Adam and Eve Disobeyim God

Wanday taem Eve stap seleva, wanfala snek story lo hem. Snek hia sei: ‘Hao, hem tru God stopem iutufala for no kaikaim frut blo evri tree lo garden?’ Eve sei: ‘Mitufala savve kaikaim frut blo evri tree bat frut blo wanfala tree nomoa mitufala no kaikaim. If mitufala kaikaim frut blo datfala tree, bae mitufala dae.’ Datfala snek sei: ‘Iutufala bae no dae. Iu savve, if iutufala kaikaim frut blo datfala tree, bae iutufala olsem God.’ Hao, hem tru? Nomoa. Bat Eve bilivim datfala snek. Taem Eve gohed lukluk lo datfala frut, hem laek kaikaim tumas. So hem kaikaim datfala frut and givim samfala lo Adam. Adam savve tufala bae dae if tufala disobeyim God. Nomata olsem, Adam kaikaim datfala frut.

Then lo datfala sem day, Jehovah story kam lo Adam and Eve. Hem askem tufala why nao tufala disobeyim hem. Eve blamem datfala snek, and Adam blamem Eve. From Adam and Eve disobeyim Jehovah, hem aotem tufala from datfala garden. For mek sure tufala no go bak moa lo datfala garden, hem putim olketa angel and wanfala sword blo fire for gaedem road wea lead go for garden hia.

Jehovah sei datwan wea laea lo Eve bae kasem panis tu. Ino snek nao wea story lo Eve. Jehovah no wakem olketa snek for toktok. Wanfala nogud angel nao iusim datfala snek for toktok. Hem duim datwan for trikim Eve. Nem blo angel hia hem Satan datfala Devil. Lo future, Jehovah bae finisim Satan mekem hem no gohed trikim pipol for duim olketa nogud samting.