Overseer for Lukaftarem Olketa Sheepsheep

TAEM Jesus duim ministry blo hem lo earth, hem pruvim hem nao “nambawan man for lukaftarem olketa sheepsheep.” (John 10:11) Taem hem lukim staka pipol followim hem, “hem barava sorre tumas long olketa, bikos olketa garekil and stap olobaot olsem olketa sheepsheep wea no garem eni man for lukaftarem olketa.” (Matt. 9:36) Peter and olketa nara aposol lukim wei wea hem barava tingim olketa pipol hia. Jesus barava difren from olketa false shepherd blo Israel wea no lukaftarem olketa sheepsheep, wea datwan mekem olketa sheepsheep for stap olobaot and hangere lo spiritual wei! (Ezek. 34:7, 8) Gud example blo Jesus for teachim and lukaftarem olketa sheepsheep go kasem taem wea hem givim laef blo hem for olketa, teachim olketa aposol hao for helpem olketa wea kam bak lo Jehovah, “datfala man wea lukaftarem olketa sheepsheep and wea hem protectim laef bilong [olketa].”​—1 Pet. 2:25.

² Wantaem Jesus storyim lo Peter why hem important for feedim and lukaftarem olketa sheepsheep. (John 21:15-17) Datwan barava encouragem Peter and hem talem diswan lo olketa elder lo kongregeson lo first century: “Lukaftarem olketa sheepsheep bilong God wea hem nao markem iufala for lukaftarem. Iufala mas no duim diswan from eniwan forcem iufala, bat duim bikos iufala willing. Iufala mas no duim diswan from iufala laek for kasem samting for iufala seleva, bat from iufala laek for helpem narawan. Iufala mas no bossim olketa pipol bilong God bat iufala mas showimaot gudfala example for olketa sheepsheep.” (1 Pet. 5:1-3) Toktok wea Peter talem hem apply tu for olketa overseer lo kongregeson distaem. For followim example blo Jesus, olketa elder willing and showim example for olketa sheepsheep and lead lo waka blo Jehovah.​—Heb. 13:7.

³ Iumi hapi for garem olketa elder lo kongregeson wea spirit nao appointim olketa. Iumi kasem staka gud samting from hao olketa lukaftarem iumi. For example, olketa overseer givim encouragement and laek for savve lo each wan insaed kongregeson. Evri week, olketa waka hard for lukaftarem olketa kongregeson meeting, wea strongim faith blo evriwan. (Rome 12:8) Hao olketa protectim olketa sheepsheep from olketa samting wea savve spoelem olketa olsem olketa nogud man, hem mekem iumi for stap sef lo spiritual wei. (Isa. 32:2; Titus 1:9-11) Wei wea olketa lead lo ministry encouragem iumi for gohed preachim gud nius evri month. (Heb. 13:15-17) Thru lo “olketa man olsem present” wea Jehovah provaedem hem mekem kongregeson for grow.​—Eph. 4:8, 11, 12.

QUALIFICATION WEA OVERSEER MAS KASEM

⁴ For mek sure olketa lukaftarem gud kongregeson, man wea kasem appointment for waka olsem overseer mas kasem requirement wea stap lo Bible. Only if olketa qualify, then iumi savve sei holy spirit appointim olketa. (Acts 20:28) Hem tru, olketa standard lo Bible for Christian overseer hem hae, bikos for waka olsem overseer hem wanfala serious responsibility. Bat hem no hard tumas for wanfala Christian kasem olketa standard hia sapos hem barava lovem Jehovah and willing for Jehovah iusim hem. Evriwan shud luksavve dat olketa overseer followim kaonsel lo Bible lo evriday laef blo olketa.

⁵ Aposol Paul raetem samfala important requirement wea Bible storyim for olketa overseer lo first leta blo hem for Timothy and lo leta blo hem for Titus. Iumi readim lo 1 Timothy 3:1-7: “Sapos man hem laek for elder, gud samting nao hem laek for duim. Elder mas no garem blame long eni samting, garem wanfala waef nomoa, and no ova tumas long eni samting wea hem duim. Hem mas garem gudfala tingting, organize gud, hapi for welkamim pipol, and savve hao for teach. Hem mas no man for drunk, no raf, no forcem tingting bilong hem long narawan, no man for raoa, and no laekem tumas selen. Hem mas lukaftarem gud famili bilong hem, and olketa pikinini bilong hem mas obey and showimaot respect. (Sapos man no savve hao for lukaftarem gud famili bilong hem, hard tumas for hem lukaftarem kongregeson bilong God.) Hem mas no wanfala niu disaepol, nogud hem kamap praod and kasem sem judgment wea Devil hem kasem. Hem mas man wea pipol aotsaed tinghae long hem tu, mekem no eniwan tok nogud abaotem hem and hem no foldaon insaed long trap bilong Devil.”

⁶ Paul talem lo Titus: “Mi leavim iu long Crete for iu stretem samfala samting wea no stret, and for iu savve markem olketa man for elder long olketa taon, olsem mi talem iu finis. Sapos no eniwan accusim wanfala man long eni samting, and hem garem wanfala waef nomoa, and olketa pikinini bilong hem biliv and no eniwan accusim olketa and sei olketa olobaot or bighed, hem savve elder nao. Diswan hem bikos elder mas wakaman bilong God wea no eniwan accusim hem long eni samting. Hem mas no bighed for laek followim tingting bilong hemseleva nomoa. Hem mas no kros kwiktaem, no man for drunk, no raf, and no greedy for kasem samting for hemseleva. Hem mas hapi for welkamim pipol, lovem gud samting, garem gudfala tingting, raeteous, faithful, and kontrolem seleva. Hem mas barava faithful for followim toktok bilong God long wei wea hem teach mekem hem fit for iusim olketa gudfala teaching for encouragem narawan, and for stretem olketa wea tok againstim datwan.”​—Titus 1:5-9.

⁷ Nomata olketa requirement wea Bible storyim for olketa overseer kasem maet luk hard tumas, olketa Christian brata shud no hol bak for reach aot. Taem olketa garem olketa gudfala wei wea olketa overseer mas kasem, datwan encouragem olketa narawan lo kongregeson for duim sem samting. Paul storyim “olketa man olsem present” wea God provaedem “hem for stretem olketa holy wan, for olketa savve duim waka for helpem narawan, and for strongim nao datfala body bilong Christ. Bae hem olsem go kasem taem iumi evriwan wan mind long faith and long hao iumi minim tru samting abaotem Son bilong God. Bae hem olsem tu go kasem taem iumi kamap mature, wea diswan minim iumi barava mature olsem Christ.”​—Eph. 4:8, 12, 13.

⁸ Olketa overseer mas no young tumas and no wanfala niu disaepol. Bat, olketa mas mature lo spiritual wei, savve gud lo Bible, minim olketa deep truth lo Bible, and garem love for olketa lo kongregeson. Olketa no fraet for talem and stretem man wea duim rong samting and protectim sheepsheep from eniwan wea laek for spoelem olketa. (Isa. 32:2) Evriwan lo kongregeson bae luksavve olketa overseer olketa man wea mature lo spiritual wei and laek for lukaftarem olketa sheepsheep blo God.

⁹ Olketa wea qualify for overseer duim samting wea showim olketa wise. If hem marit, hem mas followim standard lo Bible abaotem marit, olsem, for garem wanfala waef nomoa and mas lukaftarem gud famili blo hem. If hem garem olketa pikinini wea biliv wea obey and showimaot respect and no eniwan accusim olketa and sei olketa olobaot or bighed, olketa lo kongregeson savve feel free for go story and askem advaes abaotem famili and spiritual saed blo olketa. And tu, wanfala overseer mas no garem blame lo eni samting and no eniwan accusim hem lo eni samting and hem mas man wea pipol aotsaed tinghae lo hem. No eniwan bae accusim hem lo eni nogud wei wea bae spoelem reputation blo kongregeson. Hem mas no samwan wea kasem repruv for rong samting wea hem duim no longtaem go nomoa. Olketa narawan lo kongregeson bae laek for followim example blo hem and hapi for hem lukaftarem olketa lo spiritual wei.​—1 Cor. 11:1; 16:15, 16.

¹⁰ Olketa man hia wea qualify fit for duim waka lo Christian kongregeson wea semsem witim waka wea olketa elder lo Israel duim wea Bible sei olketa ‘wise, faithful, and garem experience.’ (Deut. 1:13) Olketa Christian elder no perfect, bat olketa lo kongregeson and lo community luksavve olketa hia followim standard blo Jehovah lo laef blo olketa. From datwan, olketa feel free for story front lo kongregeson​—Rome 3:23.

¹¹ Man wea qualify for overseer mas no ova tumas long eni samting wea hem duim and hao hem deal witim olketa narawan. Olketa no ova tumas. Bat, olketa duim samting wea showim olketa balance and kontrolem seleva. Olketa showim olketa balance lo samting olsem, kaikai, alcohol, hapitaem, samting wea olketa seleva laekem, and entertainment. Olketa no ova tumas lo alcohol mekem no eniwan accusim olketa and sei olketa drunk or man for drunk. Man wea no garem gud tingting from hem drink tumas, hem isi for no kontrolem hemseleva and hem no fit for lukaftarem spiritual saed blo olketa lo kongregeson.

¹² For lukaftarem kongregeson hem needim man wea organize gud. Datwan bae showaot lo hao hem dressap, haos blo hem, and lo olketa samting wea hem duim evriday. Hem man wea no delay for duim samting. Hem luksavve lo wat hem mas duim and mekem plan for duim. Hem followim olketa Bible principle.

¹³ Wanfala overseer mas no forcem tingting blo hem long narawan. Hem mas wan mind witim olketa narawan lo body of elders and waka tugeta witim olketa. Hem shud garem balance tingting abaotem hemseleva and no ova tumas for mekem pipol duim wat hem laekem. From wanfala elder no forcem tingting blo hem lo narawan, bae hem no tingse idea blo hem nao gud winim idea blo olketa nara elder. Samfala elder maet garem samfala wei and savve hao for duim samfala samting wea maet hem no savve. Wanfala elder showim hem no forcem tingting blo hem taem hem disaedem samting followim Bible and traem best for followim example blo Jesus Christ. (Phil. 2:2-8) Wanfala elder mas no man for raoa or raf bat respectim olketa narawan and ting lo olketa olsem olketa winim hem. Hem mas no bighed for laek followim tingting blo hemseleva nomoa, for evritaem laekem olketa narawan for acceptim tingting blo hem. Hem no kros kwiktaem, bat hem duim samting for stap gud witim olketa narawan.

¹⁴ And tu, man wea qualify for overseer lo kongregeson, mas garem gudfala tingting. Diswan minim hem mas balance, and no kwiktaem for judgem eniwan. Hem savve gud lo olketa principle blo Jehovah and hao for applyim. Samwan wea garem gudfala tingting hem acceptim kaonsel and direction. Hem no hypocrite.

¹⁵ Paul remindim Titus dat wanfala elder hem man wea lovem gud samting. Hem shud raeteous and faithful. Olketa wei hia bae showaot lo hao hem deal witim olketa narawan and strong for duim samting wea stret and gud. Hem man wea strong lo worship blo hem for Jehovah and evritaem duim samting followim olketa raeteous principle blo hem. Hem man wea iumi savve trustim. And tu, hem man wea hapi for welkamim pipol, willing for givim laef blo hemseleva and olketa samting wea hem garem for helpem olketa narawan.​—Acts 20:33-35.

¹⁶ For wanfala overseer duim gud waka blo hem, hem mas savve hao for teach. Lo leta blo Paul for Titus, hem sei wanfala overseer “mas barava faithful for followim toktok bilong God long wei wea hem teach mekem hem fit for iusim olketa gudfala teaching for encouragem narawan, and for stretem olketa wea tok againstim datwan.” (Titus 1:9) Hem savve story gud witim pipol, showim pruv lo wat hem storyim, ansarem olketa kwestin, and iusim Bible lo wei wea mekem olketa narawan biliv and strongim faith blo olketa. Hem need for teach lo wei olsem lo taem wea isi and no isi. (2 Tim. 4:2) Hem mas patient and kaen taem hem givim kaonsel lo eniwan wea duim sin or taem hem helpem samwan for no garem daot and encouragem hem for duim olketa gud waka followim faith blo hem. From datfala elder savve hao for teach front lo audience or lo narawan, datwan pruvim hem kasem datfala important requirement.

¹⁷ Hem important for olketa elder strong for duim ministry. Datwan hem nara samting wea showim olketa followim example blo Jesus wea ting lo wei for preachim gud nius hem important. Jesus laek for helpem olketa disaepol blo hem for strong for duim ministry. (Mark 1:38; Luke 8:1) Wei wea olketa elder traem best for spendem taem lo ministry nomata olketa garem busy schedule, hem encouragem full kongregeson for duim sem samting tu. And taem olketa elder preach witim famili blo olketa and olketa narawan insaed kongregeson, “evriwan strongim narawan.”​—Rome 1:11, 12.

¹⁸ Evri samting hia maet luk hard tumas for samwan wea elder for duim. Hem tru, no eni elder savve kasem evri standard hia wea Bible storyim lo perfect wei, bat eniwan wea olketa appointim for elder lo kongregeson shud kasem olketa qualification hia. Samfala elder maet garem olketa gudfala wei and olketa narawan maet gud lo olketa nara samting. From datwan, evriwan lo body of elders bae garem evri gudfala wei wea mekem olketa fit for lukaftarem gud kongregeson blo God.

¹⁹ Taem body of elders recommendim samwan for kasem appointment olsem overseer, hem gud for olketa tingim disfala toktok blo aposol Paul: “Mi talem iufala evriwan for no tinghae tumas long iufala seleva, bat garem gudfala tingting fitim faith wea God givim long iufala wanwan.” (Rome 12:3) Each elder mas no ting dat hem winim olketa narawan. No eniwan shud ting dat hem “ova raeteous” taem olketa ting raonem olketa qualification blo narawan. (Eccl. 7:16) Taem olketa savve gud lo requirement lo Bible for olketa overseer, body of elders bae disaedem if datfala brata kasem olketa requirement hia or nomoa. From olketa savve no eniwan hem perfect and olketa no fevarem eniwan and no hypocrite, olketa elder bae mekem recommendation wea showim olketa respectim hae standard blo Jehovah and for kongregeson kasem gud samting. Olketa bae prea abaotem each recommendation wea olketa mekem and followim direction blo holy spirit blo God. Diswan hem important responsibility wea olketa garem, and olketa mas followim disfala toktok blo Paul wea sei: “No kwiktaem for markem man for duim waka insaed long kongregeson.”​—1 Tim. 5:21, 22.

OLKETA WEI BLO SPIRIT

²⁰ Olketa brata wea kasem olketa spiritual mark hia showimaot holy spirit nao leadim olketa, and olketa showim wei blo spirit lo laef blo olketa. Paul storyim naenfala wei blo spirit olsem “love, hapi, peace, and for patient. Hem mekem man for kaen long narawan, duim gudfala samting, garem faith, hambol, and kontrolem seleva.” (Gal. 5:22, 23) Olketa elder hia strongim olketa brata and sista and helpem kongregeson for wan mind for worshipim Jehovah. Wei blo olketa and wat olketa duim showim holy spirit nao appointim olketa.​—Acts 20:28.

OLKETA MAN WEA MEKEM KONGREGESON WAN MIND

²¹ Hem important for olketa elder waka tugeta for mekem kongregeson wan mind. Wei blo olketa hem no semsem, bat body of elders keepim wan mind taem olketa lisin gud lo each other, nomata maet olketa no agree lo evri samting wea olketa discussim. If wat olketa discussim hem no brekem eni Bible principle, each wan shud willing for agree and sapotim final disison blo body of elders. Wei wea olketa willing for agree showimaot “wisdom from heven” nao mekem olketa for “stap gud witim narawan and no forcem tingting blo [olketa]” lo narawan. (Jas. 3:17, 18) No eni elder shud ting hem winim olketa narawan, and no eni elder shud trae for kontrolem olketa narawan. Olketa elder waka tugeta witim Jehovah taem olketa waka gud tugeta olsem body, for kongregeson kasem gud samting.​—1 Cor., chap. 12; Col. 2:19.

REACH AOT

²² Olketa brata wea mature lo spiritual wei shud markem goal for kamap elder. (1 Tim. 3:1) Bat for kamap wanfala elder man mas waka hard and mekem samfala sakrifaes. Hem minim for willing for helpem olketa brata and sista lo physical and spiritual wei. For reach aot for kamap wanfala overseer, man mas waka hard for kasem olketa qualification wea Bible storyim.

SITUATION MAET CHANGE

²³ Wanfala brata wea faithful for longtaem maet sik or no fit for duim samfala samting wea hem duim bifor. Maet from hem olo, hem no fit nao for duim responsibility blo wanfala elder. Nomata olsem, hem still wanfala elder and iumi shud respectim hem. Hem no need for resign just bikos hem no fit for duim samfala samting. Hem still fit for kasem bigfala respect olsem olketa nara elder wea waka hard and traem best blo olketa for lukaftarem olketa sheepsheep.

²⁴ Bat if wanfala brata ting for resign bikos lo samfala samting wea happen lo laef wea mekem hem no fit for elder, hem savve duim datwan. (1 Pet. 5:2) Iumi shud still respectim hem. Hem fit for duim staka gud samting lo kongregeson, nomata hem no duim assignment or waka blo olketa elder.

OLKETA BIG RESPONSIBILITY LO KONGREGESON

²⁵ Olketa elder lukaftarem difren responsibility insaed kongregeson. Kongregeson garem coordinator blo body of elders, secretary, service overseer, Wastaoa Study conductor, and Laef and Ministry Meeting overseer. Staka elder waka olsem grup overseer. Olketa elder savve duim olketa responsibility hia for lelebet longtaem. Bat if wanfala brata muv, no fit for duim responsibility blo hem bikos lo health blo hem, or hem disqualify bikos hem no gohed followim olketa requirement wea stap lo Bible, olketa savve appointim nara elder for duim datfala assignment. Lo olketa kongregeson wea no garem staka elder, wanfala elder maet lukaftarem winim wanfala assignment kasem taem olketa nara brata qualify for kasem appointment olsem elder.

²⁶ Coordinator blo body of elders nao chairman lo olketa meeting blo body of elders. From datwan, hem hambol for waka tugeta witim olketa nara elder for lukaftarem olketa sheepsheep blo God. (Rome 12:10; 1 Pet. 5:2, 3) Hem shud wanfala gud organizer and strong for duim datwan.​—Rome 12:8.

²⁷ Secretary nao keepim record blo kongregeson and letem olketa elder savve lo olketa important information. If need kamap, olketa savve assignim nara elder or wanfala ministerial servant wea fit, for helpem hem.

²⁸ Olketa arrangement for field service and olketa nara samting wea join witim datwan, service overseer nao lukaftarem. Hem markem taem for waka witim evri field service grup mekem wanfala weekend evri month, hem bae waka witim each grup. Lo olketa smol kongregeson wea garem tu-thri service grup nomoa, maet hem savve visitim each grup tu taems lo year. Taem hem visit, hem bae leadim grup for field service, waka witim grup lo ministry, and go witim olketa pablisa for duim olketa return visit and Bible study.

GRUP OVERSEER

²⁹ Wanfala lo olketa nambawan privilege insaed kongregeson hem nao for waka olsem grup overseer. Responsibility blo hem for (1) helpem each pablisa lo grup blo hem for gohed gud lo spiritual wei; (2) helpem each wan lo grup for gohed strong and hapi for share lo ministry; and (3) helpem and trainim olketa ministerial servant lo grup for reach out and qualify for duim samfala responsibility lo kongregeson. Body of elders nao bae disaedem which brata hem barava qualify for duim disfala assignment.

³⁰ Bikos lo olketa responsibility lo datfala assignment, grup overseer shud wanfala elder. Or wanfala ministerial servant wea fit savve duim go kasem taem wanfala elder savve duim datfala waka. Wanfala ministerial servant wea duim datfala waka, bae olketa kolem hem grup servant bikos hem no wanfala elder lo kongregeson. Bat hem duim datfala waka followim direction blo olketa elder.

³¹ Wanfala important samting lo waka blo grup overseer hem for lead lo field ministry. Wei wea hem strong and willing for duim ministry evritaem bae encouragem olketa pablisa lo grup blo hem. From olketa pablisa tinghae lo encouragement and help wea olketa kasem taem olketa preach tugeta, hem bae gud for mekem schedule for grup witnessing fitim staka lo grup. (Luke 10:1-16) Overseer need for evritaem mek sure inaf territory stap for olketa duim. Hem bae conductim meeting for field service and organizem olketa pablisa for duim preaching lo datfala day. If hem no stap, hem shud arrange for nara elder, wanfala ministerial servant, or if tufala evriwan no stap, eni pablisa wea qualify for leadim grup.

³² Grup overseer shud plan gud firstaem for visit blo service overseer, talem evriwan lo grup taem for datfala visit and storyim gud samting wea olketa bae kasem. Taem evriwan lo grup savve lo datfala arrangement, olketa bae sapotim.

³³ Olketa plan for mekem each service grup hem smol. Diswan hem for mekem grup overseer savve gud lo olketa pablisa insaed grup blo hem. From hem wanfala loving shepherd, hem laek for savve gud lo each wan. Hem trae for helpem and encouragem each wan for share lo ministry and for attendim olketa kongregeson meeting. And tu, hem trae best for duim eni samting wea hem fit for duim for helpem each pablisa for gohed strong lo spiritual wei. Olketa wea sik or depress bae kasem gud samting taem hem visitim olketa. Olketa encouraging toktok and advaes wea hem givim maet helpem samfala for reach aot for samfala privilege moa lo kongregeson and datwan bae barava helpem olketa brata and sista. Staka samting wea grup overseer duim hem for helpem olketa lo grup blo hem. Bat from hem elder and shepherd, hem tingim evriwan lo kongregeson and redi for helpem eniwan wea needim help.​—Acts 20:17, 28.

³⁴ Wanfala responsibility blo grup overseer hem for kolektem field service report from olketa lo grup blo hem. Then hem givim olketa report hia lo secretary. Each pablisa savve helpem grup overseer taem olketa givim field service report kwiktaem. Olketa savve duim diswan taem olketa givim report lo grup overseer lo end blo each month or taem olketa putim lo box wea olketa markem for field service report lo Kingdom Hall.

KONGREGESON SERVICE KOMITI

³⁵ Samfala nara waka stap wea Kongregeson Service Komiti nao lukaftarem, and olketa wea insaed disfala komiti hem coordinator blo body of elders, secretary, and service overseer. For example, service komiti nao bae appruvim for iusim Kingdom Hall for olketa wedding and funeral and for assignim olketa pablisa lo olketa field service grup. Datfala komiti tu bae appruvim olketa application for regular and auxiliary pioneer and olketa nara samting. Service komiti waka anda lo direction blo body of elders.

³⁶ Waka blo olketa brata hia witim olketa Wastaoa Study conductor, Ministry Meeting overseer, and olketa nara wan insaed body of elders, branch office nao givim direction lo hao for olketa duim.

³⁷ Body of elders lo each kongregeson markem taem for meet for storyim samting wea join witim spiritual saed blo kongregeson. Olketa elder garem meeting taem circuit overseer visit, and olketa garem meeting tu samting olsem thri month afta each visit blo circuit overseer. Bat sapos eni samting kamap, olketa savve markem taem for storyim datwan.

WILLING FOR STAP ANDA

³⁸ Olketa elder lo kongregeson no perfect. Bat evriwan lo kongregeson kasem encouragement for stap anda lo olketa bikos hem arrangement blo Jehovah. Olketa elder bae givim ansa lo Hem for wat olketa duim. Olketa representim Jehovah and theocratic rul blo hem. Hebrew 13:17 sei: “Olketa wea leadim iufala and lukaftarem iufala mas givim ansa for hao olketa duim diswan. So obeyim and stap anda long olketa mekem olketa hapi for lukaftarem iufala bikos sapos nomoa, datwan bae spoelem iufala.” Olsem hao Jehovah iusim holy spirit blo hem for appointim wanfala brata, Jehovah bae iusim datfala sem holy spirit for aotem wanfala brata for no elder if hem no gohed showim olketa frut blo holy spirit and olketa samting wea hem duim lo laef blo hem no followim olketa requirement wea stap lo Bible.

³⁹ Iumi barava tinghae lo hard waka and gud example blo olketa elder lo kongregeson. Taem Paul raet for kongregeson lo Thessalonica, hem encouragem olketa brata and sista olsem: “Olketa brata, mifala askem iufala for respectim olketa wea waka hard for helpem iufala, and wea leadim iufala long waka bilong Lord, and givim advaes long iufala. Iufala mas barava kaen long olketa and lovem olketa bikos long waka wea olketa duim.” (1 Thess. 5:12, 13) Big waka wea olketa lo kongregeson duim mekem hem isi for iumi worshipim Jehovah and barava hapi. And tu lo first leta blo hem for Timothy, Paul storyim olketa wei wea olketa lo kongregeson shud showim lo olketa elder, hem sei: “From olketa elder lead long gudfala wei, hem fitim for olketa kasem bigfala respect, main wan nao olketa elder wea waka hard for storyim and teachim toktok bilong God.”​—1 Tim. 5:17.

OLKETA NARA RESPONSIBILITY INSAED ORGANIZATION

⁴⁰ Samfala taem, olketa appointim samfala elder for waka lo Patient Visitation Grup. Samfala waka lo Hospital Liaison Komiti and visitim olketa hospital and doctor for encouragem olketa for gohed givim treatment wea no iusim blood lo Olketa Jehovah’s Witness. Olketa nara elder fit for duim moa samting for sapotim Kingdom waka taem olketa help for buildim and lukaftarem olketa Kingdom Hall and Assembly Hall or taem olketa member lo Convention Komiti. Evriwan insaed organization barava tinghae lo hard waka blo olketa brata hia and wei wea olketa willing for sakrifaesim olketa seleva. Tru nao, iumi “gohed for tinghae long olketa man olsem.”​—Phil. 2:29.

CIRCUIT OVERSEER

⁴¹ Governing Body nao appointim olketa elder wea qualify for serve olsem circuit overseer. Branch office nao assignim olketa for visitim olketa kongregeson wea stap insaed circuit blo olketa tufala taem lo year. Olketa savve visitim tu olketa pioneer wea stap lo olketa farawe territory. Olketa planim gogo blo olketa and letem each kongregeson savve firstaem lo visit blo olketa mekem kongregeson kasem gud samting from datfala visit.

⁴² Coordinator blo body of elders nao organizem evri samting mekem visit hia bae strongim spiritual saed blo evriwan (Rome 1:11, 12) Taem kongregeson kasem leta for circuit visit and samfala information abaotem need blo circuit overseer and waef blo hem (if hem marit), coordinator blo body of elders bae storyim witim olketa nara brata for mekem arrangement for accomodation and olketa nara samting. Hem mek sure evriwan and circuit overseer tu savve lo olketa arrangement hia.

⁴³ Circuit overseer bae story witim coordinator blo body of elders abaotem olketa meeting and taem blo field service. Olketa arrangement hia bae followim wat circuit overseer talem and direction from branch office. Evriwan need for savve firstaem abaotem taem and ples for kongregeson meeting, meeting for olketa pioneer, for elder and ministerial servant, and taem and ples for meeting for field service.

⁴⁴ Lo Tuesday, circuit overseer bae chekim Kongregeson Pablisa Record, meeting attendance record, territory record, and accounts. Diswan bae helpem hem luksavve lo need blo kongregeson and hao hem savve givim help lo olketa wea lukaftarem olketa record hia. Coordinator blo body of elders shud mekem arrangement for circuit overseer kasem olketa record hia firstaem.

⁴⁵ Taem circuit overseer visit kam, hem bae story witim each pablisa lo olketa meeting, lo field service, taem olketa kaikai, and lo olketa nara taem. And tu, hem meet witim olketa elder and ministerial servant for sharem samfala kaonsel from Bible, olketa idea, and encouragement wea bae helpem olketa for duim responsibility blo olketa for lukaftarem olketa sheepsheep. (Prov. 27:23; Acts 20:26-32; 1 Tim. 4:11-16) Hem bae meet tu witim olketa pioneer for encouragem olketa and helpem olketa lo eni challenge wea olketa feisim lo ministry.

⁴⁶ If kongregeson garem eni problem, circuit overseer savve helpem olketa elder for stretem datwan lo taem wea hem visit. Sapos olketa no fit for stretem datwan lo datfala taem, circuit overseer bae helpem olketa elder and brata or sista wea insaed datfala problem for duim research lo olketa scripture wea fitim datfala situation. If branch office need for duim eni samting abaotem problem hia, circuit overseer and olketa elder bae raetem evri samting abaotem datfala problem lo wanfala report and sendem lo branch.

⁴⁷ Taem circuit overseer visitim kongregeson, hem bae attendim meeting witim datfala kongregeson. Maet taem blo samfala meeting bae change lelebet fitim direction from branch office. Hem bae givim tok wea bae encouragem, teachim, and strongim kongregeson. Hem traem best for helpem olketa for lovem Jehovah, Jesus Christ, and organization.

⁴⁸ Wanfala waka wea circuit overseer duim taem hem visit hem for encouragem olketa wea strong for share lo ministry and givim samfala idea. Staka lo kongregeson maet adjustim schedule blo olketa mekem olketa fit for sapotim field service lo datfala week, maet olketa auxiliary pioneer lo month blo visit. Eniwan wea laek for waka witim hem or waef blo hem savve mekem appointment. Bae iu lanem staka samting taem circuit overseer or waef blo hem joinim iu lo olketa Bible study and return visit. Taem iu strong for sapotim olketa arrangement blo datfala visit, datwan mekem evriwan hapi.​—Prov. 27:17.

⁴⁹ Evri year, each circuit garem tufala circuit assembly. Circuit overseer nao garem responsibility for organizem olketa assembly hia. Circuit overseer appointim assembly overseer and assistant assembly overseer. Olketa bae waka tugeta for organizem assembly. Diswan bae helpem circuit overseer for concentrate nomoa lo assembly program. Circuit overseer bae markem tu samfala man wea fit for lukaftarem samfala department. Hem markem tu samwan for duim audit lo account blo circuit afta each assembly. Evri year, wanfala circuit assembly hem witim branch speaker wea hem nao bae visiting speaker. From samfala stap farawe or bikos assembly hall hem smol, olketa divaedem samfala circuit lo olketa grup for duim circuit assembly.

⁵⁰ Circuit overseer sendem field service report blo hem lo branch office lo end blo each month. If circuit overseer spendem selen for peim fare, kaikai, ples for stap, and olketa nara samting wea hem needim for duim waka blo hem, and kongregeson no fit for changem, hem bae sendem olketa expenses hia lo branch office. Olketa circuit overseer sure if Kingdom blo Jehovah nao first samting, hem bae provaedem wat olketa needim olsem Jesus promisim. (Luke 12:31) Olketa kongregeson tinghae lo privilege for lukaftarem olketa elder hia wea kam for helpem olketa.​—3 John 5-8.

BRANCH KOMITI

⁵¹ Lo each branch office blo Olketa Jehovah’s Witness evriwea lo world, thri or winim thrifala brata wea qualify and mature lo spiritual wei bae waka olsem Branch Komiti for lukaftarem preaching waka lo datfala kantri or olketa nara kantri wea stap anda lo datfala branch. Wanfala member blo datfala komiti bae serve olsem coordinator blo Branch Komiti.

⁵² Olketa wea waka insaed Branch Komiti lukaftarem olketa samting blo evri kongregeson lo datfala branch territory. Datfala komiti lukaftarem waka for preachim gud nius abaotem Kingdom lo branch territory, and for datfala waka hem gohed, datfala komiti mekem arrangement for startim niu kongregeson and circuit. Branch Komiti lukaftarem tu waka blo olketa missionary and spesol, regular, and auxiliary pioneer. Lo taem blo olketa assembly and convention, datfala komiti mekem arrangement and givim assignment mekem olketa “duim evri samting long wei wea hem stret and wea no olobaot.”​—1 Cor. 14:40.

⁵³ Olketa appointim wanfala Kantri Komiti lo samfala kantri wea stap anda lo Branch Komiti blo nara kantri. Diswan hem for helpem olketa for savve lo waka wea gohed lo ples wea Kantri Komiti stap. Hem lukaftarem olketa samting lo Bethel Home and office, deal witim olketa leta and report, and lukaftarem waka wea gohed lo field. Kantri Komiti waka tugeta witim Branch Komiti mekem gud nius abaotem Kingdom kasem staka ples.

⁵⁴ Governing Body nao appointim olketa brata wea waka lo Branch Komiti and Kantri Komiti.

HEDQUARTER REPRESENTATIVE

⁵⁵ Samfala taem, Governing Body mekem arrangement for olketa brata wea qualify for visitim each branch evriwea lo earth. Brata wea duim datfala waka olketa kolem lo hedquarter representative. Main waka wea hem duim hem for encouragem Bethel famili and for helpem Branch Komiti witim olketa problem or olketa kwestin wea maet kamap lo waka for preach and mek disaepol. Disfala brata meet tu witim samfala circuit overseer and samfala taem meet witim olketa missionary. Taem hem duim datwan, hem story witim olketa abaotem problem and need wea olketa garem, and givim encouragement for strongim olketa for duim important waka, wea hem nao for preach and mek disaepol.

⁵⁶ Hedquarter representative hem interest for savve hao nao waka for preachim Kingdom hem gohed lo field and olketa nara samting lo kongregeson. If taem fitim, hem savve visitim tu olketa remote transleison office. Taem hedquarter representative visitim wanfala branch, hem savve share tu lo preaching waka.

LEAD LO GUDFALA WEI

⁵⁷ Iumi kasem barava gud samting from wei wea olketa mature Christian brata waka hard and lukaftarem iumi from olketa lovem iumi. Taem iumi stap anda lo olketa overseer wea kasem appointment for lukaftarem olketa sheepsheep, iumi wan mind witim Hed blo kongregeson, Christ Jesus. (1 Cor. 16:15-18; Eph. 1:22, 23) From datwan, spirit blo God stap lo olketa kongregeson evriwea lo world, and toktok blo God gaedem waka evriwea lo earth.​—Ps. 119:105.