Chapter Fotin
Hao Nao Jehovah Directim Organization Bilong Hem?
1. Wanem information abaotem organization bilong Jehovah nao Bible showimaot, and why nao datwan important long iumi?
WASWE, God garem wanfala organization? Olketa Scripture sei hem garem. Insaed Word bilong hem, iumi savve lukim lelebet datfala nambawan organization long heven. (Ezekiel 1:1, 4-14; Daniel 7:9, 10, 13, 14) Nomata iumi no savve lukim part hia, diswan barava affectim olketa tru worshiper distaem. (2 Kings 6:15-17) Organization bilong Jehovah garem tu wanfala part wea iumi savve lukim long earth. Bible helpem iumi for minim wanem nao datwan and hao Jehovah directim.
Luksavve Long Part Long Earth
2. Wanem niu kongregeson nao God startim?
2 For 1,545 year, nation bilong Israel nao kongregeson bilong God. (Acts 7:38) Bat Israel fail for obeyim olketa law bilong God and rejectim Son bilong hem. From diswan, Jehovah rejectim and lusim datfala kongregeson. Jesus sei olsem long olketa Jew: “Lukim! God hem lusim haos bilong iufala nao.” (Matthew 23:38) Then God hem startim wanfala niu kongregeson, wea hem mekem wanfala niu covenant witim olketa. Insaed long disfala kongregeson hem 144,000 wea God chusim for join witim Son bilong hem long heven.—Revelation 14:1-4.
3. Wanem nao happen long Pentecost 33 C.E. wea pruvim klia hao God iusim wanfala niu kongregeson?
3 Holy spirit bilong Jehovah anointim olketa first wan bilong datfala niu kongregeson long Pentecost 33 C.E. Bible storyim datfala spesol taem olsem: “Nao taem day bilong festival bilong Pentecost hem go ahed evriwan hipap tugeta long sem ples, and seknomoa wanfala noise olsem bigfala wind wea blow strong kamaot from heven, and hem fulimap full haos wea olketa sidaon insaed. And olketa lukim samting wea luk olsem fire wea divaed go for evriwan, and wanfala stap antap long each wan long olketa, and olketa fulap witim holy spirit.” (Acts 2:1-4) So, spirit bilong God pruvim klia hao diswan nao sekson bilong pipol wea God bae iusim for fulfillim purpose bilong hem anda long lead bilong Jesus Christ long heven.
4. Hu nao insaed long organization bilong Jehovah long earth?
4 Distaem, wanfala smol sekson bilong datfala 144,000 nomoa stap long earth. Bat olsem Bible profesi talem, “wanfala big crowd” bilong “nara sheep,” planti million long olketa, fren long klos wei witim datfala anointed remnant. Jesus, datfala Nambawan Shepherd, hem mekem olketa nara sheep hia witim datfala smol sekson kamap wanfala flock anda long hem olsem wanfala Shepherd bilong olketa. (Revelation 7:9; John 10:11, 16) Evriwan hia part bilong wanfala kongregeson wea garem wan mind and hem nao organization bilong Jehovah long earth.
Organization wea God Rulim
5. Hu nao directim organization bilong God, and hao nao hem duim datwan?
5 Disfala toktok bilong Bible “kongregeson bilong living God” showimaot klia hu nao directim. God nao rulim disfala organization. Jehovah givim direction long pipol bilong hem thru long Jesus, wea Hem appointim for Hed bilong kongregeson, and thru long Word bilong Hem, Bible.—1 Timothy 3:14, 15; Ephesians 1:22, 23; 2 Timothy 3:16, 17.
6. (a) Hao nao wei for directim kongregeson hem showaot long first century? (b) Wanem nao showaot Jesus hem still Hed bilong kongregeson?
6 Diskaen wei for directim hem barava showaot klia long Pentecost. (Acts 2:14-18, 32, 33) Hem showaot klia taem angel bilong Jehovah directim wei for tekem go gud nius long Africa, taem voice bilong Jesus directim Saul bilong Tarsus for change, and taem Peter startim preaching waka midolwan long olketa Gentile. (Acts 8:26, 27; 9:3-7; 10:9-16, 19-22) Bat gogo, no eniwan herem moa eni voice from heven, or lukim eni angel, or kasem mirakol wea kam from spirit. Nomata olsem, Jesus promis finis: “Lukim! Mi stap witim iufala evriday go kasem taem bilong end bilong disfala system.” (Matthew 28:20; 1 Corinthians 13:8) Olketa Jehovah’s Witness distaem acceptim wei wea Jesus directim olketa. Sapos nomoa, wei for talemaot message bilong Kingdom midolwan long pipol wea strong for againstim olketa bae hem barava hard samting for duim.
7. (a) Hu nao insaed long datfala “faithful and wise slave,” and why nao olsem? (b) Wanem assignment nao datfala “slave” kasem?
7 No longtaem bifor hem dae, Jesus talem olketa disaepol bilong hem abaotem datfala “faithful and wise slave” wea Masta bae givim spesol responsibility long olketa. Datfala “slave” bae stap taem Lord go ap long heven and bae go ahed for waka hard taem Christ kam bak long wei wea no eniwan lukim witim Kingdom paoa. Kaen story olsem bae no fitim wanfala man nomoa, bat hem fitim anointed kongregeson bilong Christ. From hem baem datwan witim blood bilong hem, Jesus story abaotem datwan olsem “slave” bilong hem. Hem appointim olketa member bilong hem for mek disaepol and for go ahed for feedim olketa, givim olketa “[spiritual] kaikai long barava taem.”—Matthew 24:45-47; 28:19; Isaiah 43:10; Luke 12:42; 1 Peter 4:10.
8. (a) Wanem nao olketa responsibility wea datfala slave sekson kasem distaem? (b) Why nao hem important for iumi followim instruction wea iumi kasem from sekson wea God iusim?
8 Bikos datfala slave sekson loyal for duim waka bilong Masta taem hem kam bak long wei wea no eniwan lukim long 1914, samfala pruv showaot hem kasem moa responsibility long 1919. Start long datfala taem witness waka abaotem datfala Kingdom hem go kasem evriwea long earth, and diswan hipimap wanfala big crowd bilong olketa worshiper bilong Jehovah for mekem olketa laef thru long datfala big trabol. (Matthew 24:14, 21, 22; Revelation 7:9, 10) Olketa hia tu needim spiritual kaikai, and datfala slave sekson redyim diswan for olketa. So, for mekem Jehovah hapi, iumi need for acceptim instruction wea hem givim thru long disfala sekson and followim datwan.
9, 10. (a) Long first century, wanem arrangement nao stap for stretem olketa kwestin abaotem teaching and for givim direction long waka for preachim gud nius? (b) Wanem arrangement for organizem pipol bilong Jehovah nao stap distaem?
9 Samfala taem, olketa kwestin kamap abaotem teaching and wei for duim samting. Wanem nao shud happen? Acts chapter 15 story abaotem hao olketa stretem wanfala kwestin wea kamap abaotem olketa Gentile wea biliv. Olketa tekem go diswan long olketa aposol and older man long Jerusalem, wea duim waka olsem wanfala governing body. Olketa man hia savve mistek, bat God iusim olketa. Olketa iusim Bible for ting raonem disfala kwestin and lukim tu pruv wea showaot spirit bilong God hem duim samting wea startim wei for preach long olketa Gentile. Then olketa mekem wanfala disison. God blessim datfala arrangement. (Acts 15:1-29; 16:4, 5) Datfala governing body appointim samfala man for duim waka for preachim Kingdom long olketa nara ples.
10 Long taem bilong iumi, insaed long Governing Body bilong organization bilong Jehovah long earth hem olketa anointed brata from olketa difren kantri wea stap long headquarter bilong Olketa Jehovah’s Witness. Anda long hedship bilong Jesus Christ, datfala Governing Body mekem klin worship go kasem evri kantri, lukaftarem preaching waka bilong Olketa Jehovah’s Witness long planti thousand kongregeson. Olketa wea insaed long datfala Governing Body garem sem tingting olsem aposol Paul, wea raet olsem long olketa nara Christian: “No from mifala masta long faith bilong iufala, bat mifala waka witim iufala for iufala hapi, from faith bilong iufala nao mekem iufala standap.”—2 Corinthians 1:24.
11. (a) Hao nao olketa elder and ministerial servant kasem appointment? (b) Why nao iumi shud waka long klos wei witim olketa wea kasem appointment?
11 Olketa Jehovah’s Witness evriwea long world depend long datfala Governing Body nao for chusim olketa brata wea fit, and then markem olketa for appointim olketa elder and ministerial servant for lukaftarem olketa kongregeson. Olketa wea kasem appointment mas kasem olketa mark wea stap insaed long Bible and olketa mark hia fitim man wea no perfect and savve mekem mistek. Olketa elder wea mekem recommendation and olketa wea mekem appointment garem important responsibility front long God. (1 Timothy 3:1-10, 12, 13; Titus 1:5-9) So, olketa prea for help bilong spirit bilong God and luk aotem kaonsel from Word bilong hem. (Acts 6:2-4, 6; 14:23) Iumi mas showimaot wei for tinghae long olketa “present olsem man” hia wea helpem iumi evriwan for “kasem wan mind insaed long datfala faith.”—Ephesians 4:8, 11-16.
12. Hao nao Jehovah iusim olketa woman insaed long theocratic arrangement?
12 Bible sei olketa man nao mas lukaftarem kongregeson. Diswan no daonem olketa woman, bikos samfala long olketa bae rul olsem king insaed Kingdom long heven, and olketa nao duim bigfala part bilong preaching waka. (Psalm 68:11) And tu, long wei for evritaem duim olketa responsibility insaed famili, olketa woman share for mekem kongregeson garem gudfala nem. (Titus 2:3-5) Bat olketa man wea kasem appointment nao duim teaching insaed long kongregeson.—1 Timothy 2:12, 13.
13. (a) Bible encouragem olketa elder for garem wanem tingting abaotem position bilong olketa? (b) Iumi evriwan savve share long wanem privilege?
13 Long world, pipol ting long man wea garem hae position olsem hem bigman, bat insaed long organization bilong God rul hem olsem: “Man wea showaot hambol fasin midolwan long iufala hem nao man wea nambawan.” (Luke 9:46-48; 22:24-26) Olketa Scripture givim kaonsel long olketa elder for no olsem boss ovarem olketa bilong God, bat olketa mas kamap olsem example long flock. (1 Peter 5:2, 3) Evri Witness bilong Jehovah, no tu-thri nomoa, man and woman, garem privilege for stand for Sovereign bilong universe, for hambol for tok aot for saed long nem bilong hem and talem pipol evriwea abaotem Kingdom bilong hem.
14. Iusim olketa scripture long daon for storyim olketa kwestin wea stap long end bilong paragraf.
14 Hem gud for askem iumiseleva: ‘Waswe, mi really tinghae long wei wea Jehovah hem directim organization bilong hem long earth? Waswe, tingting, toktok, and akson bilong mi showaot mi ting olsem?’ Wei for ting raonem olketa point long daon savve helpem iumi wanwan for duim datwan.
Sapos mi barava stap anda long Christ olsem Hed bilong kongregeson, then, olsem olketa scripture hia showimaot, wanem nao bae mi go ahed for duim? (Matthew 24:14; 28:19, 20; John 13:34, 35)
Taem mi acceptim olketa spiritual present and arrangement wea kam thru long datfala slave sekson and Governing Body bilong hem, hu nao mi showimaot respect long hem? (Luke 10:16)
Hao nao evriwan insaed long kongregeson, especially olketa elder, shud deal witim each other? (Romans 12:10)
15. (a) Tingting bilong iumi abaotem organization bilong Jehovah long earth hem showimaot wanem samting? (b) Wanem nao olketa chance wea stap for iumi pruvim Devil hem man for laea and for iumi mekem heart bilong Jehovah hapi?
15 Jehovah hem iusim organization bilong hem long earth wea stap anda long Christ for directim iumi distaem. Hao iumi ting abaotem disfala arrangement showimaot hao iumi ting abaotem kwestin bilong sovereign rul. (Hebrews 13:17) Satan sei main samting iumi tingim hem iumiseleva nomoa. Bat sapos iumi serve long eni wei wea need hem stap and stap klia long wei for pullim nara pipol for ting strong long iumi nomoa, iumi pruvim Devil hem man for laea. Sapos iumi lovem and respectim olketa wea lead midolwan long iumi and no ‘favorim narawan for kasem gud samting for iumiseleva,’ iumi mekem Jehovah hapi. (Jude 16; Hebrews 13:7) Taem iumi loyal long organization bilong Jehovah, iumi showaot Jehovah nao hem God bilong iumi and iumi wan mind for worshipim hem.—1 Corinthians 15:58.
Review
• Wanem nao organization bilong Jehovah long earth distaem? Wanem nao purpose bilong hem?
• Hu nao Hed bilong kongregeson, and wanem arrangement long earth nao hem provaedem for directim iumi long loving wei?
• Wanem gudfala wei for tingting nao iumi shud mekem grow for olketa long organization bilong Jehovah?
[Piksa long page 133]
Jehovah directim iumi thru long organiza- tion bilong hem long earth anda long Christ