STUDY 18

Audience Shud Lanem Samting

1 Corinth 9:19-23

WANEM FOR DUIM: Helpem audience for ting raonem subject wea iu storyim. Bihaen long tok, audience shud feel olsem olketa lanem gud samting from tok bilong iu.

HAO FOR DUIM:

Tingim wanem audience savve finis. Winim wei for storyim nomoa samting wea audience savve finis long hem, teachim niu samting abaotem datfala subject long olketa.

No spendem staka taem long olketa point wea audience savve finis long hem. Iusim moa taem for storyim olketa niu point.
Duim research and ting raonem subject. Sapos fitim, iusim samfala information wea iu faendem long research or wanfala story long nius, for sapotim olketa main point. Ting raonem gud subject bilong iu, and mek sure eni information wea iu tekem from research hem fitim subject bilong iu.

Taem iu duim research, ting raonem olketa samting olsem ‘why, wanem taem, long wea, hu, and hao.’ Datwan bae helpem iu for minim gud subject bilong iu. Then, taem iu givim tok, iu savve askem samfala kwestin hia and storyim ansa wea iu faendem for mekem tok bilong iu interesting.
Mekhae long wei wea message bilong iu savve helpem audience. Storyim hao Bible savve helpem audience long wanem olketa duim evriday. Taem iu storyim samting pipol feisim, and wei and tingting bilong pipol, iusim olketa example wea fitim ples wea iu stap.