Peter Denyim Jesus

Taem Jesus stap lo rum ontop witim olketa aposol blo hem, hem sei lo olketa: ‘Iufala evriwan bae lusim mi tunaet.’ Peter sei: ‘Mi hard ia! Nomata sapos evri narawan olketa lusim iu, mi bae hard for lusim iu.’ Bat Jesus sei lo Peter: ‘Bifor wanfala kokorako hem krae, thrifala taem nao bae iu sei iu no savve lo mi.’

Taem olketa soldia tekem Jesus go lo haos blo Caiaphas, staka lo olketa aposol ranawe. Bat tufala lo olketa go followim datfala crowd. Wanfala nao hem Peter. Hem go insaed courtyard lo haos blo Caiaphas and sidaon saed lo fire bikos hem cold. Then wanfala servant gele luksavve lo Peter and sei: ‘Mi savve lo iu! Iu savve gogo witim Jesus!’

Peter sei: ‘Nomoa, ino mi ia! Mi no savve wat nao iu tok abaotem!’ Then hem wakabaot go for gate. Bat nara servant gele luksavve lo hem and sei lo olketa narawan: ‘Disfala man tu savve gogo witim Jesus!’ Peter sei: ‘Mi no even savve lo Jesus!’ Wanfala man sei: ‘Iu tu wanfala lo olketa! Bikos hao iu story hem here olsem iu from Galilee, olsem Jesus.’ Bat Peter tok strong olsem: ‘Mi no savve lo hem!’

Semtaem nomoa, wanfala kokorako hem krae. Peter lukim Jesus luk kam lo hem. Then hem tingim toktok blo Jesus, hem go aotsaed and krae fogud.

Lo datfala taem, olketa lo Sanhedrin meet tugeta lo haos blo Caiaphas for kwestinim Jesus. Olketa disaed finis for killim dae Jesus, and distaem olketa luk for eni reason for duim datwan. Bat olketa no savve faendem eniting for accusim lo hem. Gogo, Caiaphas askem stret Jesus olsem: ‘Hao, iu Son blo God?’ Jesus sei: ‘Ia, mi nao ia.’ Caiaphas sei: ‘Iumi no needim eni pruv moa. Hem tok againstim God!’ Evriwan agree and sei: ‘Disfala man mas dae.’ Olketa slapem Jesus, spit lo hem, kavarem tufala eye blo hem and hitim hem, and sei: ‘If iu wanfala profet, talem mifala hu nao hitim iu!’

Taem hem daylaet, olketa tekem Jesus go lo Sanhedrin hall and askem hem moa: ‘Hao, iu nao Son blo God?’ Jesus ansa olsem: ‘Iufala nao talem datwan.’ Then olketa sei hem guilty bikos hem tok againstim God and olketa tekem go lo palace blo Pontius Pilate wea hem bigman blo Rome. Wat nao next samting wea happen? Bae iumi faendaot.