Olketa Gospel—Raoa Go Ahed
Waswe, story bilong olketa Gospel abaotem taem wea Jesus Christ born hem tru?
Waswe, Jesus nao talem Sermon long Maunten?
Waswe, Jesus barava resurrect?
Waswe, hem barava sei: “Mi nao wei and truth and laef”?—JOHN 14:6.
SAMTING olsem 80-fala savveman nao storyim kaen samting hia long Jesus Seminar, wea olketa duim tufala taem evri year start kam long 1985. Disfala grup bilong olketa savveman ansarem olketa kwestin long barava difren wei. Olketa wea tekpart long datfala Seminar iusim pepa for votem evri toktok wea Jesus talem insaed olketa Gospel. Red pepa showimaot Jesus nao barava talem datfala toktok. Pink pepa minim datfala toktok hem klosap olsem samting wea maet Jesus talem. Gray pepa showaot olketa idea klosap long olketa idea bilong Jesus, bat datfala toktok no kam from hem. Blak pepa hem minim barava nomoa nao, datfala toktok hem kamaot from tingting bilong man bihaen.
Taem olketa followim kaen wei olsem, olketa wea tekpart long datfala Jesus Seminar sei no for fofala kwestin wea iumi storyim long start. Tru nao, olketa chusim blak pepa for 82 percent long olketa toktok bilong Jesus insaed olketa Gospel. Olketa sei luk olsem 16 percent nomoa long olketa story abaotem Jesus insaed olketa Gospel and narafala buk hem tru.
Kaen wei for tok againstim olketa Gospel olsem hem no niu samting. Wei for attakim olketa Gospel hem kamap long 1774, taem olketa pablisim wanfala 1,400-page manuscript bilong Hermann Reimarus, wanfala professor bilong olketa Orient languis long Hamburg, Germany, bihaen hem dae. Insaed datfala manuscript Reimarus talemaot olketa barava bigfala daot sapos olketa Gospel hem barava tru. Tingting bilong hem kamaot from study bilong hem long olketa languis and olketa toktok wea luk olsem againstim olketa seleva wea stap insaed story bilong olketa Gospel abaotem laef bilong Jesus. Start kam long dat taem, pipol for tok againstim Bible planti taem daotem sapos olketa Gospel hem tru, wea diswan mekem pipol no trustim olketa raeting hia.
Main fasin wea olketa savveman hia garem nao olketa ting long olketa Gospel olsem giaman story bilong religion wea olketa difren pipol raetem. Olketa kwestin wea olketa savveman planti taem askem nao: Waswe, samting olketa bilivim hem mekem olketa man wea raetem fofala Gospel for ova tumas long olketa tru samting wea happen? Waswe, saed bilong politik long taem bilong olketa Christian bifor hem mekem olketa for changem or joinim moa samting long story bilong Jesus? Wanem nao part bilong olketa Gospel wea talem tru story and wanem nao kastom story?
Pipol wea big kam insaed community wea no biliv long God or no interest long religion bilivse Bible—olketa Gospel tu insaed diswan—hem buk wea fulap witim olketa kastom story. Olketa nara pipol moa feel nogud tumas long history bilong Christendom wea fulap witim wei for kapsaetem blood, hardfala living, wei for divaed, and fasin wea no followim God. Pipol olsem no lukim eni reason for lisin long olketa raeting wea Christendom ting holy long hem. Long tingting bilong olketa, buk wea mekem wanfala hypocrite religion kamap hem garem nomoa olketa iusles laea story.
Wanem nao tingting bilong iu? Waswe, bae iu letem tu-thri savveman wea daotem sapos olketa Gospel hem tru for mekem semkaen daot kamap insaed mind bilong iu? Taem iu herem toktok abaotem wei wea olketa man wea raetem Gospel olketa raetem kastom story, waswe, fitim iu for letem diswan mekem trust bilong iu long olketa for seksek? Waswe, wei wea Christendom no followim God shud mekem iu garem kwestin abaotem wei wea olketa Gospel hem tru? Mifala invaetem iu for lukluk long olketa tru samting.
[Piksa long page 4]
Waswe, olketa Gospel talem kastom story or tru samting?
[Credit Line]
Jesus Wakabaot Long Sea/The Doré Bible Illustrations/Dover Publications
[Piksa Credit Line long page 3]
Piksa long bihaen, page 3-5 and 8: Courtesy of the Freer Gallery of Art, Smithsonian Institution, Washington, D.C.