Wanem Nao Key for Win?

TUFALA willing young man isisi wakem wanfala machine for wanfala important test. Seknomoa, strongfala wind kam and tekem samting tufala wakem, torowem antap long air, and witim bigfala noise, bangam daon. Tufala feel wiki, standap and no tok. Careful and hard waka bilong tufala hem pisis bilong timba and metal nomoa.

For Orville and Wilbur Wright, samting wea happen long datfala day long October 1900, hem no first samting wea go rong taem olketa trae for wakem machine for flae wea hevi winim air. Tufala iusim finis samfala year and staka selen for traem.

Gogo, tufala win from tufala no givap. Long December 17, 1903, long Kitty Hawk, North Carolina, U.S.A., tufala Wright brata flaem for 12 second—wea diswan hem short sapos iumi markem long olketa aeroplane distaem—wanfala aeroplane wea garem engine wea tufala wakem. Nomata olsem datwan changem world for olowe!

For win long planti hard waka bilong iumi hem needim patient wei for no givap. Nomata sapos iumi laek for lanem gud niufala languis, wankaen waka, or mekem grow wei for fren, iumi savve kasem planti samting wea garem hae price only sapos iumi waka hard. Man for raet, Charles Templeton sei: “Klosap evritaem wei for win hem kam from wanfala samting nomoa: hard waka.” Nara man for raet, Leonard Pitts, Jr., sei: “Iumi savve tok abaotem savve, iumi saportim luck, bat planti taem, iumi no tinghae long barava important samting. Hard waka and planti taem wea iumi fail. Wei for waka for staka hour.”

Diswan strongim samting Bible talem longtaem go finis: “Hand bilong man wea hard waka bae rul.” (Proverbs 12:24) Hard waka minim iumi mas no givap long wanem iumi duim. Diswan nao iumi needim sapos iumi want for kasem samting iumi laekem. Wanem nao wei for no givap? Hao nao iumi no givap taem iumi aftarem olketa goal bilong iumi, and long wanem nao iumi shud no givap? Olketa kwestin hia bae kasem ansa insaed next article.

[Piksa Credit Line long page 3]

U.S. National Archives foto