Garem Faith Long Profesi Toktok Bilong God!

“Iumi garem profesi toktok wea kamap moa sure.”—2 PETER 1:19.

1, 2. Wanem nao barava first profesi, and wanem nao wanfala kwestin wea kamaot from diswan?

JEHOVAH nao talem barava first profesi. Bihaen Adam and Eve sin, God talem datfala snek: “Mi bae putim fasin for heit midolwan long iu and long woman and midolwan long seed bilong iu and seed bilong hem. Hem bae killim iu long hed and iu bae killim hem long leg.” (Genesis 3:1-7, 14, 15) Planti handred year bae go pas bifor olketa garem full mining bilong disfala profesi toktok.

² Datfala first profesi givim trufala hope for olketa man wea sin. Bihaen, Bible showimaot hao Satan datfala Devil nao “firstfala snek.” (Revelation 12:9) Bat hu nao bae datfala promis Seed bilong God?

Lukaotem Seed

3. Hao nao Abel showimaot faith long first profesi?

³ No olsem dadi bilong hem, Abel wea followim God showimaot faith long datfala first profesi. Abel luksavve wei for kapsaetem blood nao man needim for kavarem sin. So faith wea hem garem muvim hem for givim wanfala animal sakrifaes wea God acceptim. (Genesis 4:2-4) Nomata olsem, hu nao bae datfala promis Seed hem stap olsem wanfala secret yet.

4. God givim Abraham wanem promis, and wanem nao datwan showimaot abaotem promis Seed?

⁴ Samting olsem 2,000 year bihaen taem bilong Abel, Jehovah talem disfala promis bilong profesi long Abraham: “Mi bae barava blessim iu and mi bae barava mekem seed bilong iu kamap planti olsem olketa star bilong heven . . . And thru long seed bilong iu evri nation bilong earth bae barava blessim olketa seleva.” (Genesis 22:17, 18) Olketa toktok hia joinim Abraham witim wei wea datfala first profesi hem fulfill. Olketa toktok hia showaot datfala Seed wea bae finisim olketa waka bilong Satan bae kam from laen bilong Abraham. (1 John 3:8) “Bikos long promis bilong God [Abraham] hem no seksek long faith” and semsem tu for olketa Witness bilong Jehovah wea “no lukim datfala promis hem fulfill.” (Romans 4:20, 21; Hebrews 11:39) Bat, olketa keepim faith long profesi toktok bilong God.

5. Long hu nao promis bilong God abaotem Seed hem fulfill, and why nao iu ansa olsem?

⁵ Aposol Paul talemaot hu nao datfala promis Seed bilong God taem hem raet olsem: “God talem olketa promis long Abraham and long seed bilong hem. Hem no sei: ‘And long olketa seed,’ wea minim planti, bat hem minim wanfala: ‘And long seed bilong iu,’ wea hem Christ.” (Galatians 3:16) Datfala Seed wea evri nation bae blessim olketa seleva thru long hem no minim evri pikinini wea kam from Abraham. Olketa wea kam from laen bilong son bilong hem Ishmael and olketa son bilong hem wea Keturah bornem bae no blessim olketa man. Datfala Seed bilong blessing bae kam thru long son bilong hem Isaac and granson bilong hem Jacob. (Genesis 21:12; 25:23, 31-34; 27:18-29, 37; 28:14) Jacob talem hao “pipol” bae obey long Shiloh long tribe bilong Judah, bat bihaen, Seed hia bae kam from laen bilong David. (Genesis 49:10; 2 Samuel 7:12-16) Olketa Jew long first century expectim wanfala man for kam olsem Messiah, or Christ. (John 7:41, 42) And profesi bilong God abaotem datfala Seed hem fulfill long Son bilong hem, Jesus Christ.

Messiah Hem Kam!

6. (a) Hao nao iumi minim profesi bilong 70 week? (b) Wanem taem and hao nao Jesus “finisim sin”?

⁶ Profet Daniel hem recordim wanfala important profesi bilong Messiah. Long first year wea Darius bilong Media hem rul, Daniel luksavve hao wei wea Jerusalem stap emti for 70 year hem klosap finis nao. (Jeremiah 29:10; Daniel 9:1-4) Taem Daniel hem prea, angel Gabriel kam and showimaot hao datfala ‘seventi week hem for finisim sin.’ Messiah bae kat off long midol bilong mek-70 week. “Seventi week bilong olketa year” start long 455 B.C.E. taem King bilong Persia Artaxerxes I ‘sendem go toktok for buildim moa Jerusalem.’ (Daniel 9:20-27; Moffatt; Nehemiah 2:1-8) Messiah bae kam bihaen 7-fala week plus 62 week. Disfala 483 year hem start long 455 B.C.E. and go kasem 29 C.E., taem Jesus baptaes and God anointim hem olsem Messiah, or Christ. (Luke 3:21, 22) Jesus “finisim sin” taem hem givim laef bilong hem olsem wanfala ransom long 33 C.E. (Mark 10:45) Olketa hia gudfala reason for garem faith long profesi toktok bilong God!a

7. Long wei for iusim olketa Scripture, showimaot hao Jesus fulfillim olketa Messiah profesi.

⁷ Faith long profesi toktok bilong God mekem iumi fit for luksavve long Messiah. Long planti Messiah profesi wea stap insaed Hebrew Scripture, olketa man wea raetem Christian Greek Scripture talemaot klia hao planti long olketa fitim Jesus. Olsem example: Jesus hem born from wanfala young girl long Bethlehem. (Isaiah 7:14; Micah 5:2; Matthew 1:18-23; Luke 2:4-11) Olketa tekem hem aot from Egypt, and pipol killim dae olketa baby bihaen hem born. (Jeremiah 31:15; Hosea 11:1; Matthew 2:13-18) Jesus karem olketa sik bilong iumi. (Isaiah 53:4; Matthew 8:16, 17) Olsem profesi talem, hem go insaed Jerusalem antap long wanfala young donkey. (Zechariah 9:9; John 12:12-15) Toktok bilong man wea raetem psalm fulfill bihaen Jesus dae, taem olketa soldia divaedem olketa kaleko bilong hem midolwan long olketa seleva and plei for winim insaed kaleko bilong hem. (Psalm 22:18; John 19:23, 24) Wei wea olketa bone bilong Jesus no brek and olketa spiarim hem fulfillim profesi tu. (Psalm 34:20; Zechariah 12:10; John 19:33-37) Olketa hia tu-thri example nomoa long olketa Messiah profesi wea fitim Jesus wea olketa man wea spirit bilong God muvim olketa for raetem Bible olketa talem.b

Praisem Messiah King!

8. Hu nao Man From Taem Bifor Kam, and hao nao profesi wea stap long Daniel 7:9-14 hem fulfill?

⁸ Long first year bilong King Belshazzar bilong Babylon, Jehovah givim wanfala dream and olketa spesol vision long profet bilong hem Daniel. Datfala profet lukim fofala maeti animal. Angel bilong God sei olketa hia “fofala king,” wea showimaot olketa piksarem fofala world paoa. (Daniel 7:1-8, 17) Then Daniel lukim Jehovah, “Man From Taem Bifor Kam” hem kam sidaon witim glory long throne bilong hem. From hem barava judgem olketa animal hia, hem aotem wei for rul from olketa and finisim mek-foa animal. Rul for olowe ovarem “evri pipol, nation and languis” hem go long “samwan wea olsem son bilong man.” (Daniel 7:9-14) Datwan hem wanfala nambawan profesi wea join witim wei wea “Son bilong man,” Jesus Christ, hem kamap king long heven long year 1914!—Matthew 16:13.

9, 10. (a) Olketa difren part bilong datfala image insaed dream hem point go long wanem? (b) Hao nao bae iu explainim mining bilong Daniel 2:44?

⁹ Daniel savve God bae “aotem olketa king and startim olketa king.” (Daniel 2:21) Witim faith long Jehovah, “Man Wea Showimaot olketa secret,” datfala profet talemaot mining bilong dream bilong King Nebuchadnezzar bilong Babylon abaotem wanfala maeti image. Olketa difren part bilong hem point go long wei wea olketa world paoa olsem Babylon, Media-Persia, Greece, and Rome olketa start and finis. God iusim Daniel tu for talemaot olketa samting wea bae happen long world kam kasem taem bilong iumi and long future.—Daniel 2:24-30.

¹⁰ Datfala profesi hem sei olsem: “Long taem bilong olketa king hia God bilong heven bae startim wanfala kingdom wea bae nating savve finis. And datfala kingdom bae no go long eni narafala pipol. Hem bae smasem and finisim evri kingdom hia, and hemseleva nao bae stap olowe.” (Daniel 2:44) Taem “taem bilong olketa nation wea set finis” hem end long 1914, God startim Kingdom long heven anda long Christ. (Luke 21:24; Revelation 12:1-5) Thru long paoa bilong God, “stone” bilong datfala Messiah Kingdom hem aot from “maunten” bilong sovereign rul bilong God long universe. Long Armageddon datfala stone bae hitim datfala image and pisisim evribit. Olsem wanfala maunten gavman wea affectim “full earth,” datfala Messiah Kingdom bae stap for olowe.— Daniel 2:35, 45; Revelation 16:14, 16.c

11. Wei wea Jesus change and kasem glory hem showimaot wanem, and hao nao disfala vision affectim Peter?

¹¹ Jesus tingim Kingdom rul bilong hem taem hem sei olsem long olketa disaepol bilong hem: “Samfala wea standap long hia bae no dae go kasem taem wea olketa lukim Son bilong man kam long kingdom bilong hem.” (Matthew 16:28) Sixfala day bihaen, Jesus tekem Peter, James, and John long wanfala barava hae maunten wea hem change and kasem glory front long olketa. Taem wanfala braet cloud kavarem olketa aposol, God hem sei: “Dis wan hem Son bilong mi, wea mi lovem, wea mi appruvim; lisin long hem.” (Matthew 17:1-9; Mark 9:1-9) Datwan hem spesol wei for lukim firstaem glory bilong Kingdom bilong Christ! Iumi no sapraes hao Peter storyim datfala vision olsem: “Iumi garem profesi toktok wea kamap moa sure.”— 2 Peter 1:16-19.d

12. Why nao distaem hem barava taem for showimaot faith bilong iumi long profesi toktok bilong God?

¹² Hem luk olsem datfala “profesi toktok” hem minim olketa profesi toktok bilong Hebrew Scripture abaotem Messiah bat tu toktok bilong Jesus hao hem bae kam “witim paoa and bigfala glory.” (Matthew 24:30) Taem wea hem change and kasem glory hem pruvim hao profesi toktok abaotem wei wea Christ bae kam witim bigfala glory long Kingdom paoa hem bae happen. Klosap nao, wei wea hem showaot klia long glory bae minim wei for finisim evribit olketa wea no garem faith and blessing for olketa wea showimaot faith. (2 Thessalonians 1:6-10) Wei wea Bible profesi fulfill pruvim distaem hem “olketa last day.” (2 Timothy 3:1-5, 16, 17; Matthew 24:3-14) Olsem Main Man bilong Jehovah for Bringim Judgment, Michael, wea hem Jesus Christ, stap redy for finisim disfala wicked system long taem bilong “bigfala trabol.” (Matthew 24:21; Daniel 12:1) So, distaem nao hem barava taem for showimaot iumi garem faith long profesi toktok bilong God.

Keepim Faith Long Profesi Toktok Bilong God

13. Wanem nao savve helpem iumi for keepim love bilong iumi for God and faith long word bilong hem laef?

¹³ Iumi hapi tumas taem iumi firstaem lane abaotem olketa wei wea profesi toktok bilong God hem fulfill. Bat waswe, start kam long datfala taem faith bilong iumi hem go daon and love bilong iumi cold daon? Iumi hope for no kamap olsem olketa Christian long Ephesus wea ‘lusim datfala love wea olketa garem firstaem.’ (Revelation 2:1-4) Nomata hao long iumi servem Jehovah finis, iumi savve lusim disfala love sapos iumi no ‘go ahed for lukaotem kingdom bilong God and raeteous fasin bilong hem firstaem’ mekem iumi hipimap olketa rich samting long heven. (Matthew 6:19-21, 31-33) Wei for strong for studyim Bible, evritaem tekpart long olketa Christian meeting, and strong for preachim Kingdom bae helpem iumi for keepim love bilong iumi for Jehovah, for Son bilong hem, and for olketa Scripture. (Psalm 119:105; Mark 13:10; Hebrews 10:24, 25) Then diswan bae mekem faith bilong iumi long word bilong God hem go ahed for laef.— Psalm 106:12.

14. Hao nao olketa anointed Christian kasem reward for faith bilong olketa long profesi toktok bilong Jehovah?

¹⁴ Long sem wei wea profesi toktok bilong God hem fulfill bifor, iumi savve garem faith hao wanem hem talem bae happen long future. Olsem example, wei wea Christ stap long Kingdom glory hem happen distaem, and olketa anointed Christian wea faithful go kasem dae experiencem wei wea disfala promis bilong profesi hem fulfill: “For man wea win bae mi letem hem kaikai from tree bilong laef, wea hem stap long paradaes bilong God.” (Revelation 2:7, 10; 1 Thessalonians 4:14-17) Jesus givim olketa hia wea win datfala privilege for “kaikai from tree bilong laef” long “paradaes bilong God” long heven. Long resurrection bilong olketa and thru long Jesus Christ, olketa share long wei for kanduit dae and no savve sin wea Jehovah givim, wea hem “King bilong olowe, wea no savve dae, wea man no savve lukim, wea hem nao only God.” (1 Timothy 1:17; 1 Corinthians 15:50-54; 2 Timothy 1:10) Datwan hem nambawan reward for love wea no savve finis for God and faith wea no savve seksek long profesi toktok bilong hem!

15. Faondeson bilong “niu earth” hem start witim hu, and wanem sekson nao kaban witim olketa?

¹⁵ No longtaem bihaen olketa faithful anointed wan wea dae olketa resurrect go long “paradaes bilong God” long heven, remnant bilong spiritual Israel long earth kamap free from “Bigfala Babylon,” world rul bilong giaman religion. (Revelation 14:8; Galatians 6:16) Faondeson bilong “niu earth” hem start long olketa hia. (Revelation 21:1) So, “wanfala land” hem born, and hem kamap wanfala spiritual paradaes wea grow gud evriwea long earth distaem. (Isaiah 66:8) Staka wea olsem olketa sheep wea kaban witim spiritual Israel go ahed for go insaed long there distaem, “long lastfala part bilong olketa day.”— Isaiah 2:2-4; Zechariah 8:23; John 10:16; Revelation 7:9.

Profesi Toktok Bilong God Talemaot Future Bilong Man

16. Wanem nao hope for olketa wea loyal for saportim olketa anointed wan?

¹⁶ Wanem nao hope for pipol wea loyal for saportim olketa anointed wan? Olketa tu garem faith long profesi toktok bilong God, and hope bilong olketa hem for go insaed Paradaes long earth. (Luke 23:39-43) Long there olketa bae drink from “wanfala river bilong wata bilong laef” and bae kasem healing from “olketa leaf bilong olketa tree” wea stap saed long hem. (Revelation 22:1, 2) Sapos iu garem nambawan hope olsem, letem iu go ahed for showimaot deep love for Jehovah and faith long profesi toktok bilong hem. Letem iu stap witim olketa wea kasem barava bigfala hapi for laef olowe insaed datfala Paradaes earth.

17. Wanem nao olketa blessing bilong laef insaed long Paradaes earth?

¹⁷ Olketa man wea no perfect kanduit minim evribit laef wea bae kamap insaed Paradaes earth, bat profesi toktok bilong God givim iumi savve abaotem olketa blessing wea man bae kasem. Taem Kingdom bilong God seleva hem rul and will bilong hem kamap long earth olsem long heven, no eni raf man—nomoa, nomata olketa animal tu—bae “spoelem eniwan or eni samting.” (Isaiah 11:9; Matthew 6:9, 10) Olketa wea garem kwaet fasin bae stap long disfala earth, and “olketa bae hapi tumas long bigfala peace.” (Psalm 37:11) No eniwan bae hangre, bikos “planti kaikai bae stap long earth; antap long olketa maunten hem bae fulap.” (Psalm 72:16) No eniwan bae krae from sorre. Sik bae finis, and dae tu bae nomoa nao. (Isaiah 33:24; Revelation 21:4) Tingim—nomoa eni doctor, medicine, hospital, mentol hospital, and funeral. Hem barava nambawan hope!

18. (a) Daniel hem kasem wanem promis? (b) Wanem nao bae “share” bilong Daniel?

¹⁸ Grev bilong olketa man tu bae emti taem resurrection hem changem dae. Raeteous man Job garem hope olsem. (Job 14:14, 15) Profet Daniel tu garem datwan, bikos angel bilong Jehovah talem hem disfala promis wea givim hem comfort: “For saed bilong iu, go for kasem end; and iu bae rest, bat iu bae standap for share bilong iu long end bilong olketa day.” (Daniel 12:13) Daniel servem God long faithful wei go kasem end long laef bilong hem. Distaem hem rest long dae, bat hem bae “standap” long “resurrection bilong olketa raeteous wan” long Thousand Year Rul bilong Christ. (Luke 14:14) Wanem nao bae “share” bilong Daniel? Profesi bilong Ezekiel showimaot hao evri pipol bilong Jehovah bae garem wanfala share, land wea hem divaedem long olketa followim stretfala wei and followim order, wea diswan bae fulfill long Paradaes. (Ezekiel 47:13–48:35) So Daniel bae garem wanfala ples long Paradaes, bat share bilong hem bae moa samting winim land. Hem bae minim tu part wea hem garem insaed purpose bilong Jehovah.

19. Wanem nao man needim for kasem laef insaed long Paradaes earth?

¹⁹ Waswe long iu and share bilong iu? Sapos iu garem faith long Word bilong God, Bible, iu barava laekem for laef insaed long Paradaes earth. Maet iu piksarem iuseleva long there tu, enjoyim planti blessing bilong hem, lukaftarem earth, and hapi for welkamim bak olketa wea dae finis. Tru nao, Paradaes nao ples bilong olketa man. God creatim first man and woman for stap insaed ples olsem. (Genesis 2:7-9) And hem laekem olketa man wea obey for stap olowe insaed Paradaes. Waswe, bae iu duim samting followim Bible mekem iu savve stap witim planti million wea bae stap insaed Paradaes earth? Iu savve stap long there sapos iu garem trufala love for Dadi bilong iumi long heven, Jehovah, and strongfala faith long profesi toktok bilong God.

[Olketa Footnote]

Hao Nao Bae Iu Ansa?

• Wanem nao first profesi, and hu nao datfala promis Seed?

• Wanem nao samfala Messiah profesi wea fulfill long Jesus?

• Hao nao Daniel 2:44, 45 bae fulfill?

• Profesi toktok bilong God point go long wanem future for olketa man wea obey?

[Piksa long page 18]

Waswe, iu hope for stap insaed long Paradaes earth?