Chapter Eitin
“Olketa No Part Bilong World”
1. (a) Bifor hem dae, Jesus prea for wanem saed long olketa disaepol bilong hem? (b) Why nao wei for “no part bilong world” hem important tumas?
LONG naet bifor olketa killim hem dae, Jesus prea for olketa disaepol bilong hem. From hem savve Satan bae mekem olketa kasem barava bigfala hevi, Jesus sei long Dadi bilong hem: “Mi askem iu, no for tek aotem olketa from world, bat for lukaftarem olketa bikos long wicked wan. Olketa no part bilong world, olsem mi tu no part bilong world.” (John 17:15, 16) Why nao wei for separate from world hem important tumas? Bikos Satan nao hem ruler bilong disfala world. Olketa Christian no want for kamap part bilong world wea stap anda long kontrol bilong hem.—Luke 4:5-8; John 14:30; 1 John 5:19.
2. Wanem nao olketa wei wea Jesus hem no part bilong world?
2 Wei for no part bilong world no minim Jesus no garem love for nara pipol. Tru nao, hem healim olketa wea sik, resurrectim olketa wea dae finis, and teachim pipol abaotem Kingdom bilong God. Hem givim laef bilong hem for olketa man tu. Bat hem no lovem olketa fasin and akson bilong pipol wea no followim God wea showimaot spirit bilong world bilong Satan. Dastawe hem givim warning againstim olketa samting olsem wei for wantem dirty samting, living wea material samting hem firstaem, and fasin for aftarem bigfala nem. (Matthew 5:27, 28; 6:19-21; Luke 20:46, 47) So, iumi no sapraes hao Jesus stap klia long politik bilong world. Nomata hem wanfala Jew, hem no teksaed long raoa bilong politik midolwan long Rome and olketa Jew.
“Kingdom Bilong Mi Hem No Part Bilong Disfala World”
3. (a) Wanem toktok againstim Jesus nao olketa bigman bilong Jew religion talem long Pilate, and why nao olsem? (b) Wanem nao showaot Jesus no interest for kamap wanfala king long earth?
3 Tingim samting wea happen taem olketa bigman bilong Jew religion arrestim Jesus and tekem hem go long Pontius Pilate, governor bilong Rome. Hem tru for sei, olketa leader hia feel nogud bikos Jesus showimaot klia hypocrite fasin bilong olketa. For mekem governor duim samting againstim Jesus, olketa accusim hem olsem: “Mifala faendem disfala man hem spoelem nation bilong mifala and stopem pipol for peim olketa tax long Caesar and hem sei hem nao Christ wanfala king.” (Luke 23:2) Diswan hem bigfala laea bikos wan year bifor, taem olketa pipol want for mekem Jesus kamap king, hem no acceptim. (John 6:15) Hem savve bae hem kamap King long heven long future. (Luke 19:11, 12) And tu, Jehovah, and no olketa man nao bae mekem hem for kamap king.
4. Hao nao Jesus ting long wei for peim olketa tax?
4 Thrifala day bifor olketa arrestim Jesus, olketa Pharisee trae for mekem Jesus talem samting wea againstim law saed long wei for peim tax. Bat hem sei: “Showim mi wanfala denarius [wanfala coin bilong Rome]. Piksa and raeting bilong hu nao stap long hem?” Taem olketa ansa: “Caesar,” hem ansa: “So, yes, peim bak olketa samting bilong Caesar long Caesar, bat olketa samting bilong God long God.”—Luke 20:20-25.
5. (a) Wanem leson nao Jesus teachim long olketa disaepol bilong hem taem samfala pipol kam arrestim hem? (b) Hao nao Jesus explainim reason for samting wea hem duim? (c) Wanem nao samting wea happen long datfala kot case?
5 Jesus hem nating teachim wei for againstim olketa wea garem hae paoa. Taem olketa soldia and nara man kam for arrestim Jesus, Peter aotem wanfala sword and hem katemaot ear bilong wanfala long olketa. Bat Jesus sei: “Putim bak sword bilong iu long ples bilong hem, from olketa wea iusim sword bae dae from sword.” (Matthew 26:51, 52) Long next day Jesus talem Pilate why nao hem duim datwan, taem hem sei: “Kingdom bilong mi hem no part bilong disfala world. Sapos kingdom bilong mi hem part bilong disfala world, olketa wea stap witim mi savve faet for no letem olketa Jew kasholem mi.” (John 18:36) Pilate sei hem “no faendem eni pruv” againstim Jesus. Bat bikos datfala crowd putim hevi long hem, Pilate nilam Jesus long post.—Luke 23:13-15; John 19:12-16.
Disaepol Mas Followim Wei wea Jesus Lead
6. Hao nao olketa first Christian showaot olketa lovem pipol bat long semtaem olketa stap klia long spirit bilong world?
6 So, olketa disaepol bilong Jesus savve wanem nao insaed long wei for no part bilong world. Hem minim for stap klia long spirit and olketa akson bilong world wea no followim God, wea insaed diswan hem raf and dirty hapitaem bilong Rome. Bikos long diswan, pipol kolem olketa disaepol sekson wea heitim olketa man. Bat olketa no heitim olketa man, olketa waka hard for helpem nara pipol kasem gudfala samting from olketa arrangement bilong God for salvation.
7. (a) From olketa no part bilong world, wanem nao kasem olketa firstfala disaepol? (b) Hao nao olketa ting long olketa ruler bilong politik and wei for peim tax, and why nao olsem?
7 Olketa follower bilong Jesus kasem persecution olsem hem tu, planti taem from olketa bigman bilong gavman wea herem laea story. Nomata olsem, long samting olsem 56 C.E., aposol Paul raet long olketa Christian long Rome and encouragem olketa for “stap anda long olketa hae paoa [olketa ruler bilong politik], from no eni paoa bae stap sapos God hem no letem.” Hem no minim Jehovah nao putim olketa gavman bilong man, bat hem letem olketa for stap go kasem taem wea Kingdom bilong hem nomoa rulim full earth. Dastawe Paul givim advaes long olketa Christian for respectim olketa ruler bilong world and for peim olketa tax.—Romans 13:1-7; Titus 3:1, 2.
8. (a) Go kasem wea nao olketa Christian savve stap anda long olketa hae paoa? (b) Hao nao olketa firstfala Christian followim example bilong Jesus?
8 Nomata olsem, wei for stap anda long olketa ruler bilong politik hem no evribit. Taem olketa law bilong man go againstim olketa law bilong Jehovah, olketa wea servem Jehovah mas obeyim olketa law bilong Hem. Lukim samting wea buk On the Road to Civilization—A World History talem abaotem olketa firstfala Christian: “Olketa Christian no willing for duim samfala samting wea Rome askem olketa citizen for duim. Olketa Christian . . . ting wei for joinim army hem againstim faith bilong olketa. Olketa no willing for garem waka wea join witim politik. Olketa no willing for worshipim king.” Taem hae kot bilong olketa Jew “komandim” olketa disaepol for finis for preach, olketa ansa olsem: “Mifala mas obeyim God olsem ruler and no olketa man.”—Acts 5:27-29.
9. (a) Why nao olketa Christian insaed Jerusalem lusim datfala taon long 66 C.E.? (b) Long wanem wei nao datwan hem wanfala gudfala example?
9 Saed long olketa raoa bilong politik and army, olketa disaepol barava no teksaed. Long 66 C.E., olketa Jew long Judea againstim Caesar. Army bilong Rome kwiktaem for raonem Jerusalem. Wanem nao olketa Christian insaed datfala taon duim? Olketa rememberim kaonsel bilong Jesus for lusim datfala taon. Taem olketa bilong Rome go bak for lelebet taem, olketa Christian ranawe akrosim Jordan River and go long olketa maunten long area bilong Pella. (Luke 21:20-24) Wei wea olketa no teksaed hem olsem example for olketa faithful Christian bihaen.
Olketa Christian No Teksaed Long Olketa Last Day Distaem
10. (a) Olketa Jehovah’s Witness go ahed for busy long wanem waka, and why nao olsem? (b) Olketa no teksaed long wanem?
10 Waswe, record bilong history showim eni grup long olketa last day distaem wea barava strong for no teksaed olsem olketa firstfala Christian? Yes, Olketa Jehovah’s Witness duim olsem. Long full taem hia, olketa go ahed for preach hao Kingdom bilong God hem only wei for mekem peace, gudfala living, and hapi for kasem pipol wea lovem raeteous fasin. (Matthew 24:14) Bat saed long olketa raoa midolwan olketa nation, olketa barava strong for no teksaed.
11. (a) Hao nao wei wea olketa Witness no teksaed hem difren from olketa bigman bilong religion? (b) Wanem tingting nao Olketa Jehovah’s Witness garem saed long wanem nara pipol duim long politik?
11 Long wei wea difren tumas, olketa bigman long olketa religion bilong world barava join insaed long politik bilong world. Long samfala kantri, olketa barava saportim or againstim pipol insaed politik. Samfala bigman bilong church garem position long politik tu. Olketa narawan putim hevi long olketa man bilong politik for appruvim olketa program wea olketa laekem. Nomata olsem, Olketa Jehovah’s Witness no join insaed politik. And tu, olketa no poke-nose and stopem nara pipol for joinim eni party bilong politik, or ran for election, or vote long election. Jesus sei olketa disaepol bilong hem bae no part bilong world, so Olketa Jehovah’s Witness no join insaed politik.
12. Wanem nao kamaot from wei wea olketa religion bilong disfala world teksaed?
12 Olsem profesi bilong Jesus talem, olketa nation go long war planti taem. Olketa difren grup insaed olketa nation faetem each other tu. (Matthew 24:3, 6, 7) Olketa leader bilong religion evritaem saportim wanfala nation wea raoa witim narawan, and olketa encouragem pipol wea followim olketa for duim sem samting tu. Wanem nao kamaot from diswan? Olketa member bilong sem religion killim dae each other long war bikos long raoa bilong nation or tribe. Diswan hem againstim will bilong God.—1 John 3:10-12; 4:8, 20.
13. Wanem nao olketa samting wea happen finis showimaot abaotem wei wea Olketa Jehovah’s Witness no teksaed?
13 Olketa Jehovah’s Witness barava no teksaed long eni raoa. The Watchtower bilong November 1, 1939 sei: “Evriwan long saed bilong Lord bae no teksaed long olketa nation wea faet.” Nomata wanem kaen raoa or war, olketa Jehovah’s Witness long evri nation go ahed for followim disfala mark. Olketa no letem politik bilong world wea divaedem pipol and war for spoelem wei wea olketa olsem brata evriwea long world. Olketa “hammerim sword bilong olketa for kamap hou and spia bilong olketa for kamap naef for katem tree.” From olketa no teksaed, olketa no lanem war moa.—Isaiah 2:3, 4; 2 Corinthians 10:3, 4.
14. Bikos olketa stap separate from world, wanem nao kasem Olketa Jehovah’s Witness?
14 Wanem nao wanfala samting wea kamaot from wei wea olketa no teksaed? Jesus sei: “From iufala no part bilong world, . . . world hem heitim iufala.” (John 15:19) Planti Jehovah’s Witness go long prison bikos olketa servant bilong God. Pipol spoelem, and killim dae tu samfala, semsem olsem samting wea happen long olketa Christian long first century. Diswan kamap from Satan, “god bilong disfala system,” hem againstim olketa servant bilong Jehovah, wea no part bilong world.—2 Corinthians 4:4; Revelation 12:12.
15. (a) Evri nation gogo for wanem, and Olketa Jehovah’s Witness careful for stap klia long wanem? (b) Why nao wei for stap separate from world hem barava serious samting?
15 Olketa servant bilong Jehovah hapi for no part bilong world, bikos evri nation bilong world followim wanfala gogo for distroe long Armageddon. (Daniel 2:44; Revelation 16:14, 16; 19:11-21) Iumi bae missim datwan from iumi stap difren from world. Olsem pipol wea garem wan mind evriwea long earth, iumi loyal long Kingdom bilong God long heven. Hem tru, from iumi no part bilong world, iumi kasem wei for tok spoelem iumi and persecution. Nomata olsem, klosap nao, datwan bae finis, from disfala nogud world anda long Satan bae finis for olowe. Long narasaed, olketa wea servem Jehovah bae laef for olowe insaed raeteous niu world bilong hem anda long Kingdom bilong God.—2 Peter 3:10-13; 1 John 2:15-17.
Review
• Hao nao Jesus showim mining bilong wei for “no part bilong world”?
• Wanem nao tingting bilong olketa first Christian abaotem (a) spirit bilong world, (b) olketa ruler bilong gavman, and (c) wei for peim tax?
• Wanem nao olketa wei wea Olketa Jehovah’s Witness long distaem showaot olketa no teksaed olsem Christian?
[Piksa long page 165]
Jesus sei hem and olketa follower bilong hem “no part bilong world”