Jesus Healim Wanfala Man lo Sabbath

Olketa Pharisee heitim Jesus and olketa laek faendem eni samting nomoa for arrestim Jesus. Olketa sei hem shud no healim pipol wea sik lo Sabbath. Lo wanfala Sabbath, Jesus lukim wanfala man wea blind hem sidaon lo street and askem selen. Hem sei olsem lo olketa disaepol blo hem: ‘Lukim wat paoa blo God bae duim for helpem disfala man.’ Jesus spit lo graon for hem tuwet lelebet then hem putim lo eye blo datfala man. Jesus sei lo hem: ‘Go and wasim eye blo iu lo pool wata blo Siloam.’ Man hia duim wat Jesus talem and for firstaem lo laef blo hem, hem savve lukluk nao.

Pipol sapraes fogud. Olketa sei: ‘Man wea savve sidaon and ask selen ia nao ia, or eniwan wea luk olsem hem?’ Man hia sei: ‘Mi nao datfala man wea born blind!’ Olketa pipol askem hem: ‘Bat hao nao iu savve lukluk distaem?’ Taem hem storyim samting wea happen, olketa tekem hem go lo olketa Pharisee.

Then datfala man sei lo olketa Pharisee: ‘Jesus putim graon wea tuwet lelebet lo eye blo mi and talem mi for go and wasim aot. So mi duim datwan, and distaem mi savve lukluk nao.’ Olketa Pharisee sei: ‘If Jesus healim iu lo Sabbath, paoa blo hem no kam from God.’ Bat olketa narawan sei: ‘If paoa blo hem no kam from God, hard tumas for hem duim datwan.’

So olketa Pharisee kolem kam parents blo man hia and askem tufala: ‘Hao nao son blo iutufala savve lukluk moa distaem?’ Parents blo datfala man fraet bikos olketa Pharisee sei olketa bae aotem from sinagog eniwan wea garem faith lo Jesus. So tufala sei: ‘Mifala no savve, iufala askem hem.’ Olketa Pharisee askem staka kwestin lo datfala man gogo hem sei: ‘Mi talem iufala finis evri samting wea mi savve. Why nao iufala gohed askem mi?’ Olketa Pharisee kros fogud and raosem hem go aot.

Taem Jesus lukim datfala man, hem askem hem olsem: ‘Hao, iu garem faith lo Messiah?’ Man hia sei: ‘Bae mi garem faith sapos mi savve lo hem.’ Jesus sei: ‘Mi nao datfala Messiah.’ Jesus hem kaen, iaman? Hem no just healim datfala man nomoa bat hem helpem hem tu for garem faith.