Esther Sevem Pipol blo Hem

Esther hem wanfala gele lo Jew wea stap lo Shushan, wanfala taon lo Persia. Staka years bifor, Nebuchadnezzar bin tekem olketa famili blo hem from Jerusalem. Kasin blo hem Mordecai wea hem wanfala servant blo King Ahasuerus blo Persia nao adoptim hem.

King Ahasuerus laekem wanfala niu queen. So olketa servant blo hem tekem kam olketa young gele wea luk naes tumas lo datfala land, includim Esther tu. Lo evri young gele hia, Esther nao king chusim for hem queen. Mordecai talem Esther for no talem eniwan dat hem wanfala Jew.

Wanfala praod man wea nem blo hem Haman, hem boss blo evri hae official. Hem laekem evriwan for baodaon lo hem. Bat Mordecai no laek for duim datwan, so Haman kros tumas and laek for killim hem dae. Taem Haman faendaot dat Mordecai hem wanfala Jew, hem mekem plan for killim dae evri Jew lo datfala land. Hem talem lo king: ‘Olketa Jew nating obeyim iu, iu mas killim olketa dae.’ Ahasuerus sei: ‘Duim eni samting wea iu laekem,’ so hem givim authority lo hem for raetem wanfala law. Haman raetem wanfala law wea talem pipol for killim dae evri Jew lo mek-13 day lo month blo Adar. Jehovah lukim evri samting wea happen.

Esther no savve lo eni samting abaotem datfala law. So Mordecai sendem copy blo datfala law lo hem and sei: ‘Go and story lo king.’ Esther sei: ‘Eniwan wea go lo king bat king no invaetem hem, olketa mas killim hem dae. 30 days finis nao king no talem mi for go! Bat bae mi go. If hem pointim kam scepter blo hem, bae mi laef. Bat if nomoa, bae mi dae nao.’

So Esther go lo courtyard blo king. Taem king lukim Esther, hem pointim go scepter blo hem lo Esther. Then Esther wakabaot go lo hem and king ask olsem: ‘Esther, wat nao iu laek for mi duim for iu?’ Hem sei: ‘Mi invaetem iu and Haman for kam lo wanfala feast tuday.’ Lo datfala feast, Esther invaetem tufala for kam moa lo second feast. Lo second feast hia, king askem hem moa: ‘Wat nao iu laek for mi duim for iu?’ Esther sei ‘Samwan laek for killim mi dae and olketa pipol blo mi tu. Plis sevem mifala.’ Then King sei: ‘Hu nao laek for killim iu dae?’ Esther sei: ‘Disfala nogud man Haman.’ Ahasuerus kros tumas so hem talem olketa for killim dae Haman stretawe.

Bat no eniwan fit for cancelim law blo Haman, even datfala king. So king appointim Mordecai for boss lo evri hae official and givim authority lo hem for raetem wanfala niu law. Mordecai raetem wanfala law wea givim permission for olketa Jew for defendim olketa seleva taem pipol kam attakim olketa. Lo mek-13 day lo month blo Adar, olketa Jew winim enemy blo olketa. Start from datfala taem, olketa celebratem datwan evri year.