Jesus Chusim Twelvfala Aposol

Afta Jesus preach for samting olsem wan and haf year, hem mas mekem wanfala important disison. Hu nao bae hem chusim for waka tugeta witim hem? Hu nao bae hem trainim for lukaftarem Christian kongregeson? For mekem olketa disison hia, Jesus needim help blo Jehovah. So hem go lo wanfala maunten for hem stap seleva and hem prea for full naet. Lo morning, Jesus kolem kam samfala disaepol blo hem and hem chusim 12-fala aposol. Which wan lo olketa nao iu tingim nem blo olketa? Nem blo olketa nao hem Peter, Andrew, James, John, Philip, Bartholomew, Thomas, Matthew, James son blo Alphaeus, Thaddaeus, Simon and Judas Iscariot.

Twelvfala hia savve gogo witim Jesus. Afta hem trainim olketa, hem sendem olketa for go preach. Jehovah givim paoa lo olketa for raosem olketa demon and for healim pipol wea sik.

Jesus kolem twelvfala hia olketa fren blo hem and hem trustim olketa. Olketa Pharisee sei olketa aposol hia olketa no skul gud and olketa man nating. Bat Jesus no ting olsem abaotem olketa, hem trainim olketa for duim waka blo olketa. Olketa bae stap witim Jesus lo barava important taem lo laef blo hem, olsem bifor hem dae and afta hem resurrect. Lo twelvfala hia, staka lo olketa from Galilee olsem Jesus. Samfala olketa marit.

Olketa aposol no perfect and savve mekem olketa mistek. Samtaems olketa no tingting bifor olketa toktok and savve mekem olketa nogud disison. Samfala taem olketa no savve patient. Olketa savve raoa abaotem hu nao hem moa important. Bat olketa gud pipol wea lovem Jehovah. Olketa nao first wan lo Christian kongregeson wea duim important waka bihaen Jesus go bak lo heven.