for sei: “Kingdom ovarem world hem kamap kingdom bilong Lord [Jehovah God] and Christ bilong hem, and hem [Jehovah] bae rul olsem king for olowe and olowe.” (Revelation 11:15) So evri samting wea iumi lanem abaotem disfala Kingdom and wanem hem bae duim savve mekem iumi kamap moa klos long Jehovah. Samting wea iumi lanem shud putim insaed long iumi feeling for want for stap anda long sovereign rul bilong hem for olowe.
7. Why nao iumi shud interest tumas for savve hao Jesus Christ hem Mek-tu Ruler long Jehovah?
7 Tingim tu wei wea Jehovah putim Jesus Christ long throne olsem Mek-tu Ruler long hem. From hem Nambawan Wakman wea God iusim for wakem earth and olketa man, Jesus savve long olketa samting wea iumi needim winim eniwan long iumi. And tu, from start long history bilong olketa man, hem showimaot hao ‘hem laekem tumas olketa son bilong man.’ (Proverbs 8:30, 31; Colossians 1:15-17) Love bilong hem for olketa man big tumas dastawe hem kam long earth and givim laef bilong hem olsem wanfala ransom for iumi. (John 3:16) So hem openem wei for iumi kamap free from sin and dae and givim iumi chance for laef olowe.—Matthew 20:28.
8. (a) Long difren wei from olketa man wea rul, why nao gavman bilong God bae stap for olowe? (b) Hao nao “faithful and wise slave” join witim datfala gavman long heven?
8 Kingdom bilong God hem wanfala stedy gavman wea bae stap for olowe. Hem stap olowe bikos Jehovah seleva no savve dae. (Habakkuk 1:12) Long wei wea difren from olketa man wea king, Jesus Christ, datwan wea God markem for king, hem tu kanduit dae. (Romans 6:9; 1 Timothy 6:15, 16) Olketa wea bae rul witim Christ long heven nao 144,000 loyal servant bilong God wea kamaot from “evri tribe and languis and pipol and nation.” Olketa hia tu kasem wei for kanduit dae. (Revelation 5:9, 10; 14:1-4; 1 Corinthians 15:42-44, 53) Planti long olketa stap long heven finis, and sekson wea stap yet long earth olketa nao datfala “faithful and wise slave,” wea loyal for mekem olketa samting bilong Kingdom kamap moa big.—Matthew 24:45-47.
9, 10. (a) Wanem nogud samting wea divaedem pipol nao Kingdom bae aotem? (b) Sapos iumi no want for kamap enemy bilong Kingdom bilong God, wanem nao olketa samting wea iumi mas stap klia long hem?
9 Klosap nao, long taem wea hem markem, Jehovah bae sendem olketa army bilong hem for klinim disfala earth. Olketa bae distroem for olowe olketa man wea chus for no luksavve long sovereign rul bilong hem and lukdaonem olketa loving arrangement wea hem mekem thru long Jesus Christ. (2 Thessalonians 1:6-9) Datwan bae day bilong Jehovah, taem for vindicatem hem olsem Sovereign Bilong Universe. “Lukim! Datfala day bilong Jehovah bae kam, witim hot and bigfala kros, . . . mekem hem finisim evribit olketa sinner bilong datfala land.” (Isaiah 13:9) “Datfala day hem wanfala day bilong bigfala kros, day for mekem man feel nogud and garem bigfala wari, day bilong bigfala wind and for finisim evri samting, day bilong darkness and bilong no mas laet, day bilong olketa cloud and bilong smoke.”—Zephaniah 1:15.
10 Evri giaman religion and evri gavman bilong man and army bilong olketa, wea wicked ruler bilong disfala world wea iumi no lukim hem kontrolem, bae distroe for olowe. Evriwan wea showaot olketa saed witim world long wei for aftarem living wea selfish, no honest, and dirty bae dae. Satan and olketa demon bilong hem bae no savve spoelem olketa man long earth moa, bae olketa insaed prison for wan thousand year. Then Kingdom bilong God bae kontrolem evribit evri samting long earth. Datwan bae hem bigfala hapi for evriwan wea lovem raeteous fasin!—Revelation 18:21, 24; 19:11-16, 19-21; 20:1, 2.
Olketa Goal Bilong Kingdom —Hao Olketa Bae Kamap
11. (a) Hao nao datfala Messiah Kingdom bae fulfillim purpose bilong Jehovah for earth? (b) Wanem nao rul bilong Kingdom bae duim for pipol wea laef long earth long datfala taem?
11 Kingdom bilong Messiah bae fulfillim evribit firstfala purpose bilong God for earth. (Genesis 1:28; 2:8, 9, 15) Kam kasem distaem, olketa man fail for saportim datfala purpose. Nomata olsem, “earth wea bae kamap” bae stap anda long Son bilong man, Jesus Christ. Evriwan wea sev from judgment bilong Jehovah for disfala old system bae duim samting witim wan mind anda long Christ datfala King, olketa hapi for duim evri samting hem talem for mekem full earth kamap wanfala paradaes. (Hebrews 2:5-9) Evri man bae enjoyim waka wea hand bilong olketa duim and kasem gud samting evribit from olketa samting wea grow long disfala earth.—Psalm 72:1, 7, 8, 16-19; Isaiah 65:21, 22.
12. Hao nao olketa wea stap anda long Kingdom bae kasem wei for perfect long mind and body?
12 Taem God creatim Adam and Eve, tufala perfect, and purpose bilong God nao for earth fulap witim olketa pikinini bilong tufala, and enjoyim wei for perfect long mind and body. Datfala purpose bae kamap tru evribit anda long rul bilong Kingdom. Diswan minim olketa samting wea kamaot from sin no savve stap, and for kasem datwan, Christ hem serve no olsem King nomoa bat olsem Hae Priest tu. Long patient wei hem bae helpem olketa wea obey for kasem gud samting from sakrifaes bilong laef bilong hem olsem man wea garem paoa for kavarem sin.
13. Wanem gudfala physical samting nao bae kamap anda long Kingdom rul?
13 Anda long rul bilong Kingdom, olketa wea stap long earth bae kasem olketa nambawan physical samting. “Long datfala taem, eye bilong olketa wea blind bae open, and ear bilong olketa wea earpas bae no sat moa. Long datfala taem, man wea cripple bae klaemap olsem wanfala deer, and tongue bilong man wea no savve toktok bae singaot witim hapi.” (Isaiah 35:5, 6) Body wea wei for olo or sik spoelem bae kamap fresh winim pikinini, and olketa wea garem nogud sik bae kasem barava gudfala health. “Letem body bilong hem kamap gudfala moa winim taem hem young, letem hem kasem bak strong olsem youngfala man.” (Job 33:25) Day bae kam taem no eniwan bae garem reason for sei, “Mi sik.” Why nao olsem? Bikos olketa man wea fraet long God bae no garem hevi bilong sin and olketa nogud samting wea kamaot from datwan. (Isaiah 33:24; Luke 13:11-13) Tru nao, God “bae aotem krae from eye bilong olketa, and dae bae nomoa, sorre and singaot and pain bae nomoa tu. Evri samting bifor hem finis nao.”—Revelation 21:4.
14. Wanem nao insaed long wei for kamap wanfala perfect man?
14 Bat, wei for kamap perfect hem minim moa samting winim wei for garem gudfala body and mind nomoa. Insaed diswan hem wei for showimaot olketa fasin bilong Jehovah, bikos God ‘wakem iumi long image bilong hem, long wei wea olsem hem.’ (Genesis 1:26) For kasem datwan iumi bae needim bigfala education. Insaed long datfala niu world, “raeteous fasin bae stap.” So, olsem Isaiah hem talem profesi, “raeteous fasin nao samting wea pipol long datfala gudfala land bae barava lanem.” (2 Peter 3:13; Isaiah 26:9) Disfala fasin lead go long peace—midolwan long pipol bilong evri kala skin, midolwan long olketa klos fren, insaed long famili and winim evriwan, witim God seleva. (Psalm 85:10-13; Isaiah 32:17) Olketa wea lanem raeteous fasin bilong God bae isisi lanem will bilong God for olketa. Taem love for Jehovah hem stap deep insaed long heart bilong olketa, bae olketa followim olketa wei bilong hem long evri part long laef bilong olketa. Olketa bae fit for talem disfala sem toktok bilong Jesus, ‘Evritaem mi duim olketa samting wea mekem Father bilong mi hapi.’ (John 8:29) Laef bae gud tumas taem evri man duim datwan!
Olketa Samting Hem Duim Finis
15. Iusim olketa kwestin long disfala paragraf for mekhae long olketa samting wea Kingdom duim and showimaot wanem iumi shud duim distaem.
15 Olketa nambawan samting wea Kingdom bilong God and olketa wea stap anda long hem duim finis barava showaot klia. Olketa kwestin and scripture long daon bae mekem iu rememberim samfala samting hia, and tu olketa samting wea evri pipol wea stap anda long Kingdom savve duim and shud duim distaem.
Hu nao first wan wea Kingdom tek akson againstim, and wanem nao bae kamaot from datwan? (Revelation 12:7-10, 12)
Start long taem wea Christ kamap king, wei for hipimap olketa member bilong wanem grup nao go ahed? (Revelation 14:1-3)
Olsem Matthew 25:31-33 talem, wanem waka nao Jesus sei bae hem duim bihaen bigfala trabol hem start?
Wanem waka wea mas firstaem nao go ahed distaem? Hu nao join insaed diswan? (Psalm 110:3; Matthew 24:14; Revelation 14:6, 7)
Why nao olketa bilong politik and religion wea againstim preaching waka no fit for stopem? (Zechariah 4:6; Acts 5:38, 39)
Wanem change nao happen long living bilong olketa wea stap anda long rul bilong Kingdom? (Isaiah 2:4; 1 Corinthians 6:9-11)
Kingdom for Wan Thousand Year
16. (a) Christ bae rul for hao long? (b) Wanem nambawan samting nao bae kamap insaed and bihaen long datfala taem?
16 Bihaen Satan and olketa demon bilong hem go insaed long prison, Jesus Christ and 144,000 wea rul witim hem bae rul olsem king and priest for datfala wan thousand year. (Revelation 20:6) Long datfala taem, olketa man bae kamap perfect, and sin and dae wea olketa kasem from Adam bae finis for olowe. Long end bilong datfala Thousand Year Rul, bihaen hem win for duim assignment bilong hem olsem Messiah King and Priest, Jesus “givim go kingdom” long Dadi bilong hem, “mekem God mas kamap evri samting long evriwan.” (1 Corinthians 15:24-28) Long datfala taem, Satan bae kamap free for lelebet taem for testim olketa man wea free from sin saed long wei wea olketa saportim sovereign rul bilong Jehovah long universe. Taem datfala lastfala test hem finis, Jehovah bae distroem Satan and olketa wea bighed wea saed witim hem. (Revelation 20:7-10) Olketa wea saportim sovereign rul bilong Jehovah—raet wea hem garem for rul—showimaot evribit strongfala loyal fasin bilong olketa. Then olketa bae kam insaed long barava wei for fren witim Jehovah, and hem bae acceptim olketa olsem son and dota, wea hem appruvim for laef olowe.—Romans 8:21.
17. (a) Wanem nao bae happen long Kingdom long end bilong datfala wan thousand year? (b) Long wanem wei nao datfala Kingdom “bae nating savve finis”?
17 Bihaen long evri samting hia, waka bilong Jesus and 144,000 saed long disfala earth bae change. Wanem waka nao bae olketa duim long future? Bible hem no talem. Bat sapos iumi faithful for saportim sovereign rul bilong Jehovah, bae iumi stap laef long end bilong datfala Thousand Year Rul for faendemaot wanem nao purpose bilong Jehovah for olketa and for disfala nambawan universe tu. Nomata olsem, wan thousand year rul bilong Christ bae “for olowe” and Kingdom bilong hem “bae no finis.” (Daniel 7:14) Long wanem wei? Wanfala samting nao, from Jehovah bae Ruler, paoa for rul bae no go long hand bilong narafala pipol wea garem difren goal. And tu, datfala Kingdom “bae nating savve finis” from olketa samting wea hem duim bae stap for olowe. (Daniel 2:44) And datfala Messiah King and Priest witim olketa wea king and priest witim hem bae kasem honor for olowe from olketa faithful for servem Jehovah.
Review
• Why nao Kingdom bilong God hem only wei for stretem olketa problem bilong man? Wanem taem nao King long Kingdom bilong God start for rul?
• Wanem samting nao iu laekem tumas abaotem Kingdom bilong God and wanem nao hem bae duim?
• Wanem samting wea Kingdom duim nao iumi lukim finis, and hao nao iumi part long olketa samting hia?
[Piksa long page 92, 93]
Anda long Kingdom bilong God, evri pipol bae lanem raeteous fasin