Jehovah Protectim Jesus

Lo east saed blo Israel, pipol bilivim olketa star savve leadim olketa lo ples wea olketa laek go lo hem. Wanfala naet, samfala man from East lukim wanfala braet star wea muv lo skae and olketa followim datwan. Datfala “star” leadim olketa go lo Jerusalem. Then olketa man hia start for askem pipol: ‘Wea nao datfala pikinini wea bae king blo olketa Jew? Mifala kam for baodaon lo hem.’

Taem Herod, king blo Jerusalem, herem story abaotem wanfala niu king, hem wari tumas. Hem askem olketa chief priest: ‘Datfala king bae born lo wea?’ Olketa sei lo hem: ‘Olketa profet sei bae hem born lo Bethlehem.’ So Herod kolem kam olketa man hia from East and talem olketa: ‘Go lo Bethlehem and lukaotem datfala pikinini. Taem iufala faendem hem kam bak and talem mi. Mi tu laek go for baodaon lo hem.’ Bat datwan no tru.

Datfala “star” start for muv moa. And olketa man hia followim go lo Bethlehem. Gogo “star” hia stop ontop wanfala haos and olketa man hia go insaed. Olketa lukim Jesus witim mami blo hem, Mary. Olketa baodaon lo pikinini hia and givim hem olketa present olsem gold, frankincense and myrrh. Hao, Jehovah nao sendem olketa man hia for lukaotem Jesus? Nomoa.

Lo datfala naet, Jehovah talem Joseph lo wanfala dream: ‘Herod laek for killim dae Jesus. Tekem waef and son blo iu and ranawe go lo Egypt. Stap lo there go kasem taem mi talem iu dat hem sef for kam bak.’ Semtaem nomoa, Joseph and famili blo hem go lo Egypt.

Jehovah talem olketa man hia from East for no go bak lo Herod. So taem Herod faendaot olketa man hia no kam bak, hem kros fogud. From hem no savve faendem Jesus, hem givim order for killim dae evri smol boy lo Bethlehem wea sem age olsem Jesus. Bat Jesus hem sef from hem stap lo Egypt.

Gogo, Herod hem dae. Then Jehovah talem Joseph: ‘Distaem hem sef nao for iu go bak.’ Joseph, Mary, and Jesus go bak lo Israel, and olketa stap lo wanfala taon lo Nazareth.