Samuel Evritaem Duim Stret Samting

Start long taem Samuel hem smol pikinini, hem stap long tabernacle and waka long there. Long there nao pipol go for worshipim Jehovah. Waswe, iu savve hao nao gogo Samuel stap long tabernacle? Firstaem, iumi bae story abaotem Hannah, mami bilong Samuel.

Hannah laekem tumas for garem pikinini bat hem no savve garem pikinini. So hem prea long Jehovah abaotem datwan. Hannah promisim Jehovah, sapos hem garem wanfala son hem bae givim datfala boy long Jehovah for stap long tabernacle and waka long there. Jehovah ansarem prea bilong hem and gogo hem garem wanfala boy wea nem bilong hem Samuel. And olsem Hannah promisim finis, taem Samuel hem thri or foa year, hem tekem hem go long tabernacle for stap and waka long there.

Eli hem hae priest long tabernacle. Tufala son bilong hem priest long there tu. Tingim, pipol go for worshipim God long tabernacle, and evriwan long there shud duim stret samting. Bat tufala son bilong Eli duim olketa barava nogud samting. Samuel lukim wanem tufala duim. Waswe, Samuel duim olketa nogud samting olsem tufala son bilong Eli?— Samuel no followim tufala. Hem evritaem duim stret samting, olsem dadi and mami bilong hem teachim hem.

Wanem nao Eli shud duim long tufala son bilong hem?— Hem shud panisim tufala. Hem shud talem tufala for no gohed waka long tabernacle. From Eli no duim datwan, Jehovah kros long hem and tufala son bilong hem. So Jehovah nao mas panisim olketa.

Wanfala naet, Samuel hem sleep and hem herem samwan kolem hem. Samuel tingse Eli nao kolem hem, bat Eli hem sei: ‘Mi no kolem iu.’ Tufala taem moa diswan hem happen. So Eli talem Samuel sapos hem herem samwan kolem hem moa, hem shud sei: ‘Plis Jehovah, iu story kam. Talem kam wanem iu laekem.’ Samuel duim evri samting wea Eli talem hem. Then Jehovah sei long Samuel: ‘Talem Eli mi bae panisim famili bilong hem bikos olketa duim nogud samting.’ Waswe, iu tingse Samuel fraet for talem Eli disfala message?— Samuel fraet ia, bat hem duim wanem Jehovah talem. Gogo Eli and tufala son bilong hem olketa dae, olsem Jehovah talem.

Samuel showimaot gudfala example for iumi. Hem duim stret samting nomata hem lukim olketa narawan duim nogud samting. Waswe, bae iu followim example bilong Samuel and evritaem duim stret samting? Sapos iu duim datwan, bae iu mekem Jehovah and dadi and mami bilong iu hapi.