Wanem Nao Datfala Gud Nius?

1. Wanem nao datfala gud nius from God?

God laekem pipol for enjoyim laef long disfala earth. Hem wakem earth and evri samting wea stap long earth bikos hem lovem pipol. Klosap nao God bae duim samting for pipol long evri ples for garem gudfala laef. Hem bae duim samting for finisim wei for safa.​—Readim 1 Timothy 6:19.

No enitaem eni gavman bilong man hem finisim raf fasin, sik, or dae. Bat gud nius hem stap. Gavman bilong God bae changem olketa gavman bilong man. Olketa man wea stap anda long gavman bilong God bae stap long peace and garem gud health.​—Readim Revelation 21:4; Daniel 2:44.

2. Why nao datfala gud nius hem important?

Taem God aotem rabis pipol from disfala earth, datfala taem nao wei for safa bae finis. (Zephaniah 2:3) Wanem taem nao God bae duim datwan? Bible talem finis olketa nogud samting wea bae spoelem pipol. Olketa nogud samting hia wea happen distaem showimaot klosap nao God bae duim datwan.​—Readim 2 Timothy 3:1-5.

3. Wanem nao iumi shud duim?

Iumi shud studyim Bible for lane abaotem God. Bible hem olsem wanfala leta wea Dadi raetem for olketa pikinini wea hem lovem. Hem talem iumi hao for garem gudfala laef distaem and hao for kasem laef olowe long earth long future. Maet samfala no laekem iu for studyim Bible. Bat no letem eniwan stopem iu for lane abaotem olketa promis bilong God wea bae helpem iu for garem gudfala future.​—Readim Matthew 5:10-12; Revelation 14:6, 7.