Olketa Bighed Againstim Jehovah

Gogo, taem olketa Israelite lo wilderness, Korah, Dathan, Abiram, and nara 250 Israelite bighed againstim Moses. Olketa sei lo hem: ‘Mifala les lo iu nao! Why nao iu shud leader blo mifala and Aaron hem hae priest? Jehovah hem stap witim iumi evriwan, no iu and Aaron nomoa.’ Jehovah no hapi lo samting wea olketa duim, from hem ting lo datwan olsem olketa bighed againstim hem!

Moses talem Korah and olketa wea saedem hem: ‘Kam lo tabernacle tumoro, and tekem kam olketa fire holder blo iufala and putim incense lo olketa. Jehovah bae showim hu nao man wea hem chusim.’

Lo next day, Korah and 250 Israelite man go for meetim Moses lo tabernacle. Lo there olketa bonem incense olsem olketa nao priest. Jehovah talem Moses and Aaron: ‘Iutufala muv aot from Korah and olketa man wea saedem hem.’

Korah hem go lo tabernacle, bat Dathan, Abiram, and famili blo olketa no laek for go. Jehovah talem olketa Israelite for muv aot from tent blo Korah, Dathan, and Abiram. Semtaem nomoa olketa Israelite muv aot. Dathan, Abiram, and famili blo olketa standap aotsaed lo tent blo olketa. Seknomoa graon hem open and swallom olketa! Lo datfala tabernacle, wanfala fire kam daon and bonem Korah and 250 man blo hem.

Then Jehovah talem Moses: ‘Tekem wanfala stik from leader blo each tribe, and raetem nem blo each leader lo each stik. Bat raetem nem blo Aaron lo datfala stik blo tribe blo Levi. Putim olketa stik hia insaed lo tabernacle and stik blo man wea mi chusim, bae olketa flaoa grow lo hem.’

Lo next day, Moses holem kam evri stik hia and showim lo olketa leader. Stik blo Aaron nao olketa flaoa grow lo hem, and hem garem olketa almond frut wea raep. Datwan showim Jehovah chusim Aaron for hem nao hae priest.