Jehovah Sapotim Jehoshaphat

Jehoshaphat, king blo Judah, hem distroem olketa altar blo Baal and olketa idol lo datfala land. Hem laekem pipol for savve abaotem law blo Jehovah. So hem sendem olketa prince and olketa Levite for go teachim law blo Jehovah lo pipol evriwea lo Judah.

Olketa nation wea stap klosap olketa fraet for attakim Judah bikos olketa savve Jehovah stap witim pipol blo hem. Olketa even tekem kam olketa present for King Jehoshaphat. Bat bihaen, olketa Moabite, olketa Ammonite, and olketa from Seir kam for faet againstim Judah. Jehoshaphat savve hem needim help blo Jehovah. Hem talem evri man, woman, and olketa pikinini for kam lo Jerusalem. Hem standap front lo evriwan and prea olsem: ‘Jehovah, iu nomoa savve helpem mifala for win. Plis talem mifala wat for duim.’

Jehovah ansarem datfala prea olsem: ‘Iufala mas no fraet. Bae mi helpem iufala. Iufala redi, standap kwaet, and lukim hao bae mi sevem iufala.’ Wat nao Jehovah duim for sevem olketa?

Lo morning lo next day, Jehoshaphat chusim samfala man for singsing and talem olketa for march go firstaem lo datfala army. Olketa march from Jerusalem go kasem Tekoa wea hem nao ples wea olketa faet lo hem.

Taem olketa man for singsing hapi and singsing big for praisem Jehovah, Jehovah faet for pipol blo hem. Hem mekem olketa Ammonite and olketa Moabite for konfius and attakim each other, and no eniwan lo olketa hem laef. Bat Jehovah protectim pipol lo Judah, olketa soldia, and olketa priest. Evri pipol lo olketa nation wea stap klosap herem samting wea Jehovah duim, and olketa savve Jehovah hem still sapotim pipol blo hem. Hao nao Jehovah sevem pipol blo hem? Hem sevem olketa lo staka difren wei. Hem no needim eniwan for helpem hem duim datwan.