Devil Testim Jesus

Afta Jesus hem baptaes, holy spirit leadim hem go lo wilderness. Hem no kaikaim eni samting for 40 days and hem hangere fogud. Then Devil kam for testim Jesus and sei lo hem: ‘If iu really Son blo God, talem olketa ston hia for change go lo bred.’ Bat Jesus talem toktok from olketa Scripture taem hem ansarem hem olsem: ‘Olketa Holy Raeting talem finis, hem no kaikai nomoa wea savve mekem man laef. Iu need for obeyim evri toktok wea Jehovah talem.’

Then, Devil testim Jesus moa. Hem sei: ‘If iu really Son blo God, jamp go daon from disfala highest part blo temple. Bikos olketa Holy Raeting talem finis dat God bae sendem olketa angel blo hem for sevem iu.’ Bat Jesus talem moa toktok from olketa Scripture. Hem sei: ‘Olketa Holy Raeting talem finis dat iu mas no testim Jehovah.’

Then, Satan showim hem evri kantri lo world and olketa riches and glory blo olketa and sei olsem: ‘Bae mi givim iu evri kantri hia and glory blo olketa if iu worshipim mi wantaem nomoa.’ Bat Jesus ansa olsem: ‘Iu go nao Satan! Olketa Holy Raeting talem finis dat iu mas worshipim Jehovah nomoa.’

So Devil hem go nao, and olketa angel kam and givim kaikai for Jesus kaikaim. Start lo datfala taem, Jesus preachim gud nius abaotem Kingdom. Hem nao waka wea God hem sendem hem kam lo earth for duim. Pipol laekem tumas olketa samting wea Jesus teachim, and olketa followim hem lo evri ples wea hem go.