Chapter Fiftin
Lisin Long Kaonsel, Acceptim Discipline
1. (a) Why nao iumi evriwan needim kaonsel and discipline? (b) Wanem kwestin nao iumi need for ting raonem?
BIBLE sei long James 3:2: “Iumi evriwan foldaon staka taem.” Iumi savve tingim planti taem wea iumi no kasem olketa mark wea Word bilong God encouragem iumi for kasem. So iumi luksavve hao Bible tok tru taem hem sei: “Lisin long kaonsel and acceptim discipline, mekem iu bae kamap wise long future.” (Proverbs 19:20) For sure iumi changem finis samfala samting long living for fitim teaching bilong Bible. Bat hao nao feeling bilong iumi sapos nara Christian kaonselem iumi long wanfala point?
2. Wanem nao iumi shud duim taem iumi kasem kaonsel?
2 Samfala trae for faendem excuse, sei datwan hem no serious samting, or muvim blame go long narawan. Bat hem moabeta for lisin long kaonsel and followim. (Hebrews 12:11) Tru, no eniwan mas ting narawan shud perfect, or evritaem givim kaonsel abaotem smol samting or samting wea Bible sei man seleva fit for chusim. And tu, maet datwan wea givim kaonsel no tingim evri saed, and long wei wea showaot respect, iumi savve talem hem. Bat long chapter hia, bae iumi sei kaonsel or discipline hia hem fitim, and kam from Bible. Hao nao man shud ting long hem?
Example for Tingim Taem Iumi Kasem Kaonsel
3, 4. (a) Wanem nao stap insaed Bible wea savve helpem iumi for mekem grow stretfala tingting abaotem kaonsel and discipline? (b) Wanem nao King Saul duim taem hem kasem kaonsel, and wanem nao kamaot from datwan?
3 Word bilong God garem olketa experience abaotem pipol taem olketa kasem kaonsel wea fitim. Samfala taem, olketa kasem kaonsel wea join witim discipline. Wanfala nao hem King Saul bilong Israel. Hem no obeyim Jehovah saed long nation bilong Amalek. Olketa Amalekite againstim olketa servant bilong God, and Jehovah judgem olketa for dae and tu evri animal bilong olketa. Bat King Saul no killim dae king bilong olketa and olketa gudfala animal bilong olketa.—1 Samuel 15:1-11.
4 Jehovah sendem profet Samuel for repruvim Saul. Wanem nao Saul duim? Hem trae for pruvim hao hem winim olketa Amalekite and hao hem disaed for no killim dae king bilong olketa. Nomata olsem, datwan hem againstim komand bilong Jehovah. (1 Samuel 15:20) Saul trae for pushim blame go long pipol for wei wea hem no killim dae olketa animal taem hem sei: “Mi fraet long olketa pipol and so mi obeyim wanem olketa talem.” (1 Samuel 15:24) Hem tingim nomoa big nem bilong hemseleva, and hem askem Samuel for honorim hem front long olketa pipol. (1 Samuel 15:30) Gogo, Jehovah rejectim Saul olsem king.—1 Samuel 16:1.
5. Wanem nao happen long King Uzziah taem hem rejectim kaonsel?
5 King Uzziah bilong Judah “duim samting againstim God bilong hem Jehovah and go insaed long temple bilong Jehovah for bonem incense.” (2 Chronicles 26:16) Bat law sei olketa priest nomoa savve offerim incense. Taem datfala chief priest trae for stopem Uzziah, king hem kros fogud. Wanem nao happen? Bible sei: “Leprosy hem kasem forhed bilong hem . . . bikos Jehovah mekem datwan kasem hem. And Uzziah datfala king go ahed for garem leprosy go kasem day wea hem dae.”—2 Chronicles 26:19-21.
6. (a) Why nao Saul and Uzziah againstim kaonsel? (b) Why nao wei for againstim kaonsel hem wanfala serious problem?
6 Why nao Saul and Uzziah faendem hard for acceptim kaonsel? Main problem hem praod fasin, tufala tinghae tumas long seleva. Planti mekem olketa seleva kasem sorre bikos long datfala fasin. Olketa tingse wei for acceptim kaonsel hem minim olketa garem wik point or hem spoelem nem bilong olketa. Bat praod fasin hem wanfala wik point. Praod fasin hem blokem tingting bilong man wea mekem hem againstim help wea Jehovah provaedem thru long Word and organization bilong hem. Dastawe Jehovah givim disfala warning: “Praod fasin hem kam bifor man foldaon, and praodfala spirit bifor hem stambol.”—Proverbs 16:18; Romans 12:3.
Acceptim Kaonsel
7. Wanem nao olketa gudfala leson wea iumi savve lanem from samting wea Moses duim taem hem kasem kaonsel?
7 Bible garem olketa gudfala example tu bilong olketa wea acceptim kaonsel, and iumi savve lanem samting from olketa hia. Tingim Moses, wea dadi-in-law bilong hem givim gudfala kaonsel long hao for deal witim staka waka bilong hem. Moses lisin long hem and stretawe followim. (Exodus 18:13-24) Nomata Moses garem bigfala paoa, why nao hem acceptim kaonsel? Bikos hem hambol. “Datfala man Moses hem garem kwaet fasin winim evri nara man wea stap antap long graon.” (Numbers 12:3) Hao important nao kwaet fasin? Zephaniah 2:3 showim hao wei for garem diswan savve sevem laef bilong iumi.
8. (a) Wanem nao olketa sin wea David duim? (b) Wanem nao David talem taem Nathan repruvim hem? (c) Wanem nao kamaot from olketa sin bilong David?
8 King David duim adultery witim Bath-sheba and trae for haedem taem hem mekem wei for Uriah, hasband bilong Bath-sheba, for dae. Jehovah sendem profet Nathan for repruvim David. Hem repent and kwiktaem sei: “Mi sin finis againstim Jehovah.” (2 Samuel 12:13) Jehovah acceptim wei wea David repent bat hem mas still kasem olketa samting wea kamaot from rong wea hem duim. Jehovah talem hem hao wanfala sword “bae no lusim haos bilong [hem],” and olketa waef bilong hem “olketa nara man” nao bae tekem, and son wea born from adultery bilong hem “bae dae.”—2 Samuel 12:10, 11, 14.
9. Wanem nao iumi shud no forgetim sapos iumi kasem kaonsel or discipline?
9 King David savve long gud samting wea kamaot from wei for lisin long gudfala kaonsel. Planti taem, hem sei thankiu long God for wei wea hem kasem datwan. (1 Samuel 25:32-35) Waswe, iumi olsem tu? Sapos olsem, bae iumi kasem protection againstim wei for talem and duim planti samting wea iumi maet sorre long hem bihaen. Bat waswe sapos iumi duim samting wea lead go for iumi kasem kaonsel or discipline? Iumi mas nating forgetim hao diswan hem pruvim love bilong Jehovah, for iumi kasem gud samting for olowe.—Proverbs 3:11, 12; 4:13.
Mekem Grow Olketa Barava Spesol Fasin
10. Jesus point go long wanem fasin wea olketa wea bae go insaed long Kingdom needim?
10 For garem gudfala wei for fren witim Jehovah and olketa Christian brata bilong iumi, iumi need for mekem grow samfala fasin. Jesus point go long wanfala fasin hia taem hem putim wanfala pikinini midolwan olketa disaepol and sei: “Sapos iufala no tan raon and kamap olsem olketa young pikinini, iufala bae nating savve go insaed long kingdom bilong heven. Dastawe, eniwan wea bae kamap hambol olsem disfala young pikinini, hem nao nambawan long kingdom bilong heven.” (Matthew 18:3, 4) Olketa disaepol bilong Jesus need for mekem grow hambol fasin, bikos olketa raoa midolwan olketa seleva abaotem hu nao hem nambawan.—Luke 22:24-27.
11. (a) Iumi need for hambol front long hu, and why nao olsem? (b) Sapos iumi hambol, wanem nao bae iumi duim taem iumi kasem kaonsel?
11 Aposol Peter raet olsem: “Iufala evriwan, taetem hambol tingting raonem iufala taem iufala deal witim narawan, bikos God hem againstim praod pipol, bat hem showimaot kaeness wea man no fit for kasem long olketa hambol wan.” (1 Peter 5:5) Iumi savve iumi need for hambol front long God, bat disfala scripture showimaot iumi need for hambol tu witim olketa nara brata and sista. Sapos iumi olsem, bae iumi no les long olketa stretfala idea wea narawan givim bat bae iumi lane from olketa.—Proverbs 12:15.
12. (a) Wanem important fasin nao join long klos wei witim hambol fasin? (b) Why nao iumi shud tingim wei wea fasin bilong iumi affectim narafala pipol?
12 Samting wea join long klos wei witim hambol fasin hem wei for tingim wanem bae helpem nara pipol. Aposol Paul raet olsem: “Letem man go ahed for luk aotem, no gudfala samting for hemseleva, bat for narafala man. . . . Dastawe, nomata iufala kaikai or drink or duim eni samting, duim evri samting for glory bilong God. No kamap samting wea mekem olketa Jew and Greek and kongregeson bilong God stambol.” (1 Corinthians 10:24-33) Paul no sei iumi shud aotem olketa samting wea iumiseleva laekem, bat hem encouragem iumi for no duim eni samting wea maet pullim narawan for duim samting wea conscience bilong hem talem hem rong.
13. Wanem example nao maet showimaot sapos hem fasin bilong iumi for followim Bible kaonsel?
13 Waswe, iu putim samting wea bae helpem nara pipol firstaem long wanem iuseleva laekem? Iumi evriwan shud lane for duim datwan. Planti wei stap for duim olsem. Example, tingim wei for werem kaleko and lukluk bilong man. Diswan followim samting wea iu laekem and shud agree witim Bible instruction for showimaot respect, no olabaot, and klin. Bat sapos iu herem hao wei wea iu werem kaleko and lukluk bilong iu hem stopem pipol for lisin long Kingdom message, bikos long kastom bilong pipol long community bilong iu, waswe, bae iu change? Tru nao, wei for helpem nara man kasem laef olowe hem moa important winim wei for mekem man seleva hapi.
14. Why nao hem important for mekem grow hambol fasin and wei for tingim narafala pipol?
14 Jesus showim example for hambol and tingim narafala pipol, and hem wasim leg bilong olketa disaepol bilong hem tu. (John 13:12-15) Word bilong God sei olsem abaotem hem: “Garem diskaen wei for tingting long iufala wea Christ Jesus garem tu, wea, nomata hem wankaen witim God, hem nating ting for trae for kasholem, wea minim for hem kamap semsem witim God. Nomoa, bat hem mekem hemseleva kamap smol and kamap olsem wanfala slave and hem kamap olsem wanfala man. Winim datwan, taem hem kamap olsem wanfala man, hem mekem hemseleva hambol and obey go kasem dae.”—Philippians 2:5-8; Romans 15:2, 3.
No Rejectim Discipline Bilong Jehovah
15. (a) Wanem nao olketa change iumi mas duim for kamap man wea God acceptim? (b) Thru long wanem nao Jehovah provaedem kaonsel and discipline for iumi evriwan?
15 From iumi evriwan sinner, iumi need for changem tingting and fasin sapos iumi want for showimaot fasin bilong God bilong iumi. Iumi need for werem datfala “niufala fasin.” (Colossians 3:5-14) Kaonsel and discipline helpem iumi for luksavve long olketa area wea iumi need for change and hao for duim olketa change hia. Bible nomoa hem main ples for kasem instruction wea iumi needim. (2 Timothy 3:16, 17) Bible literature and olketa meeting wea organization bilong Jehovah redyim helpem iumi for followim Word bilong God. Nomata sapos iumi herem wanfala kaonsel bifor, waswe, bae iumi luksavve long wei wea iumi needim datwan and trae for kamap moabeta?
16. Wanem help nao Jehovah givim for iumi wanwan?
16 Jehovah helpem iumi witim olketa problem bilong iumi long loving wei. Planti million pipol kasem help thru long hom Bible study. Dadi and mami givim kaonsel and discipline long pikinini for protectim olketa from fasin wea savve kosim sorre. (Proverbs 6:20-23) Insaed long kongregeson, planti taem samfala askem olketa minister wea garem savve for kaonsel and olketa idea long hao for kamap moabeta long wei for duim preaching waka. Samfala taem olketa elder maet askem kaonsel from nara elder or from olketa wea garem experience long ministry. Olketa wea garem spiritual mark iusim Bible for helpem olketa wea garem need and duim olsem witim kwaet fasin. Sapos iu givim kaonsel, remember for ‘luk aot gud long iuseleva, nogud wanfala test kasem iu tu.’ (Galatians 6:1, 2) Tru nao, iumi evriwan needim kaonsel and discipline for worshipim datfala only tru God witim wan mind.
Review
• Hao nao Jehovah helpem iumi long loving wei for lukim wei wea iumiseleva need for change long samfala wei?
• Why nao planti faendem hard for acceptim kaonsel wea olketa needim, and diswan hem hao serious?
• Wanem nao olketa barava spesol fasin wea bae helpem iumi for lisin long kaonsel, and hao nao Jesus showim example long olketa hia?
[Piksa long page 142]
Uzziah rejectim kaonsel and hem kasem leprosy
[Piksa long page 142]
Moses kasem gud samting taem hem acceptim kaonsel from Jethro