SEKSON 3
Hao for Stretem Olketa Problem
“Iufala mas barava lovem narawan, bikos man wea garem love hem evritaem willing for forgivim narawan.”—1 Peter 4:8
Bihaen iutufala marit, olketa difren kaen problem savve kamap. Maet diswan happen bikos iutufala no semsem long wanem iutufala tingim, feeling bilong iutufala, and hao iutufala duim olketa samting. Iutufala savve kasem hard taem tu from olketa narawan or from samting hem happen wea iutufala no expectim.
Maet iu no laek for tingim olketa problem hia, bat Bible sei hem gud for stretem olketa problem. (Matthew 5:23, 24) Gudfala wei for stretem olketa problem hem for followim olketa Bible principle.
1 STORY TUGETA ABAOTEM PROBLEM
BIBLE HEM SEI: “Taem hem stap . . . for toktok.” (Ecclesiastes 3:1, 7) Mek sure iu story abaotem problem. Talem feeling and tingting bilong iu abaotem datfala problem and evritaem “talem tru samting” long marit partner bilong iu. Nomata iu barava feel nogud abaotem samting wea happen, no raoa. Sapos iu tok kaen taem iu story, datwan bae stopem bigfala raoa for kamap.—Proverbs 15:4; 26:20.
Nomata maet iu no agree witim hasband or waef bilong iu, evritaem showimaot love and respect long hem. (Colossae 4:6) Trae for kwiktaem stretem problem, and gohed garem wei for story tugeta.—Ephesus 4:26.
SAMTING IU SAVVE DUIM:
Markem taem wea fitim for iutufala storyim datfala problem
No katem story taem marit partner bilong iu hem story. Iu tu bae garem chance for story
2 LISIN AND LUKSAVVE
BIBLE HEM SEI: “Iufala mas lovem olketa narawan. . . . Iufala mas willing for showimaot respect long narawan.” (Rome 12:10) Hem barava important for lisin gud long marit partner bilong iu and trae for minim tingting bilong hem. (1 Peter 3:8; James 1:19) No act olsem iu lisin, bat sapos hem fitim, stop for duim samting wea iu busy long hem and lisin gud long marit partner bilong iu. Sapos iu busy tumas long datfala taem, askem hem sapos iutufala savve story bihaen iu finisim wanem iu duim. Hem gud for ting long marit partner bilong iu olsem iutufala insaed long sem team and hem no againstim iu. Datwan bae helpem iu for “no kwiktaem for feel nogud.”—Ecclesiastes 7:9.
SAMTING IU SAVVE DUIM:
Willing for lisin long wanem hasband or waef bilong iu talem, nomata iu no laekem wanem iu herem
Lisin long voice bilong hem, lukim lukluk long feis and akson bilong hem, for helpem iu minim wanem hem trae for talem iu
3 FOLLOWIM WANEM IUTUFALA DISAEDEM
BIBLE HEM SEI: “Man savve kasem gud samting from hard waka bilong hem, bat sapos hem toktok nomoa no eniwan bae kasem gud samting.” (Proverbs 14:23) Bihaen iutufala agree long wanem for duim, hem important for followim wanem iutufala disaedem. Maet iutufala mas waka hard for duim diswan, bat bae iutufala no hard waka nating. (Proverbs 10:4) Sapos iutufala waka tugeta olsem iutufala insaed long wanfala team, iutufala bae “kasem gud samting.”—Ecclesiastes 4:9.
SAMTING IU SAVVE DUIM:
Disaedem wanem nao iutufala wanwan mas duim for stretem problem
Hem gud sapos samfala taem iutufala lukluk moa for lukim sapos iutufala stretem datfala problem or nomoa yet