Jesus Klinim Temple

Lo spring season blo year 30 C.E., Jesus go lo Jerusalem. Staka pipol nao kam lo datfala taon for Pasova. For offerim olketa animal lo temple hem part lo Pasova. So samfala pipol savve tekem kam animal blo olketa, bat olketa narawan savve peim animal lo Jerusalem.

Taem Jesus go lo temple, hem lukim pipol salem olketa animal lo there. Olketa ranem bisnis for kasem selen for olketa seleva insaed haos blo Jehovah for worship! Wat nao Jesus duim taem hem lukim datwan? Hem wakem wanfala whip from rope and raosem olketa sheepsheep and buluka from temple. Hem kapsaetem olketa coin and tebol blo pipol wea savve changem olketa difren selen. Then Jesus sei lo olketa wea salem olketa kurukuru: ‘Tekem go evri samting hia from disfala ples! No mekem haos blo Dadi blo mi olsem ples for ranem bisnis!’

Pipol lo datfala temple sapraes tumas lo wat Jesus duim. Olketa disaepol blo hem tingim datfala profesi abaotem Messiah: ‘Bae mi garem strong feeling for haos blo iu.’

Gogo, lo year 33 C.E., Jesus klinim temple second taem moa. Hem no letem eniwan for duim samting wea no showim respect for haos blo Dadi blo hem.