Strong for Saportim Teaching Bilong God
“Trust long Jehovah witim full heart bilong iu and no depend long savve bilong iuseleva. Long evri wei bilong iu, lisin long hem, and hemseleva nao bae stretem gogo bilong iu.”—PROVERBS 3:5, 6.
1. Hao nao iumi savve kasem tingting bilong man winim enitaem bifor?
DISTAEM, samting olsem 9,000 difren niuspepa nao go aot evriday raonem world. Evri year olketa wakem samting olsem 200,000 niu buk long United States seleva. Wanfala report talemse maet 275 million Web page nao long Internet, long March bilong 1998. Olketa sei disfala namba bae grow 20 million page evri month. Winim enitaem bifor, pipol savve kasem planti information long eni subject nomoa. Samting olsem garem olketa gudfala saed, bat tumas information olsem kosim problem finis tu.
2. Wanem problem nao savve kamaot from wei for kasem planti information wea stap?
2 Samfala pipol pas long information nao, evritaem feedim wan kaen hangre for mas ap-tu-date taem olketa forgetim olketa samting wea moa important. Olketa narawan garem lelebet idea nomoa abaotem wanfala hardfala samting bat olketa kolem olketa seleva olsem expert nao. Witim lelebet savve wea olketa garem, olketa maet mekem olketa barava important disison wea savve kosim trabol for olketa seleva or nara pipol. Nara danger tu hem hao iumi savve kasem information wea laea or no mas stret. Planti taem no eni wei stap for mek sure sapos evri information hem tru and no ova tumas.
3. Wanem warning saed long wei for aftarem savve bilong man nao Bible hem givim?
3 Hem fasin bilong man for laek savve long samting. King Solomon luksavve long disfala problem for westem tumas taem for aftarem information wea iusles or wea maet savve spoelem iumi. Hem sei: “Herem disfala warning: Wei for mekem planti buk hem no savve finis, and for iusim tumas taem long olketa buk hia hem samting wea mekem body taed.” (Ecclesiastes 12:12) Planti handred year bihaen, aposol Paul raet long Timothy: “Gardim samting wea stap long kea bilong iu, tanawe from olketa rabis toktok wea spoelem holy samting and from olketa toktok wea againstim narawan wea giaman for kolem olsem ‘savve.’ From samfala laek show-off long kaen savve olsem, olketa lusim faith nao.” (1 Timothy 6:20, 21) Tru nao, olketa Christian tuday need for stap klia long wei for westem taem witim olketa nogud idea.
4. Wanem nao wanfala wei iumi savve showimaot iumi trustim Jehovah and olketa teaching bilong hem?
4 Olketa pipol bilong Jehovah kasem gud samting tu taem olketa followim toktok bilong Proverbs 3:5, 6: “Trust long Jehovah witim full heart bilong iu and no depend long savve bilong iuseleva. Long evri wei bilong iu, lisin long hem, and hemseleva nao bae stretem gogo bilong iu.” For trust long Jehovah hem minim tu wei for rejectim eni idea wea no stret witim Word bilong God, nomata hem kamaot from tingting bilong iumiseleva or bilong nara fren bilong iumi. For protectim iumi long spiritual saed, hem barava important for iumi trainim paoa bilong iumi for luksavve mekem iumi luksavve and stap klia from olketa nogud information hia. (Hebrews 5:14) Letem iumi storyim samfala ples wea kaen information olsem kamaot from.
Wanfala World wea Satan Bossim
5. Wanem nao wanfala ples wea olketa nogud idea savve kamaot from hem, and hu nao bihaenem?
5 Disfala world raonem iumi hem fulap witim planti nogud idea. (1 Corinthians 3:19) Jesus Christ prea olsem long God abaotem olketa disaepol bilong hem: “Mi askem iu, no for tekaotem olketa from world, bat for lukaftarem olketa from wicked wan.” (John 17:15) Wei wea Jesus ask for protection from “wicked wan” showimaot paoa wea Satan garem long disfala world. Wei wea iumi wanfala Christian hem no minim diswan satem iumi from olketa nogud paoa bilong disfala world. John raet: “Iumi savve iumi kam from God, bat full world hem stap long paoa bilong wicked wan.” (1 John 5:19) Especially long disfala lelebet taem bilong olketa last day, iumi expectim Satan and olketa demon bilong hem for fulimap disfala world witim nogud information.
6. Hao nao hapitaem savve tanem tingting bilong iumi?
6 Iumi expectim tu hao samfala nogud information hia maet luk olsem hem gud nomoa. (2 Corinthians 11:14) Olsem example, tingim hapitaem bilong distaem, witim olketa TV program, movie, music, and olketa magasin. Planti bae agree hao planti taem, samfala kaen hapitaem hem mekhae long nogud samting, olsem dirty fasin, raf fasin, and olketa nogud drug. Taem pipol firstaem lukim wankaen hapitaem wea barava nogud tumas, maet olketa seke. Bat sapos olketa lukim olowe bae hem kamap samting nating nomoa long olketa. Iumi shud no ting long olketa nogud hapitaem olsem hem gud or olraet nomoa.—Psalm 119:37.
7. Wanem kaen savve bilong man nao savve daonem trust bilong iumi long Bible?
7 Tingim nara ples wea olketa nogud information hem kam from—planti idea wea olketa scientist and nara savveman raetem againstim wei wea Bible hem tru. (Markem James 3:15.) Kaen toktok olsem kamap planti taem insaed olketa important magasin and buk, and hem savve isisi daonem trust long Bible. Samfala pipol interest tumas for daonem paoa bilong Word bilong God witim wei for olowe talem tingting bilong olketa seleva. Wanfala kaen problem olsem stap long taem bilong olketa aposol, wea showaot klia long olketa toktok bilong aposol Paul: “Lukaot: maet samwan hem kasholem iufala thru long olketa idea and giaman trik wea followim kastom bilong man, wea fitim olketa samting bilong world and wea no followim Christ.”—Colossians 2:8.
Olketa Enemy Bilong Truth
8, 9. Hao nao wei for apostate hem showaot tuday?
8 Olketa apostate savve putim nara danger for spiritual saed bilong iumi. Aposol Paul talem finis hao wei for apostate bae kamap midolwan olketa wea sei olketa Christian. (Acts 20:29, 30; 2 Thessalonians 2:3) Bihaen dae bilong olketa aposol, datfala toktok kamap tru taem bigfala wei for apostate lead go long start bilong Christendom. Tuday, no eni bigfala wei for apostate kamap midolwan pipol bilong God. Nomata olsem, tu-thrifala lusim iumi finis, and samfala long olketa barava strong for tokspoelem Olketa Jehovah’s Witness witim olketa laea story wea olketa spreadim. Samfala waka witim olketa nara grup for againstim trufala worship. Taem olketa duim olsem, olketa saed witim barava firstfala apostate, Satan.
9 Samfala apostate iusim olketa difren wei for kasem planti pipol, insaed diswan hem computer tu, for spreadim laea story abaotem Olketa Jehovah’s Witness. From diswan, taem wanfala man maet barava interest long biliv bilong iumi, olketa maet kasem laea toktok bilong olketa apostate. Samfala Witness tu seknomoa faendem disfala nogud information. And tu, planti taem olketa apostate tekpart long television or radio program. From diswan, wanem nao wise samting for duim?
10. Wanem nao wise wei for deal witim olketa teaching bilong apostate?
10 Aposol John talem olketa Christian for no acceptim olketa apostate insaed long haos bilong olketa. Hem raet: “Sapos eniwan kam long iufala and no kam witim disfala teaching, no invaetem hem insaed long haos bilong iufala or sei hello long hem. From man wea talem greeting long hem, hem share long wicked fasin bilong hem.” (2 John 10, 11) For stap klia long olketa wea againstim iumi bae protectim iumi from nogud tingting bilong olketa. For lukluk long olketa apostate teaching thru long olketa difren wei wea hem kamaot tuday hem sem danger olsem wei for letem wanfala wea apostate for kam insaed long haos bilong iumi. Iumi shud no letem wei for interest for savve for pullim iumi long kaen nogud wei olsem.—Proverbs 22:3.
Insaed long Kongregeson
11, 12. (a) Wanem nao wanfala ples wea nogud idea savve kam from insaed first century kongregeson? (b) Hao nao samfala Christian fail for hol strong long teaching bilong God?
11 Bat tingim moa nara ples wea nogud idea savve kamaot from. Maet hem no min for teachim laea teaching, bat wanfala Christian wea dedicate savve garem fasin for toktok olabaot. (Proverbs 12:18) From iumi no perfect, iumi evriwan bae samtaem tok rong witim tongue bilong iumi. (Proverbs 10:19; James 3:8) Luk olsem, long taem bilong aposol Paul, samfala insaed long kongregeson fail for kontrolem tongue so olketa join insaed long olketa iusles raoa abaotem olketa word. (1 Timothy 2:8) Samfala narawan tu tinghae tumas long tingting bilong olketa seleva and gogo olketa challengem paoa bilong Paul tu. (2 Corinthians 10:10-12) Kaen fasin olsem end ap long olketa iusles raoa.
12 Samtaem olketa raoa hia kamap big olsem “olketa raf kaen raoa long olketa samting nating,” wea spoelem peace insaed long kongregeson. (1 Timothy 6:5; Galatians 5:15) Paul raet olsem abaotem olketa wea kosim olketa raoa hia: “Sapos eni man teachim nara teaching and no agree long healthy toktok, wea bilong Lord Jesus Christ, or long teaching wea fitim love for God, hem kamap bighed [witim praod fasin], and no minim eni samting, bat garem sik long mind from olketa kwestin and raoa long olketa word. Olketa samting hia startim wei for jealous, raoa, tok spoelem, and daot long nogud wei.”—1 Timothy 6:3, 4.
13. Wanem nao fasin bilong klosap evri Christian long firstfala century?
13 Gudfala samting hem hao long taem bilong olketa aposol, klosap evri Christian hem faithful and go ahed witim waka for talemaot gud nius abaotem Kingdom bilong God. Olketa busy for lukaftarem “olketa pikinini wea no garem dadi and mami and olketa widow woman wea kasem hardfala taem” and keepim olketa seleva “klin from world,” and no westem taem bilong olketa witim olketa iusles raoa abaotem olketa toktok. (James 1:27) Olketa stap klia long “nogud kaban” nomata insaed long Christian kongregeson mekem olketa protectim Christian saed bilong olketa.—1 Corinthians 15:33; 2 Timothy 2:20, 21.
14. Sapos iumi no careful, hao nao wei for talem tingting savve end ap long nogud raoa?
14 Olsem tu, olketa kongregeson bilong Olketa Jehovah’s Witness tuday no olsem kaen samting wea paragraf 11 storyim. Nomata olsem, hem gud for luksavve long samting wea savve kamaot from datkaen iusles raoa. Hem normal nomoa for storyim olketa Bible story and ting raonem samfala samting abaotem niu world wea God promisim, wea iumi no garem eni information abaotem yet. And no eni samting rong witim wei for talem tingting bilong iumi seleva long olketa samting, maet olsem wei for werem kaleko or wanem kaen hapitaem for duim. Bat, sapos iumi ova tumas for saedem tingting bilong iumiseleva and kros taem nara pipol no agree witim iumi, gogo kongregeson maet divaed long olketa smol samting nomoa. Samting wea start olsem smol samting savve kamap barava nogud samting.
Gardim Trust Bilong Iumi
15. Hao big nao trabol wea “teaching bilong olketa demon” savve duim long iumi long spiritual saed, and wanem kaonsel nao Bible hem givim?
15 Aposol Paul hem givim warning: “Spirit hem talem stret hao long olketa taem wea bae kam bihaen samfala bae lusim faith, and lisin long olketa giaman spirit and teaching bilong olketa demon.” (1 Timothy 4:1) Tru nao, olketa nogud idea hem danger tumas. Dastawe Paul encouragem klos fren bilong hem: “O Timothy, gardim samting wea stap long kea bilong iu, tanawe from olketa rabis toktok wea spoelem holy samting and from olketa toktok wea againstim wea pipol giaman for kolem olsem ‘savve.’ From samfala laek show-off long kaen savve olsem, olketa lusim faith nao.”—1 Timothy 6:20, 21.
16, 17. God trustim iumi witim wanem, and hao nao iumi shud protectim?
16 Hao nao iumi savve kasem gudfala samting tuday from disfala gudfala warning? Timothy hem kasem trust—for kea and protectim samting wea important. Wanem nao datwan? Paul explainim: “Go ahed for followim datfala plan bilong healthy toktok wea iu herem from mi witim faith and love wea join witim Christ Jesus. Keepim disfala gudfala trust thru long holy spirit wea stap insaed long iumi.” (2 Timothy 1:13, 14) Tru nao, insaed trust long Timothy hem olketa “healthy toktok,” “teaching wea fitim love for God.” (1 Timothy 6:3) Followim olketa toktok hia, olketa Christian tuday disaed strong for protectim faith bilong olketa and evri truth wea olketa kasem trust for keepim.
17 For gardim datfala trust minim for mekem grow kaen samting olsem gudfala wei for Bible-study and for go ahed long prea, taem man go ahed for “duim gudfala waka long evriwan, bat main wan nao long olketa wea garem sem faith olsem iumi.” (Galatians 6:10; Romans 12:11-17) Paul kaonsel olsem moa: “Lukaotem raeteous fasin, fasin for lovem God, faith, love, fasin for stand strong, kwaet fasin. Faetem nambawan faet bilong faith, hol strong long laef olowe wea God kolem iu long hem and wea iu talemaot long pablik front long planti witness.” (1 Timothy 6:11, 12) Wei wea Paul iusim kaen toktok olsem “faetem nambawan faet” and “hol strong” hem mekem klia hao iumi mas barava duim samting and disaed strong for againstim olketa nogud hevi.
Need for Luksavve
18. Hao nao iumi savve showimaot Christian wei for balance taem iumi deal witim information bilong world?
18 Hem tru, taem man hem faetem nambawan faet bilong faith, hem needim fasin for luksavve. (Proverbs 2:11; Philippians 1:9) Olsem example, hem no balance for no trustim evri information wea iumi herem. (Philippians 4:5; James 3:17) No evri idea bilong man nao againstim Word bilong God. Jesus talemaot need bilong sik pipol for go lukim doctor—wanfala waka bilong disfala world. (Luke 5:31) Nomata treatment bilong medicine hem no mas gud long taem bilong Jesus, hem luksavve hao gudfala samting savve kamaot from help bilong doctor. Olketa Christian tuday showimaot balance saed long information bilong world, bat olketa stap klia long eniting wea maet spoelem olketa long spiritual saed.
19, 20. (a) Hao nao olketa elder savve duim samting witim fasin for luksavve taem olketa helpem olketa wea talem olabaot toktok? (b) Hao nao kongregeson bae deal witim olketa wea go ahed for mekhae long laea teaching?
19 Olketa elder barava needim fasin for luksavve tu taem olketa ting for helpem olketa wea talem olabaot toktok. (2 Timothy 2:7) Samtaem, samfala kongregeson member maet insaed long samfala raoa abaotem smol samting or samfala idea. For protectim wan mind bilong kongregeson, olketa elder shud kwiktaem deal witim problem olsem. Long semtaem, olketa stap klia long wei for talemse olketa brata bilong olketa garem nogud plan and for kwiktaem ting long olketa olsem apostate.
20 Paul storyim hao nao for givim help. Hem sei: “Olketa brata, nomata wanfala man hem go rong lelebet taem hem no minim yet, iufala wea fit long spiritual wei mas trae for stretem datfala man witim kwaet fasin.” (Galatians 6:1) Taem hem barava tok abaotem olketa Christian wea garem problem saed long daot, Jude hem raet: “Go ahed for showim mercy long samfala wea daot; sevem olketa long wei for pullim olketa aot from fire.” (Jude 22, 23) Hem tru, sapos bihaen olketa help bat samwan hem go ahed for mekhae long laea teaching, olketa elder bae need for duim samting for protectim kongregeson.— 1 Timothy 1:20; Titus 3:10, 11.
Fulimap Mind Bilong Iumi Witim Samting wea Kasem Praise
21, 22. Wanem nao iumi shud chusim gud, and iumi shud fulimap mind bilong iumi witim wanem?
21 Christian kongregeson hem stap klia from olketa nogud toktok wea savve “spread olsem gangrene.” (2 Timothy 2:16, 17; Titus 3:9) Diswan hem tru nomata kaen toktok hia hem kamaot from nogud “wisdom” bilong world, olketa teaching bilong apostate, or olketa olabaot toktok insaed long kongregeson. Hem tru hao wei for barava interest for lanem niu samting savve givim iumi gudfala samting, wei for no careful long diswan savve openem kam tingting wea savve spoelem iumi. Iumi savve long olketa plan bilong Satan. (2 Corinthians 2:11) Iumi savve hao hem trae hard tumas for mekem iumi busy for katem daon service bilong iumi long God.
22 Olsem olketa gudfala minister, letem iumi hol strong long teaching bilong God. (1 Timothy 4:6) Iumi laek for iusim gud taem bilong iumi long wei for chusim gud information wea iumi lukluk long hem. Then olketa idea wea kamaot from Satan bae no isi for tanem iumi. Yes, letem iumi go ahed for ting raonem “evri samting wea tru, evri samting wea important, evri samting wea raeteous, evri samting wea klin, evri samting wea iumi fit for lovem, evri samting wea pipol tok gud long hem, evri gudfala samting and evri samting wea fit for praisem.” Sapos iumi fulimap mind and heart bilong iumi witim kaen samting olsem, God bilong peace bae stap witim iumi.—Philippians 4:8, 9.
Wanem Nao Iumi Lanem Finis?
• Hao nao wisdom bilong world maet kamap danger long spiritual saed bilong iumi?
• Wanem nao iumi savve duim for protectim iumiseleva from olketa nogud information bilong apostate?
• Wanem kaen toktok nao iumi shud stap klia long hem insaed long kongregeson?
• Hao nao Christian wei for balance hem showaot taem iumi deal witim planti information bilong tuday?
[Piksa long page 9]
Planti magasin and buk wea staka readim againstim olketa Christian tingting bilong iumi
[Piksa long page 10]
Olketa Christian no need for saedem tumas tingting bilong seleva taem olketa story