Wanfala Wicked Queen Kasem Panis

From window lo palace blo King Ahab lo Jezreel, hem savve lukim grape planteison blo wanfala man wea nem blo hem Naboth. Ahab laekem datfala planteison, and hem laek for baem from Naboth. Bat Naboth no laek for salem lo hem bikos lo law blo Jehovah hem no stret for salem land wea man inheritim. Hao, Ahab respectim Naboth from hem duim stret samting? Nomoa. Ahab kros fogud. Hem feel nogud tumas so hem stap nomoa lo rum and no laek kaikai.

Wicked Queen Jezebel wea hem waef blo Ahab, sei lo hem: ‘Iu nao king blo Israel. Iu savve kasem eni samting wea iu laekem. Bae mi tekem datfala land for iu.’ So hem raetem olketa leta and sendem lo olketa elder lo datfala taon, hem talem olketa for accusim Naboth and sei hem tok nogud lo God and for sutim hem dae witim ston. Olketa elder hia duim samting wea Jezebel talem, then Jezebel sei lo Ahab: ‘Naboth hem dae nao. Datfala grape planteison hem blo iu nao.’

Ino Naboth nomoa Jezebel killim dae. Hem bin killim dae staka pipol wea lovem Jehovah. Hem worshipim olketa idol and duim olketa nogud samting. Jehovah lukim evri nogud samting wea Jezebel duim. Wat nao Jehovah bae duim lo hem?

Afta Ahab dae, son blo hem Jehoram nao king. Jehovah sendem wanfala man wea nem blo hem Jehu for panisim Jezebel and famili blo hem.

Jehu raedem chariot blo hem go lo Jezreel, ples wea Jezebel stap. Jehoram kam lo chariot blo hem for meetim Jehu and askem hem olsem: ‘Hao, iu kam for mek peace?’ Jehu sei: ‘Hard for iumi garem peace taem mami blo iu Jezebel, hem gohed for duim olketa nogud samting.’ Jehoram trae for tanem chariot blo hem and ranawe. Bat Jehu sutim hem lo wanfala arrow, and hem dae.

Then Jehu go lo palace blo Jezebel. Taem Jezebel herem dat Jehu hem kam, hem putim mekap, staelem hair blo hem, and sidaon weit lo window lo palace blo hem. Taem Jehu arrive, Jezebel tok raf lo hem. So Jehu singaot go lo olketa wakaman blo Jezebel wea standap saed lo hem: “Torowem hem kam daon!” Olketa torowem go daon Jezebel lo window, and hem foldaon lo graon and dae.

Afta datwan, Jehu killim dae 70-fala son blo Ahab and aotem Baal worship from datfala land. Iu lukim hao Jehovah savve lo evri samting and hem panisim olketa wea duim nogud samting lo raet taem?