Olketa Arrestim Jesus

Jesus and olketa aposol blo hem wakabaot go thru lo Kidron Valley for go lo Maunt Olive. Hem midol naet finis and hem full moon. Taem olketa arrive lo garden blo Gethsemane, Jesus sei lo olketa: “Iufala stap lo hia and gohed for lukaot.” Then Jesus wakabaot go lelebet insaed datfala garden and hem kneel daon. Hem wari tumas, so hem prea lo Jehovah olsem: “Duim wanem iu laekem.” Then Jehovah sendem wanfala angel for encouragem Jesus. Taem Jesus go bak lo thrifala aposol blo hem, hem lukim olketa sleep. Hem sei: ‘Wekap! Distaem hem no taem for sleep! Klosap nao olketa enemy blo mi bae kam for tekem mi.’

No longtaem nomoa Judas arrive nao, hem leadim kam wanfala big grup wea holem olketa sword and stik. Hem savve lo ples for faendem Jesus bikos staka taem nao olketa savve kam lo disfala garden. Judas talem lo olketa soldia dat hem bae showim Jesus lo olketa. So hem go stret lo Jesus and sei: ‘Hello Teacher,’ and kissim hem. Jesus sei: ‘Judas, iu kissim mi for betrayim mi?’

Jesus go lo datfala grup and ask olsem: “Hu nao iufala lukaotem?” Olketa sei: ‘Jesus blo Nazareth.’ Then hem sei: “Mi nao ia,” and olketa man hia seke and foldaon lo graon. Jesus askem olketa moa: “Hu nao iufala lukaotem?” Olketa sei moa: ‘Jesus blo Nazareth.’ Jesus sei: ‘Mi talem iufala finis mi nao datfala man. Letem olketa man hia go.’

Taem Peter lukim samting wea happen, hem tekem wanfala sword and katemaot ear blo Malchus, wanfala wakaman blo hae priest. Bat Jesus tasim ear blo datfala man and hem gud bak. Then hem sei lo Peter: ‘Leavim sword ia. If iu iusim sword for killim dae narawan, bae olketa killim iu dae witim sword tu.’ Olketa soldia holem Jesus and taengem hand blo hem, and olketa aposol ranawe nao. Then datfala grup tekem hem go lo chief priest Annas. Hem kwestinim Jesus and sendem hem go lo haos blo Hae Priest Caiaphas. Bat wat nao happen lo olketa aposol?