Jesus Preach Abaotem Kingdom

No longtaem afta Jesus baptaes, hem start for preach. Hem sei: ‘Kingdom blo God hem klosap nao.’ Olketa disaepol followim Jesus taem hem go lo olketa ples lo Galilee and Judea. Taem Jesus kam bak lo hom blo hem lo Nazareth, hem go lo sinagog, openem scroll blo Isaiah and readim big olsem: ‘Jehovah givim mi holy spirit mekem mi savve preachim gud nius.’ Wat nao Jesus minim? Hem minim nomata pipol laek for lukim Jesus duim olketa mirakol, main reason why hem kasem holy spirit hem for preachim gud nius. Then hem sei lo olketa wea lisin: ‘Tuday disfala profesi hem fulfill nao.’

Then Jesus go lo Sea blo Galilee, lo there hem meetim fofala disaepol blo hem wea olketa fisherman. Hem invaetem olketa and sei: ‘Kam followim mi, and bae mi mekem iufala fishing for kasem man.’ Olketa hia nao Peter, Andrew, James and John. Semtaem nomoa, olketa lusim fishing bisnis blo olketa and followim hem. Olketa go evriwea lo Galilee for preach abaotem Kingdom blo Jehovah. Olketa preach lo olketa sinagog, lo olketa market ples and lo olketa street. Wanfala big crowd followim olketa lo evri ples wea olketa go lo hem. Nius abaotem Jesus hem spred evriwea, go kasem farawe ples olsem Syria.

Then, Jesus givim paoa lo samfala disaepol blo hem for healim pipol and raosem olketa demon. Olketa narawan go followim hem taem hem preach from taon tu taon and vilij tu vilij. Samfala faithful woman tu followim hem includim Mary Magdalene, Joanna, Susanna and olketa narawan lukaftarem Jesus and olketa disaepol blo hem.

Afta Jesus trainim olketa disaepol blo hem, hem sendem olketa for go preach. Taem olketa go preach evriwea lo Galilee, staka baptaes and kamap disaepol. From staka nao laek for kamap disaepol, Jesus comparem olketa olsem wanfala planteison wea redi for harvestim. Hem sei: ‘Askem Jehovah for sendem kam staka wakaman for harvestim planteison.’ Bihaen, hem chusim 70-fala disaepol blo hem, hem markem tufala for waka tugeta and sendem olketa for go preach evriwea lo Judea. Olketa preach lo evri difren kaen pipol abaotem Kingdom. Taem olketa disaepol kam bak, olketa hapi tumas for storyim lo Jesus evri samting wea happen. Devil no fit for duim eni samting for stopem preaching waka.

Jesus mek sure dat olketa disaepol blo hem bae gohed for duim disfala important waka afta hem go bak lo heven. Hem sei lo olketa: ‘Preachim gud nius evriwea lo earth. Teachim pipol abaotem Word blo God, and baptaesim olketa.’