Jehovah Strongim Elijah

Jezebel herem samting wea happen lo olketa profet blo Baal, and hem kros tumas. Jezebel sendem go wanfala message lo Elijah: ‘Tumoro, iu bae dae olsem olketa profet blo Baal.’ Elijah fraet fogud and ranawe go lo wilderness. Hem prea olsem: ‘Jehovah, diswan hem tumas nao. Letem mi dae nomoa.’ From Elijah taed tumas, hem sleep andanit wanfala tree.

Wanfala angel wekapem hem and sei: ‘Iu getap and kaikai.’ Elijah lukim wanfala raon bred ontop olketa hot ston and wanfala jug wata. Hem kaikai and drink then hem sleep bak moa. Datfala angel wekapem hem moa and sei: ‘Iu kaikai. Iu needim strong for disfala gogo blo iu.’ So Elijah kaikai moa. Then hem wakabaot for 40 days and 40 naet, for kasem Maunt Horeb. Taem Elijah kasem lo there, hem go insaed wanfala cave for sleep. Bat Jehovah story kam lo hem. Hem sei: ‘Elijah, wat nao iu duim lo hia?’ Elijah sei: ‘Pipol lo Israel no keepim agreement blo iu. Olketa distroem olketa altar blo iu and killim dae olketa profet blo iu. Distaem olketa laek for killim mi dae tu.’

Jehovah talem hem: ‘Iu go and standap lo maunten.’ Firstaem, wanfala strong wind blow pasim datfala cave. Then, wanfala earthquake and then wanfala fire. Bihaen datwan, Elijah herem wanfala voice wea tok kwaet nomoa. Hem kavarem feis blo hem lo coat blo hem and go standap aotsaed lo datfala cave. Then Jehovah askem hem why nao hem ranawe. Elijah sei: ‘Mi nomoa stap laef.’ Bat Jehovah sei lo hem: ‘Iu no stap seleva. Mi garem 7,000 man lo Israel wea still worshipim mi. Go and appointim Elisha for hem profet changem iu.’ So Elijah go duim nao samting wea Jehovah talem hem for duim. Iu tingse Jehovah savve helpem iu tu taem iu duim wat hem laekem iu for duim? Ia, bae hem duim datwan. Iumi lukim samting wea happen lo datfala taem wea hem no rain.