Wanfala Test lo Maunt Carmel

Datfala ten tribe kingdom blo Israel garem staka nogud king, worst wan nao Ahab. Hem maritim wanfala wicked woman wea worshipim Baal. Nem blo hem Jezebel. Ahab and Jezebel mekem Baal worship big tumas lo datfala land and killim dae olketa profet blo Jehovah. Wat nao Jehovah duim? Hem sendem profet Elijah for talem wanfala message lo Ahab.

Elijah talem King Ahab dat bikos lo olketa nogud samting wea hem duim, bae hem no rain lo Israel. For winim thri years, olketa garden no grow and pipol hangere. Then Jehovah sendem Elijah go bak moa lo Ahab. Datfala king sei: ‘Iu nao ia! Iu man for mek trabol.’ Elijah sei: ‘Ino mi nao stopem rain. Iu nao ia bikos iu worshipim Baal. Bae iumi mekem wanfala test for pruvim datwan. Kolem evriwan lo Israel and olketa profet blo Baal for kam ontop lo Maunt Carmel.’

Pipol hipap kam lo datfala maunten. Elijah sei: ‘Iufala disaed. If Jehovah nao datfala tru God, followim hem. Bat sapos Baal nao hem tru, iufala followim hem. Mi mekem disfala challenge for iufala. Datfala 450 profet blo Baal shud redyim offering blo olketa and singaot lo god blo olketa, and bae mi redyim offering and singaot go lo Jehovah. God wea iusim fire for ansa kam, datwan nao hem tru God.’ Evriwan agree.

Olketa profet blo Baal redyim nao datfala offering. Full day nao olketa singaot lo god blo olketa: ‘O Baal, ansarem mifala!’ Taem Baal no ansa, Elijah mekfani abaotem hem. Hem sei: ‘Iufala singaot big. Masbi hem sleep, and samwan need for go wekapem hem.’ Hem evening nao bat olketa profet blo Baal gohed singaot yet. Bat no eniwan ansarem olketa.

Elijah putim offering blo hem lo altar and pourim wata evriwea ontop lo datfala altar. Then hem prea: ‘O Jehovah, plis letem pipol hia savve iu nao datfala tru God.’ Semtaem nomoa, Jehovah sendem kam fire from heven and bonem datfala offering. Evri pipol hia singaot: ‘Jehovah nao datfala tru God!’ Elijah sei: ‘No letem eniwan lo olketa profet blo Baal ranawe!’ Lo datfala day, olketa killim dae 450 profet blo Baal.

Taem wanfala smol cloud showaot ontop lo sea, Elijah talem Ahab: ‘Big rain bae kam. Redyim chariot blo iu and go bak.’ Skae hem start for dark, wind hem blow, and big rain start for foldaon. So datfala drae season hem finis nao. Ahab raedem fast chariot blo hem. Bat Jehovah helpem Elijah for ran fast winim datfala chariot! Bat hao, evri hard taem blo Elijah finis nao? Iumi lukim.